ព្រះសីហនុ/កំពង់ស្ពឺៈ ក្រុមចោរឆក់សកម្មចំនួន ១១ នាក់ ត្រូវបានអយ្យការអមសាលាដំបូងខេត្តព្រះសីហនុសម្រេចចោទប្រកាន់កាលពីម្សិលមិញ បន្ទាប់ពីសមត្ថកិច្ចចាប់ខ្លួនបាននៅថ្ងៃទី ៥ ធ្នូ ក្នុងក្រុង-ខេត្តព្រះសីហនុពាក់ព័ន្ធនឹងបទល្មើសឆក់ ស្របពេលដែលក្រុមជនសង្ស័យ ៨ នាក់ កំពុងត្រូវបានសមត្ថកិច្ចសាកសួរពីករណីស្រដៀងគ្នានេះ។
លោក លឹម ប៊ុនហេង អ្នកនាំពាក្យផ្នែកអយ្យការនៃសាលាដំបូងខេត្ត ព្រះសីហនុបានប្រាប់កាលពីម្សិលមិញថា ក្រុមចោរឆក់ចំនួន ១១ នាក់ដែលសមត្ថកិច្ចបញ្ជូនទៅតុលាការកាលពីថ្ងៃទី ៨ ធ្នូ នោះ ត្រូវបានអយ្យការអមសាលាដំបូងខេត្តព្រះសីហនុចោទប្រកាន់ហើយនៅថ្ងៃទី ៩ ធ្នូ ហើយពួកគេត្រូវបញ្ជូនបន្តទៅចៅក្រមស៊ើបសួរដើម្បីសម្រេចជាចុងក្រោយ។
លោកបានប្រាប់ថា៖ «ជនសង្ស័យទាំង ១១ នាក់ ត្រូវបានតំណាងអយ្យការចោទប្រកាន់ពីបទលួចមានស្ថានទម្ងន់ទោសតាមមាត្រា ៣៥៣ និងមាត្រា ៣៥៧ នៃក្រមព្រហ្មទណ្ឌ»។
តាមមាត្រា ៣៥៣ និងមាត្រា ៣៥៧ នៃក្រមព្រហ្មទណ្ឌដែលចោទប្រកាន់នេះ ប្រសិនបើតុលាការរកឃើញថា ជនត្រូវចោទទាំង ១១ នាក់ពិតជាបានប្រព្រឹត្តបទល្មើសមែននោះ ពួកគេត្រូវប្រឈមមុខនឹងការជាប់ពន្ធនាគារពី ៣ ឆ្នាំទៅ ១០ ឆ្នាំ។
លោក ហ៊ី សុខលី ប្រធានការិយាល័យព្រហ្មទណ្ឌកម្រិតស្រាលប្រាប់ពីថ្ងៃអាទិត្យថាជនទាំង ១១ នាក់នោះ សុទ្ធតែជាខ្មែរទាំងអស់ដែល ទី១ មានឈ្មោះ សឿន ប៊ុនសែន ភេទប្រុស អាយុ ២០ ឆ្នាំ ទី២- ឈ្មោះ យាន អាន ភេទប្រុស អាយុ ១៦ ឆ្នាំជាបុគ្គលិកកាស៊ីណូយីហោទីងស៊ឹង ទី៣- ឈ្មោះ សោ ដារ៉ា ហៅ ប៉ាន់ ភេទប្រុស អាយុ ១៥ ឆ្នាំ ជាសិស្ស ទី៤- ឈ្មោះ ផាត សុភីន ភេទប្រុស អាយុ ២០ ឆ្នាំ ទី៥- ឈ្មោះ លីម គីមស្រ៊ុន ភេទប្រុស អាយុ ១៩ ឆ្នាំ ទី៦- ឈ្មោះ នី សុវណ្ណឌឿន ភេទប្រុស អាយុ ១៤ ឆ្នាំ ទី៧- ឈ្មោះ សេង សៀវមិន ភេទប្រុស អាយុ ១៧ ឆ្នាំ ទី៨- ឈ្មោះ ឈុន ណេត ភេទប្រុស អាយុ ១៥ ឆ្នាំ ទី៩- ឈ្មោះ វ៉ុន វិច្ឆិកា ភេទប្រុស អាយុ ១៦ ឆ្នាំ ទី១០- ឈ្មោះ យន់ សុខលីន ភេទប្រុស អាយុ ១៧ ឆ្នាំ និងទី១១- ឈ្មោះ គី សំណាង ហៅ ប៊ី ភេទប្រុស អាយុ ១៧ ឆ្នាំ។ ពួកគេទាំងនោះរស់នៅក្នុងក្រុង-ខេត្តព្រះសីហនុ។
លោកប្រាប់ថា ជនសង្ស័យទាំង ១១ នាក់នោះ ជាក្រុមតែមួយដែលតែងដើរធ្វើសកម្មភាពឆក់ញឹកញាប់។ ដំបូងឡើយសមត្ថកិច្ចរបស់លោកឃាត់ខ្លួនបាន ២ នាក់ នៅចំណុចអូរ ២ ស្ថិតក្នុងភូមិ ៥ សង្កាត់ ៤ ក្រុងព្រះសីហនុក្នុងពេលកំពុងធ្វើសកម្មភាពឆក់អ្នកដំណើរជាជនជាតិបរទេស។ បន្ទាប់មកសមត្ថកិច្ចក៏នាំពួកគេឲ្យទៅប្រាប់កន្លែងស្នាក់នៅរបស់បក្ខពួកទៀត ហើយក៏ចាប់បានសរុបទាំង ១១ នាក់តែម្តង។
លោកបញ្ជាក់ថា៖ «ពួកគាត់នេះធ្វើសកម្មភាពឆក់ចល័តគ្នា ហើយទើបឆក់ជាក់ស្តែង ៣ លើក និងពីមុនៗមកច្រើនលើកតែពួកគេថាភ្លេចហើយ។ ពួកគេភាគច្រើនឆក់ជនបរទេស»។
ពាក់ព័ន្ធករណីនេះលោកស្រី ជាប សុធារី មន្ត្រីសម្របសម្រួលនៃសមាគមការពារសិទ្ធិមនុស្សអាដហុកប្រចាំនៅខេត្ត ព្រះសីហនុប្រាប់កាលពីថ្ងៃអាទិត្យថា ការចាប់ខ្លួនជនសង្ស័យពាក់ព័ន្ធអំពើលើ្មសឆក់នៅតាមដងផ្លូវក្នុងក្រុងព្រះសីហនុនេះលោកស្រីយល់ថា គឺជាករណីបង្ក្រាបក្នុងទ្រង់ទ្រាយធំមួយរបស់សមត្ថកិច្ចនៅក្នុងខេត្តព្រះសីហនុ។
លោកស្រីបានបន្តថា បទល្មើសដែលបង្កភាពអសន្តិសុខក្នុងខេត្តព្រះសីហនុនេះ លោកស្រីតែងតែមានការព្រួយបារម្ភដោយសារបទល្មើសនេះបង្កឡើងជាក្រុមបក្ខពួកច្រើន ហើយក៏មិនដឹងថាជនសង្ស័យនៅមានប៉ុន្មានក្រុមទៀតទេដែលធ្វើសកម្មភាពឆក់ប្លន់នៅក្នុងខេត្តព្រះសីហនុនោះ។
លោកស្រីបន្តថា៖ «យើងក៏មិនដឹងថាពួកគាត់ទាំង ១១ នាក់នោះ សុទ្ធតែជាជនល្មើសទេ ប៉ុន្តែបើពួកគេជាអ្នកប្រព្រឹត្តមែននោះខ្ញុំត្រេកអរចំពោះការបង្ក្រាបនេះ»។
