.jpg)
ពិធីសម្ពោធកញ្ចប់ដំណើរកម្សាន្តថ្មីទៅកាន់ប្រទេស តួកគី កាលពីថ្ងៃទី ១៥ កុម្ភៈ។
ក្រុមហ៊ុន Europe Travel Expert (ETE) Cambodia កំពុងផ្តល់នូវកញ្ចប់ដំណើរកម្សាន្តថ្មីសម្រាប់អតិថិជនកម្ពុជាទៅកាន់ប្រទេសតួកគីជាប្រទេសដែលសម្បូរដោយតំបន់ទេសចរណ៍ ប្រវត្តិសាស្ត្រដ៏ល្បីល្បាញ។
ប្រទេសតួកគីដែលមានទីតាំងស្ថិតនៅចន្លោះទ្វីបអាស៊ី និងអឺរ៉ុបមានតំបន់ទាក់ទាញភ្ញៀវទេសចរដ៏សម្បូរបែប និងស្រស់ស្អាតជាច្រើនកន្លែង ដែលអាចទាក់ទាញភ្ញៀវទេសចរកម្ពុជាឲ្យទៅកម្សាន្តបានគ្រប់ពេលវេលា ដោយទីតាំងទាំងនោះមានដូចជាប្រាសាទ ruins of Troy , Pergamum, តំបន់ទេសចរណ៍ Ephesus, ផ្ទះ Virgin Mary, តំបន់ Cappadocia, ប្រាសាទ Anitkabir, ព្រះវិហារពណ៌ខៀវ Blue Mosque ព្រះរាជវាំង Topkapi (ត្រូវបានទទួលស្គាល់ដោយអង្គការយូណេស្កូជាបេតិកភណ្ឌពិភពលោក) និងការដើរទិញទំនិញនៅផ្សារ Grand Bazaar មានអាយុកាល ៥០០ ឆ្នាំ។
ធ្វើដំណើរតាមយន្តហោះពីរាជធានីភ្នំពេញទៅទីក្រុងអ៊ីស្តង់ប៊ុល ប្រទេសតួកគីមានរយៈពេលប្រហែល ១១ ម៉ោង។
«យើងត្រូវបង្កើតអ្វីដែលសមស្របនឹងមនុស្សជំនាន់ថ្មី។ គោលដៅរបស់យើងគឺផ្តោតលើអ្នកដំណើរវ័យក្មេង ពីព្រោះពួកគេអាចនិយាយភាសាអង់គ្លេសបានខ្លះ ពួកគេជាអ្នកដែលសកម្មនៅលើបណ្តាញសង្គម ដូច្នេះប្រទេសកម្ពុជាគឺជាទីផ្សារដ៏មានសក្តានុពល»។
លោក Conrad Wee ប្រធានក្រុមហ៊ុន Europe Tour Expert Cambodia បានឲ្យភ្នំពេញប៉ុស្តិ៍ដឹងថា៖ «ភ្ញៀវទេសចរបច្ចុប្បន្នមានវ័យកាន់តែក្មេងនេះជានិន្នាការនៅទូទាំងទ្វីបអាស៊ី ហើយប្រព័ន្ធផ្សព្វផ្សាយសង្គមជួយពួកគេឲ្យស្គាល់កន្លែងជាច្រើន ប្រព័ន្ធផ្សព្វផ្សាយសង្គម និងជំរុញទេសចរវ័យក្មេងឲ្យធ្វើដំណើរកម្សាន្តកាន់តែច្រើន»។
ក្រុមហ៊ុន ETE Cambodia បានរៀបចំសិក្ខាសាលារយៈពេលកន្លះថ្ងៃក្នុងទីក្រុងភ្នំពេញកាលពីថ្ងៃទី ១៥ ខែកុម្ភៈ ដើម្បីផ្សព្វផ្សាយតំបន់ទេសចរណ៍ល្បីល្បាញនានានៅប្រទេសតួកគីដែលមានការចូលរួមពីភ្នាក់ងារទេសចរណ៍ជាច្រើនដូចជា ក្រុមហ៊ុន SKP Travel Co.,Ltd, Elite, Ann Leo, Hong Star Travel & Tours, Global Holiday Travel and Tour.,ltd, DLT Travel and Tours, RTR Tours Co., Ltd., H.I.S. (Cambodia) Travel Co., Ltd., STB Travel & Tours Co., Ltd., B2B Cambodia (Travel| Tours| Mice| More) Co., Ltd, Cina Travel Co. Ltd, និង May Flower Cambodia។ ហើយភោជនីយដ្ឋាន Le Petra Restaurant ផ្តល់ជូននូវអាហារតួកគីដ៏ឈ្ងុយឆ្ងាញ់។ លើសពីនេះទៀតក៏មានវត្តមានរបស់មន្ត្រីស្ថានទូតតួកគីនៅក្នុងរាជធានីភ្នំពេញចូលរួមផងដែរ។
