ភ្នំពេញៈ ខណៈលោកនាយករដ្ឋមន្ត្រីកំពុងបំពេញទស្សនកិច្ចនៅអង្គការសហប្រជាជាតិ ការប្រមូលផ្តុំគ្នាគាំទ្រ និងប្រឆាំងលោកបានផ្ទុះឡើងដូចការគ្រោងទុកចាប់តាំងពីថ្ងៃសុក្ររហូតដល់ថ្ងៃម្សិលមិញ ស្របពេលដែលមេដឹកនាំនៃក្រុមម្ខាងៗបន្តរិះគន់គ្នាទៅវិញទៅមក ថ្វីបើមិនមានវត្តមានលោក សម រង្ស៊ី ដឹកនាំបាតុកម្មដូចការគ្រោងទុកក្ដី។
មុនការទៅដល់របស់លោក ហ៊ុន សែន លើទឹកដីអាមេរិក អ្នកនាំពាក្យរដ្ឋាភិបាលរំពឹងថានឹងមានអ្នកគាំទ្រគណបក្សប្រជាជនរាប់ពាន់នាក់ ខណៈលោក ហ៊ុន សែន បានថ្លែងក្នុងមហាសន្និបាតអង្គការសហប្រជាជាតិកាលពីថ្ងៃសុក្រ និងបន្តជួបអ្នកគាំទ្រលោកនៅថ្ងៃបន្តបន្ទាប់។
លោក សម រង្ស៊ី អតីតមេបក្សប្រឆាំងដែលពីដំបូងថានឹងដឹកនាំបាតុកម្មផ្ទាល់បានលុបចោលគម្រោងវិញដោយអះអាងថាមានភារកិច្ចនៅកន្លែងផ្សេង។
ប៉ុន្តែលោក អេង ឆៃអ៊ាង អតីតអនុប្រធានគណបក្សសង្គ្រោះជាតិបានដឹកនាំបាតុកម្មជំនួស។
តាមវីដេអូផ្សាយបន្តផ្ទាល់ពីទីលានអង្គការសហប្រជាជាតិគេឃើញទាំងអ្នកគាំទ្រភាគីម្ខាងៗ កាន់បដា និងខ្លះកាន់មេក្រូស្រែកគាំទ្រ និងប្រឆាំងវត្តមានលោក ហ៊ុន សែន។
លោក ចាន់ ស៊ីធន់ ដែលមកគាំទ្រលោក ហ៊ុន សែន ថ្លែងថាលោកគាំទ្រការដឹកនាំរបស់រដ្ឋាភិបាលដើម្បីសន្តិភាព និងការអភិវឌ្ឍ។
លោកថា៖ «សម្រាប់ទស្សនៈបងប្អូនយើងនៅអាមេរិកគឺគាំទ្រនូវឧត្តមគតិរបស់សម្ដេច (ហ៊ុន សែន) គាំទ្រការធ្វើការរបស់រដ្ឋាភិបាល ពិសេសដើរតាមមាគ៌ាដ៏ល្អរុងរឿងដើម្បីសន្តិភាព ស្ថិរភាពនយោបាយឆ្ពោះទៅរកការអភិវឌ្ឍនាពេលខាងមុខ»។
ផ្ទុយពីនេះអ្នកគាំទ្របក្សប្រឆាំងបានស្រែកដូចៗគ្នាថា «ជនផ្តាច់ការ» ដែលសំដៅដល់លោកនាយករដ្ឋមន្ត្រី ហ៊ុន សែន ហើយបន្តរិះគន់រដ្ឋាភិបាលកម្ពុជា ចំពោះការរំលាយបក្សប្រឆាំង ការចាប់លោក កឹម សុខា និងទាមទារឲ្យរដ្ឋាភិបាលគោរពកិច្ចព្រមព្រៀងសន្តិភាពទីក្រុងប៉ារីសឆ្នាំ ១៩៩១។
អ្នកគាំទ្រ អតីតបក្សប្រឆាំងដែលក្នុងវីដេអូបន្តផ្ទាល់នៅលើហ្វេសប៊ុកពីមុខស្នាក់ការ UN ថា៖ «លោក ហ៊ុន សែន ត្រូវគោរពសិទ្ធិមនុស្ស ត្រូវតែគោរពកិច្ចព្រមព្រៀងសន្តិភាពទីក្រុងប៉ារីស...»។
ជាមួយគ្នានេះក្នុងពិធីជួបជាមួយពលរដ្ឋខ្មែរ-អាមេរិកាំងរស់នៅក្នុងសហរដ្ឋអាមេរិក និងកាណាដានៅបុរីញូវយ៉កកាលពីម្សិលមិញ លោកនាយករដ្ឋមន្ត្រី ហ៊ុន សែន បានអរគុណពលរដ្ឋខ្មែរនៅបរទេសដែលបន្តគាំទ្ររូបលោក។
លោកថ្លែងថា៖ «បងប្អូនមានបំណងមកជួបខ្ញុំដើម្បីផ្តល់ការគាំទ្រទាំងឡាយចំពោះគណបក្សប្រជាជនចំពោះរាជរដ្ឋាភិបាល និងចំពោះខ្លួនខ្ញុំផ្ទាល់»។ លោកអះអាងថាអ្នកគាំទ្រគណបក្សប្រជាជនមានគ្នារាប់ពាន់នាក់។
ទោះយ៉ាងណាលោក ហ៊ុន សែន បានឆ្លៀតដៀមដាមដល់គូប្រជែងនយោបាយរបស់លោកគឺអតីតថ្នាក់ដឹកនាំអតីតគណបក្សប្រឆាំងនឹងដឹកនាំបាតុកម្មប្រឆាំងរូបលោកដោយបានចំអកថាមានគ្នាមិនដល់ ៥០ នាក់ចូលរួមតវ៉ា។
