.jpg)
លោក សួន វិសាល ដែលកំពុងកាន់តំណែងជាប្រធានគណៈមេធាវីបច្ចុប្បន្ន។ ផា លីណា
ភ្នំពេញៈ មេធាវីចំនួន ១៣៥៥ រូបនឹងធ្វើការបោះឆ្នោតនៅថ្ងៃទី ១៦ ខែតុលា ឆ្នាំ ២០១៨ ដើម្បីជ្រើសតាំងប្រធានគណៈមេធាវី ១ រូបក្នុងអាណត្តិទី ១២ ដែលមានអាណត្តិ ២ ឆ្នាំ ហើយប្រធានគណៈមេធាវីអាចកាន់តំណែងបានតែ ២ អាណត្តិប៉ុណ្ណោះ។
លោក សួន វិសាល ដែលកំពុងកាន់តំណែងជាប្រធានគណៈមេធាវីបច្ចុប្បន្នកំពុងត្រៀមបន្តឈរជាបេក្ខជនសាជាថ្មីទៀតនឹងត្រូវប្រជែងជាមួយលោក សំ សុគង់ ជាមេធាវីម្នាក់មានឈ្មោះល្បីខាងការពារក្ដីជូនដល់សកម្មជនអ្នកនយោបាយរួមទាំងប្រធាន អតីតគណបក្សសង្គ្រោះជាតិ។
បេក្ខជនប្រធានគណៈមេធាវីទាំង ២ រូបលោក វិសាល និង លោក សុគង់ បានអះអាងប្រហាក់ប្រហែលគ្នាអំពីការធ្វើកំណែទម្រង់ក្នុងគណៈមេធាវីដើម្បីបំបាត់អំពើពុករលួយ និងភាពមិនប្រក្រតីនានាដែលបណ្ដាលឲ្យប៉ះពាល់ដល់សេវាយុត្តិធម៌នៅក្នុងប្រទេសកម្ពុជា។
លោក សួន វិសាល ក្នុងវ័យ ៥៣ ឆ្នាំបានធ្វើជាមេធាវីអស់រយៈពេល ១៩ ឆ្នាំហើយរហូតមកដល់ពេលនេះបានអះអាងប្រាប់ ភ្នំពេញប៉ុស្តិ៍តាមរយៈបទសម្ភាសកាលពីថ្ងៃព្រហស្បតិ៍ទី ៤ ខែ តុលា ឲ្យដឹងថាលោកនឹងជំរុញមេធាវីការពារក្តីឲ្យមានគុណភាព និងគោរពក្រមសីលធម៌ដែលអាចជួយកាត់បន្ថយអំពើពុករលួយ និងធ្វើការរួមគ្នាជាមួយតុលាការ ដើម្បីធ្វើការបណ្តុះបណ្តាលមេធាវី និង ធ្វើការតាមដានបុគ្គលមេធាវី និងដាក់ពិន័យបុគ្គលដែលអសកម្ម។
លោក វិសាល ថ្លែងថា៖ «នៅក្នុងប្រទេសជឿនលឿន ដើម្បីបំបាត់ចោលនូវភាពអសកម្មនេះនៅពេលដែលមេធាវីចង់ជួបចៅក្រមត្រូវតែមានព្រះរាជអាជ្ញាទៅចូលរួមជាមួយដែរ។ មិនអាចឲ្យចៅក្រមទៅជួបស្ងាត់ៗតែឯងបានទេ ...ការចរចាក្រោមតុមិនអាចកើតមានឡើងបានទេ ហើយការជួបជាសម្ងាត់រវាងចៅក្រមនឹងមេធាវី និងការជួបសម្ងាត់រវាងចៅក្រម និង ព្រះរាជអាជ្ញាគឺមិនអាចអនុញ្ញាតឲ្យមាននេះគឺជាចំណុចមួយនៃការកែទម្រង់នៃច្បាប់ ដូច្នេះអាចកាត់បន្ថយនូវភាពអសកម្មបាន»។
លោកបន្តអះអាងថាដើម្បីធ្វើឲ្យប្រព័ន្ធយុត្តិធម៌នៅតុលាការកាន់តែល្អប្រសើរ ប្រទេសត្រូវការច្បាប់ល្អ ដូច្នេះនៅអាណត្តិក្រោយនេះគណៈមេធាវីនឹងបន្តយកចិត្តទុកដាក់ ហើយដាក់សំណើទៅក្រសួងយុត្តិធម៌ដើម្បីពិភាក្សាជាមួយគ្នា ដើម្បីកែច្បាប់មួយចំនួន និងព្យាយាមលុបបំបាត់អ្នករត់ការ ឬមេធាវីក្លែងក្លាយដើម្បីផ្តល់អំណាចបន្ថែមដល់មេធាវីដើម្បីងាយស្រួលក្នុងការការពារក្តី និងផ្តល់ភាពយុត្តិធម៌ដល់កូនក្តី។
លោក វិសាល ក៏បានថ្លែងដោយបានបដិសេធផងដែរនូវដំណឹងចចាមអារ៉ាមទាក់ទងពីបញ្ហាពុករលួយក្នុងការផ្ដល់ និងទទួលសំណូកប្រមាណជា ២ ម៉ឺនដុល្លារសហរដ្ឋអាមេរិក ដើម្បីបានចូលធ្វើជាមេធាវី ហើយគណៈមេធាវីតែងតែលើកទឹកចិត្តឲ្យប្រជាពលរដ្ឋ និងអ្នកដែលរងគ្រោះមកដាក់ពាក្យបណ្តឹងដើម្បីចាត់វិធានការទៅតាមផ្លូវច្បាប់ចំពោះការចោទប្រកាន់នានាចាប់តាំងពីពេលដែលគណៈមេធាវីត្រូវបានបង្កើតឡើង។
ខណៈលោក សំ សុគង់ ស្ថិតក្នុងវ័យ ៤១ ឆ្នាំបានធ្វើជាមេធាវីអស់រយៈពេល ១៥ ឆ្នាំហើយ ហើយបានចាប់ផ្តើមការពារក្តីឲ្យសកម្មជន និងអ្នកនយោបាយខាងគណបក្សប្រឆាំងចាប់តាំងពីក្រោយការបោះឆ្នោតឆ្នាំ ២០១៣ មកនោះ លោកបានថ្លែងប្រាប់កាសែតភ្នំពេញប៉ុស្តិ៍ថា នៅពេលដែលជាប់ឆ្នោតលោកនឹងធ្វើការងារជាមួយក្រុមគណៈមេធាវីថ្មីចំនួន ៣៣ រូបកែទម្រង់ហើយនឹងដាក់ពិន័យចំពោះមេធាវីដែលដើរតួនាទីអន្តរការី ឬក៏អ្នករត់ការដែលសូកប៉ាន់ទៅតុលាការ។
លោក សុគង់ ថ្លែងថា៖ «យើងនឹងធ្វើការដាក់ពិន័យទៅតាមច្បាប់លក្ខន្តិកៈក៏ដូចជាសេចក្តីសម្រេចរបស់គណៈមេធាវី ហើយប្រសិនបើសមាជិក សមាជិកាណាមួយគាត់ប្រព្រឹត្តនូវអំពើពុករលួយ ឬដើរតួជាអន្តរការី យើងមានយន្តការក្នុងការប្តឹងទៅស្ថាប័នជាតិដែលមានសមត្ថកិច្ចដើម្បីចាត់វិធានការទៅលើមេធាវីដែលបានប្រព្រឹត្តអំពើពុករលួយនោះ»។
លោក សុគង់ ថ្លែងថានៅពេលដែលលោកជាប់ជាប្រធានគណៈមេធាវីលោកនឹងជួបក្រុមប្រឹក្សាមេធាវី ដើម្បីធ្វើវិសោធនកម្មលក្ខន្តិកៈ គណៈមេធាវីឲ្យកាន់តែល្អប្រសើរដើម្បីធ្វើឲ្យមេធាវីប្រកបការងារឲ្យកាន់តែល្អ។
លោកបានបញ្ជាក់ថា៖ «នៅពេលដែលខ្ញុំជាប់ឆ្នោត ខ្ញុំនឹងដឹកនាំគណៈមេធាវីដោយតម្លាភាព គណនេយ្យភាព និងភាពស្អាតស្អំ។ យើងនឹងធ្វើការពិនិត្យ និងស៊ើបអង្កេតឲ្យបានល្អិតល្អន់ស្របទៅតាមច្បាប់លក្ខន្តិកៈមេធាវី ហើយគណៈមេធាវីធានាការប្រឡងប្រព្រឹត្តទៅដោយសុក្រឹត ស្អាតស្អំ និងតម្លាភាព»។