យោងតាមលោក Conrad បានឲ្យដឹងថាចាប់តាំងពីបង្កើតក្រុមហ៊ុន ETE Cambodia លោកឃើញមានការរីកចម្រើនជាលំដាប់នៅក្នុងអាជីវកម្មទេសចរណ៍ ខណៈប្រជាជនកម្ពុជាកាន់តែច្រើនមានលទ្ធភាពទិញកញ្ចប់ដំណើរកម្សាន្តដែលមានតម្លៃសមរម្យទៅកាន់អឺរ៉ុប។ ETE Cambodia មានបទពិសោធនៅក្នុងឧស្សាហកម្មទេសចរណ៍នេះអស់រយៈពេលជិត ៣០ ឆ្នាំមកហើយ។
លោកបន្ថែមថា៖ «យើងនាំយកបទពិសោធរបស់យើងមកប្រទេសកម្ពុជា។ ETE Cambodia មានមគ្គុទ្ទេសក៍ ម៉ាឡេស៊ីនៅអឺរ៉ុប ដូច្នេះពួកគេអាចផ្តល់នូវបដិសណ្ឋារកិច្ចរបស់អាស៊ីដល់អ្នកដំណើរ។ មគ្គុទេសក៍របស់យើងនៅអឺរ៉ុបសុទ្ធតែមានបទពិសោធច្រើនឆ្នាំ ហើយពួកគេនឹងនាំភ្ញៀវទេសចរកម្ពុជាពីកម្ពុជាទៅអឺរ៉ុប និងត្រឡប់មកកម្ពុជាវិញ ប្រកបដោយភាពកក់ក្តៅ»។
ក្រុមហ៊ុនផ្តល់កញ្ចប់តម្លៃពិសេសសម្រាប់ភ្ញៀវទេសចរកម្ពុជា ១០ នាក់ដំបូង សម្រាប់កញ្ចប់ដំណើរកម្សាន្តរយៈពេល ១០ ថ្ងៃ ៧ យប់ទៅកាន់ប្រទេសតួកគីក្នុងតម្លៃត្រឹមតែ ១១៩៩ ដុល្លារប៉ុណ្ណោះ ដោយចេញដំណើរនៅថ្ងៃទី ៩ និងទី ១១ ខែមេសា ឆ្នាំ ២០២០។
ប្រជាជនកម្ពុជាកាន់តែច្រើនធ្វើដំណើរកម្សាន្តទៅក្រៅប្រទេស ដោយសារតែសេដ្ឋកិច្ចមានស្ថិរភាព និងប្រាក់ចំណូលកាន់តែកើនឡើង។ កាលពីឆ្នាំមុន ការធ្វើដំណើរកម្សាន្តទៅក្រៅប្រទេសរបស់ប្រជាជនកម្ពុជាមានជាង ២ លាននាក់។
លោក Conrad ថ្លែងថា៖ «នៅឆ្នាំ ២០១៨ យើងទទួលទេសចរកម្ពុជាប្រមាណ ២០០ នាក់ហើយកាលពីឆ្នាំមុនទទួលទេសចរកម្ពុជាប្រមាណ ៥០០ នាក់ បានធ្វើដំណើរកម្សាន្តទៅអឺរ៉ុប។ ចំនួននៅតែបន្តកើនឡើង ដែលវាគឺជាសញ្ញាវិជ្ជមានមួយ។ ដូច្នេះយើងអាចនិយាយបានថាវាមានកំណើនជាង ២ ខ្ទង់»។
លោក Conrad បន្ថែមថា៖ «កម្ពុជាគឺជាទីផ្សារដែលមានសក្តានុពល ខណៈប្រជាជនថ្នាក់កណ្តាលកំពុងមានចំនួនកើនឡើង ហើយប្រជាជនវ័យក្មេងកំពុងមានទំនោរធ្វើដំណើរកម្សាន្តទៅកន្លែងផ្សេងៗកាន់តែច្រើន។ សម្រាប់ទិសដៅថ្មីរបស់យើងនេះ យើងកំណត់គោលដៅទទួលទេសចរកម្ពុជាចន្លោះពី ៥០០ ទៅ ១០០០ នាក់ក្នុង ១ ឆ្នាំ៕
