.jpg)
រថយន្តក្រុមហ៊ុនដែលជួបគ្រោះថ្នាក់ចរាចរណ៍នៅខេត្តកោះកុងកាលពីថ្ងៃ ២ ធ្នូ។ រូបថត សហការី
កោះកុងៈ ក្រុមហ៊ុនលក់ផលិតផលសាប៊ូ ដែលរថយន្តរបស់ក្រុមហ៊ុននេះបានជួបគ្រោះថ្នាក់ចរាចរណ៍នៅភូមិប្រលាន ឃុំកណ្ដោល ស្រុកបទុមសាគរ កាលពីថ្ងៃទី ២ ខែធ្នូ បានធានាចេញសំណងដល់គ្រួសារបុគ្គលិករបស់ក្រុមហ៊ុនចំនួន ៤ នាក់ ដែលបានស្លាប់ក្នុងហេតុការណ៍នេះ។
លោក សុខ ផន អធិការស្រុកបទុមសាគរឲ្យដឹងកាលពីម្សិលមិញថា ករណីគ្រោះថ្នាក់ចរាចរណ៍រថយន្តបុកគ្នានោះមានជនរងគ្រោះទី១- ឈ្មោះ សូ សំនាង ភេទប្រុស អាយុ ២៥ ឆ្នាំ មានទីលំនៅស្រុកកោះធំ ខេត្តកណ្តាល ។ ២- មាស វីរៈ ភេទប្រុស អាយុ ៣៤ ឆ្នាំ មានទីលំនៅខេត្តស្វាយរៀង។ ៣- ស៊ាង គ្រី ភេទប្រុស អាយុ ៣០ ឆ្នាំ មានទីលំនៅខេត្តកំពង់ចាម។ ៤- ប៊ូ ប៊ុនថន ភេទប្រុសអាយុ ៣០ ឆ្នាំ មានទីលំនៅស្រុកស៊ីធរកណ្តាល ខេត្តព្រៃវែង ដែលពួកគេជិះនៅបាំងមុខទាំងអស់។ ជនរងគ្រោះសុទ្ធតែជាបុគ្គលិករបស់ក្រុមហ៊ុនលក់ផលិតផលសាប៊ូ។
បុរសតំណាងក្រុមហ៊ុនស្នើសុំមិនឲ្យបញ្ចេញឈ្មោះក្រុមហ៊ុនទេ គ្រាន់តែប្រាប់ថា ខាងក្រុមហ៊ុននឹងដោះស្រាយចាត់ចែងសំណងជូនដល់គ្រួសាររួម និងការធ្វើបុណ្យជូនពួកគេផងដែរ។
លោកប្រាប់ថា៖ «តំណាងក្រុមហ៊ុនក្រោយកើតហេតុបានមកជួបខ្ញុំ និងប្រាប់ថា គេជួយចាត់ចែងធ្វើបុណ្យជូនជនរងគ្រោះ និងចេញសំណងដល់ពួកគេ។ ប៉ុន្តែគេមិនបញ្ជាក់ថា ចេញសងលុយប៉ុន្មានទេ»។
បុរសម្នាក់ទៀតដែលអះអាងថាជាតំណាងក្រុមហ៊ុនលក់ផលិតផលសាប៊ូ ដែលសុំមិនបញ្ចេញឈ្មោះបានប្រាប់តាមទូរស័ព្ទពីម្សិលមិញថា ចំពោះជនរងគ្រោះស្លាប់ទាំង ៤ នាក់ គឺខាងក្រុមហ៊ុនជាអ្នកទទួលខុសត្រូវ ប៉ុន្តែសោហុយដឹកជញ្ជូនខាងគ្រួសារសពនីមួយៗជួយចេញខ្លះ ព្រោះស្រុកកំណើតជនរងគ្រោះនៅខេត្តឆ្ងាយៗពីគ្នាតែការធ្វើបុណ្យជូនជនរងគ្រោះខាងក្រុមហ៊ុនជាអ្នករ៉ាប់រង។ តែលោកមិនអាចបញ្ជាក់ប្រាប់បានថា ក្នុងសាកសពម្នាក់ នឹងត្រូវសងជំងឺចិត្តប៉ុន្មានទេ ព្រោះជាជំហានដំបូង គិតគូរចាត់ចែងធ្វើបុណ្យជូនសពសិន។ «ការគ្រប់គ្រងទទួលខុសត្រូវ ការសងជំងឺចិត្តអីនោះគឺយើងធានារ៉ាប់រងចេញដល់គ្រួសារសពទាំងអស់»។
លោក កែវ គីណ្ណារ៉ា នាយផ្នែកសណ្តាប់ធ្នាប់នៃអធិការដ្ឋាននគរបាលស្រុកបទុមសាគរឲ្យដឹងថា គ្រោះថ្នាក់នេះកើតឡើងនៅវេលាម៉ោង ២ និង ៣៤ នាទីរសៀលនាថ្ងៃទី ២ ខែវិច្ឆិកា ឆ្នាំ ២០១៩ លើកំណាត់ផ្លូវជាតិលេខ ៤៨ ។ លោកប្រាប់តាមសាក្សីនៅកន្លែងកើតហេតុថា មុនដំបូងគេឃើញរថយន្ត ១ គ្រឿង ម៉ាក FRONTIA ចំណុះ ១ តោនកន្លះ ពណ៌ស ពាក់ស្លាកលេខ ភ្នំពេញ ២AT-៦៤៣៩ ដឹកសាប៊ូបើកបរក្នុងទិសដៅពីផ្សារវាលរេញក្នុងស្រុកព្រៃនប់ ខេត្តព្រះសីហនុឆ្ពោះទៅខេត្តកោះកុង ហើយក៏បែកកង់មុខខាងឆ្វេង។ ពេលនោះគេឃើញរថយន្តរេចង្កូតចូលចំណែកផ្លូវម្ខាងទៀត ហើយបានបុកចំពីមុខរថយន្តធុនធំ ១ គ្រឿងទៀតម៉ាក HYUNDAI ពណ៌ស ពាក់ស្លាកលេខ ព្រះសីហនុ ៣A-៤០០០ ដែលកំពុងបើកបរក្នុងទិសដៅផ្ទុយគ្នា ។
លោក គីណ្ណារ៉ា បន្តថាយោងតាមសាក្សីប្រាប់ថា ភាគីខាងរថយន្ត HYUNDAI មាន ២ នាក់ ពេលឃើញមនុស្សស្លាប់បែបនេះ ពួកគេបានរត់គេចខ្លួនបាត់ បន្សល់ទុកតែរថយន្តនៅកន្លែងកើតហេតុ។ ចំពោះនៅកន្លែងកើតហេតុសមត្ថកិច្ចជំនាញចរាចរណ៍ខេត្តកោះកុងបានធ្វើការវាស់វែងទៅឃើញថា ភាគីរថយន្តម៉ាក FRONTIA ជាអ្នកបង្កគ្រោះថ្នាក់ហើយវត្ថុតាងរថយន្តទាំង ២ គ្រឿង សមត្ថកិច្ចយកទៅរក្សាទុកនៅអធិការដ្ឋាននគរបាលស្រុកបទុមសាគរដើម្បីរង់ចាំភាគីទាំង ២ ចូលដោះស្រាយ៕