ខណៈលោក សួន វិសាល បានថ្លែងថាលោកពិតជាបានសុំការគាំទ្រពីលោកនាយករដ្ឋមន្ត្រី ហ៊ុន សែន ដោយសារលោកក៏ជាសមាជិកគណៈមេធាវី ១ រូប ហើយក៏បានសុំការគាំទ្រពីមេធាវីផ្សេងៗទាំងអស់ដើម្បីឲ្យទទួលបានជោគជ័យ និងបន្តជាប្រធានគណៈមេធាវី ហើយលោកនាយករដ្ឋមន្ត្រីបានលើកទឹកចិត្តឲ្យគណៈមេធាវីជួយជំរុញឲ្យមានមេធាវីទៅតាមខេត្តឲ្យបានកាន់តែច្រើន។
លោកថ្លែងថា៖ «ពេលដែលខ្ញុំឈរឈ្មោះជាប្រធានគណៈមេធាវី ខ្ញុំចង់ជាប់ហើយ ដើម្បីបំពេញគោលបំណង ខ្ញុំដើរសុំការគាំទ្រទាំងអស់ខ្ញុំមិនអាចប្រាប់យុទ្ធសាស្ត្របានទេ ធម្មតាការប្រកួតប្រជែងរឿងបោះឆ្នោត។ ឲ្យតែយុទ្ធសាស្ត្រនោះស្របច្បាប់ យើងធ្វើហើយមិនមានបញ្ហាអីទេ ហើយយុទ្ធសាស្ត្រនោះយើងមិនអាចឲ្យគេដឹងបានដែរ។ យើងព្យាយាមជំរុញឲ្យមេធាវីទៅតាមខេត្តឲ្យបានច្រើន»។
ចំណែកលោក សំ សុគង់ បានថ្លែងផងដែរថាការឃោសនាតាមរយៈការប្រើប្រាស់សមត្ថភាព និងបទពិសោធ តែមិនប្រើប្រាស់ការឃោសនាបែបប្រជាភិថុតិហើយឃោសនាប្រកួតប្រជែងតាមបែបលក្ខណៈប្រជាធិបតេយ្យ។
លោកថ្លែងថា៖ «ខ្ញុំមិនចង់ប្រើប្រាស់ការឃោសនាតាមរយៈការទិញទឹកចិត្ត ការជប់លៀង ឬការបង្ខិតបង្ខំផ្សេងៗ។ ខ្ញុំធ្វើឃោសនាប្រកួតប្រជែងតាមបែបលក្ខណៈប្រជាធិបតេយ្យ និងតាមរយៈការដាក់ចេញគោលការណ៍សំខាន់ៗទៅកាន់សមាជិក សមាជិកាដើម្បីឲ្យគាត់ពិនិត្យ និងធ្វើការសម្រេចចិត្ត»។
លោក សួន វិសាល បានថ្លែងថាមានមេធាវី ២ រូបត្រូវបានដាក់ពិន័យទាំងការព្រមានផ្ទាល់មាត់ និងជាលាយលក្ខណ៍អក្សរ ហើយគណៈមេធាវីក៏បានទទួលពាក្យបណ្តឹងច្រើនទាក់ទងនឹងការទទួលលុយពីកូនក្តីហើយមិនការពារកូនក្ដី ហើយគណៈមេធាវីក៏កំពុងស៊ើបអង្កេតករណីមួយចំនួនផ្សេងទៀត។ រដ្ឋាភិបាលនឹងបង្កើតថវិកាមួយចំនួនសម្រាប់ការពារក្តីដល់ជនក្រីក្រ និងរកមូលនិធិពីខាងក្រៅដើម្បីជួយការពារក្តីដល់ជនក្រីក្រ និងគោលការណ៍ស្ម័គ្រចិត្តរបស់មេធាវី ហើយលោកនឹងផ្តល់រង្វាន់ដល់មេធាវីណាដែលការពារក្តីបានច្រើនហើយនឹងឈ្នះសម្រាប់ជនក្រីក្រដែលមានប្រមាណ ៣០ ភាគរយ៕