លោកស្រីថា៖ «ក្រុមជនសង្ស័យទាំងនេះនឹងទទួលខុសត្រូវចំពោះមុខច្បាប់ដែលច្បាប់សម្រេចឲ្យមានទោសទៅវាអាចកាត់បន្ថយនូវបទល្មើសឆក់នេះដែរ»។
ករណីដោយឡែកមួយទៀតក្រុមចោរឆក់ប្លន់ ៨ នាក់ក្នុងនោះមានស្ត្រី ២ នាក់កំពុងត្រូវបានសមត្ថកិច្ចសាកសួរនៅស្នងការដ្ឋានខេត្តកំពង់ស្ពឺ បន្ទាប់ចាប់ខ្លួនកាលពីថ្ងៃទី ៨ ធ្នូក្នុងភូមិចំបក់ ឃុំវល្លិស ស្រុកសំរោងទង។
លោក សម សាមួន ស្នងការនគរបាលខេត្តកំពង់ស្ពឺបានប្រាប់កាលពីម្សិលមិញថា ជនទាំង ៨ នាក់នោះ មានអាយុពី ១៨ ដល់ ២២ ឆ្នាំ។ ពួកគេមិនត្រឹមតែឆក់ទ្រព្យសម្បត្តិពីអ្នកដំណើរទេ តែដើរធ្វើសកម្មភាពមិនរើសមុខ។ ប៉ុន្តែពេលសួរទៅពួកគេឆ្លើយថា មិនដែលបានបាញ់ប្លន់សម្លាប់មនុស្សទេ។ ពួកគេមកពីក្រុងច្បារមនខ្លះ និងមកពីស្រុកសំរោងទងខ្លះ។ តែក៏មានមកពីខេត្តផ្សេងៗទៀតដែរ តែលោកសុំមិនបញ្ជាក់ឈ្មោះខេត្តទាំងនោះទេ។
លោកប្រាប់ថា៖ «យើងប្រើវិធានការបង្ក្រាបដោយស៊ើបអង្កេត។ ពួកគេដើរបង្កបទល្មើសក្នុងខេត្តកំពង់ស្ពឺ ប៉ះអីធ្វើហ្នឹង»។
លោក ឃុត សុផល អធិការនគរបាលស្រុកសំរោងទងប្រាប់ពីម្សិលមិញថា មុនចាប់ខ្លួន សមត្ថកិច្ចបានស៊ើបអង្កេត និងប្រមូលព័ត៌មានពីពលរដ្ឋដែលចង្អុលប្រាប់ពីមុខសញ្ញា។ បើតាមចម្លើយសារភាព ពួកគេច្រើនធ្វើសកម្មភាពលើស្ត្រីជិះម៉ូតូម្នាក់ឯង ឬអ្នកដែលពួកគេគិតថាអាចនឹងយកទ្រព្យសម្បត្តិបានគឺពួកគេធ្វើភ្លាម។
លោកថា៖ «ពលរដ្ឋប្រាប់យើងដឹងថាមនុស្សហ្នឹងជាមុខសញ្ញាបង្កបទល្មើស តែយើងមិនទាន់ជឿទេ យើងដាក់កម្លាំងសម្ងាត់ឃ្លាំមើលជិតផ្ទះគេ។ បើមើលថាគេចេញម៉ូតូ ២ គ្រឿងមកវិញ ៣ គ្រឿងនោះដូចការប្រាប់របស់ពលរដ្ឋហើយ»។
បើតាមលោក ឃុត សុផល វត្ថុតាងដែលសមត្ថកិច្ចដកហូតបានរួមមានម៉ូតូ ៦ គ្រឿង, កាំបិតចម្រុះ ១៤ ដំបងឈើមួយចំនួនរួមទាំងកូនសោគ្រប់ប្រភេទសម្រាប់ដោះខ្ចៅម៉ូតូ និងក្បាំងម៉ូតូខ្លះទៀតផង៕