លោកថ្លែងថា៖ «អ្នកមកធ្វើបាតុកម្មនៅទីនោះតាំងខ្លួនជាមហាបាតុកម្ម ខ្ញុំហួសចិត្តដែរ នៅពេលដែលឃើញបាតុកម្មប្រភេទនេះ កាឡេះខេះ...តាមខ្ញុំក្ដាប់បានអ្នកដែលមកចូលរួមប្រឆាំង ហ៊ុន សែន នៅញូវយ៉កដំបូងតែ ៣០ នាក់ទេ ក្រោយមកឡើងដល់ ៥០ នាក់»។
លោកបន្តថា៖ «រឿងសំខាន់គឺជាមិនចង់ឲ្យខ្ញុំមកជាន់ដីអាមេរិក ដូច្នេះគេបំផុសរឿងនេះ រឿងនោះ...តាំងពីមហាបាតុកម្ម អូ មហាបាតុកម្ម មានមនុស្សប៉ុណ្ណឹង មហាបាតុកម្មឬ? យើងមានមនុស្សប៉ុន្មាននាក់ ហើយគេមានមនុស្សប៉ុន្មាននាក់? បានជាខ្ញុំតែងតែនិយាយថា អ្នកដែលធ្វើបាតុកម្ម (ប្រឆាំង) ខ្ញុំ មិនលើសពី ១០ ភាគរយនៃអ្នកដែលទទួលខ្ញុំទេ»។
ទន្ទឹមនឹងនេះលោក ហ៊ុន សែន ក៏បានបដិសេធដែរថា អ្នកមកគាំទ្រលោកនៅបុរីញូវយ៉ក មិនត្រូវបានគេជួល ឬទទួលបានលាភសក្ការៈអ្វីទេ។
លោកថា៖ «ថ្ងៃនេះយើងរកកន្លែងដាក់អត់គ្រប់ទៀត តែមិនអីទេ ល្ងាចខ្ញុំ ហ្វ្រី selfie។ បងប្អូនមានបំណងមកជួបខ្ញុំដើម្បីផ្តល់ការគាំទ្រទាំងឡាយចំពោះគណបក្សប្រជាជនចំពោះរាជរដ្ឋាភិបាល និងចំពោះខ្លួនខ្ញុំដែលបានធ្វើកិច្ចការបើយោងទៅលើអ្វីដែលគេគំរាមរហូតគេថា បើសិនជាហ៊ានគេដកសញ្ជាតិ»។
ចំពោះលោក សម រង្ស៊ី បើទោះបីជាមិនបានចូលរួមដឹកនាំបាតុកម្មដោយផ្ទាល់ក្ដី ប៉ុន្តែប្រធានចលនាសង្គ្រោះជាតិរូបនេះបានបន្តផ្ទាល់វីដេអូជាមួយអ្នកឈរតវ៉ាប្រឆាំងលោក ហ៊ុន សែន កាលពីថ្ងៃសៅរ៍ដោយថ្លែងថាលោកគាំទ្រសកម្មភាពតវ៉ាទាំងអស់នេះ។
តាមវីដេអូដែលត្រូវបានបង្ហោះនៅលើទំព័រហ្វេសប៊ុករបស់លោកនោះលោក សម រង្ស៊ី បានថ្លែងថា៖ «យើងមកជួបជុំគ្នានៅពេលនេះនៅមុខអង្គការសហប្រជាជាតិគឺសុំអង្គការសហប្រជាជាតិ និងប្រទេសជាមិត្តសូមកុំទទួលស្គាល់រដ្ឋាភិបាលខុសច្បាប់ដែលដឹកនាំដោយ ហ៊ុន សែន ជាជនផ្តាច់ការ ហើយជាជនក្បត់ជាតិ»។
លោក សម រង្ស៊ី ដែលថាកំពុងចូលរួមកិច្ចប្រជុំរបស់បណ្ដាគណបក្សសេរីនិយមក្នុងពិភពលោកនៅប្រទេសអាហ្វ្រិកខាងត្បូងនោះបានបន្តសុំទោសអ្នកគាំទ្រលោកសាជាថ្មីចំពោះការខកខានចូលរួមនេះដោយអះអាងថាលោក «ចូលរួមតាមផ្លូវចិត្ត»។
លោកបញ្ជាក់ថា៖ «សូមបងប្អូនបន្តលើកបដាស្រែក ជយឃោស ពាក្យស្លោក ដើម្បីឲ្យឃើញថា យើងស្រុះគ្នាយើងរួបរួមគ្នាយើងមូលមតិគ្នាដើម្បីបង្ហាញឆន្ទៈដល់ប្រជារាស្ត្រនៅស្រុកខ្មែរដែលគ្នាគ្មានសិទ្ធិសេរីភាពនិយាយមានការគាបសង្កត់ មានការរករឿងគំរាមកំហែង តែយើងនៅសហរដ្ឋអាមេរិកនៅកាណាដា យើងអត់មានរឿងអីខ្លាច ហ៊ុន សែន ទេ យើងអត់មានរឿងអីចុះញ៉មទេ ផ្ទុយទៅវិញយើងទាមទារដាច់ខាតឱ្យដោះលែងលោក កឹម សុខា ជាបន្ទាន់ និងគ្មានលក្ខខណ្ឌ ហើយយើងទាមទារឲ្យគណបក្សសង្គ្រោះជាតិមានសិទ្ធិដំណើរការឡើងវិញ»៕