.jpg)
លោក លឹម គានហោ រដ្ឋមន្រ្តីក្រសួងធនធានទឹក ថ្លែងកាលពីម្សិលមិញ។ ហេង ជីវ័ន
ភ្នំពេញៈ ទឹកជំនន់ទឹកភ្លៀងរយៈពេលខ្លីចាប់ពីដើមខែសីហានេះ បានធ្វើឲ្យប៉ះពាល់ដល់ខេត្ដចំនួន ៨ ក្នុងប្រទេស កម្ពុជា ក្នុងនោះពលរដ្ឋប្រមាណជិត ៨ ០០០ គ្រួសារ រងផលប៉ះពាល់ រួមទាំងដំណាំស្រូវ និងដំណាំរួមផ្សំជិត ៨ ០០០ ហិកតាផងដែរ។
លោក កែវ វី អ្នកនាំពាក្យគណៈកម្មាធិការជាតិគ្រប់គ្រងគ្រោះមហន្តរាយថ្លែងក្នុងសន្និសីទសារព័ត៌មានស្ដីពី «បច្ចុប្បន្នភាពគ្រោះទឹកជំនន់» នៅទីស្ដីការគណៈរដ្ឋមន្រ្ដីកាលពីម្សិលមិញថា មូលហេតុចម្បងដែលបង្កឲ្យមានបញ្ហាគ្រោះទឹកជំនន់ទឹកភ្លៀង និងគ្រោះរាំងស្ងួតនៅកម្ពុជាក្នុងពេលថ្មីនេះ គឺបណ្ដាលមកពីបញ្ហាអាកាសធាតុ ឥទ្ធិពលសម្ពាធទាប ខ្យល់មូសុងនិរតីធ្វើឲ្យមានខ្យល់ និងភ្លៀងខ្លាំង។
លោកថ្លែងថា កត្ដាបញ្ហាអាកាសធាតុនេះបង្កឲ្យមានគ្រោះទឹកជំនន់ជន់លិចបណ្ដាខេត្ដមួយចំនួនក្នុងប្រទេស កម្ពុជា ដែលបង្កឱ្យប៉ះពាល់ដល់ពលរដ្ឋ ដំណាំដាំដុះ ផ្ទះសំបែងជាដើម ក្នុងនោះមានខេត្ដព្រះសីហនុ កំពត កោះកុង កែប រតនគិរី មណ្ឌលគិរី បាត់ដំបង និងខេត្ដកំពង់ធំ។ ក្នុងចំណោមនោះ ខេត្ដព្រះសីហនុ កំពត និងខេត្ដរតនគិរី រងគ្រោះធ្ងន់ធ្ងរជាងគេដល់ផ្ទះសំបែង និងស្រែចម្ការ។
លោក កែវ វី បញ្ជាក់ថា ទិន្នន័យប៉ះពាល់ និងខូចខាតសរុបពីគ្រោះទឹកជំនន់ទឹកភ្លៀងក្នុងខេត្ដទាំង ៨ ខាងលើ ប្រជាជនរងគ្រោះ និងប៉ះពាល់សរុប ៧ ៩៩៩ គ្រួសារ ផ្ទះប៉ះពាល់ចំនួន ៦ ៨៩៨ ខ្នង សត្វពាហនៈប៉ះពាល់ចំនួន ៥ ៤៤៧ ក្បាល ដំណាំស្រូវ និងដំណាំរួមផ្សំប៉ះពាល់ចំនួន ៨ ០០០ ហិកតា ខូចខាត ៣០០ ហិកតា។
អ្នកនាំពាក្យរូបនេះថ្លែងថា៖ «បញ្ហាអាកាសធាតុនេះបានធ្វើឲ្យប្រទេស កម្ពុជា ប្រឈមនឹងការរាំងស្ងួត ២-៣ លើកក្នុងឆ្នាំនេះ។ បន្ទាប់ពីព្យុះទី៧ បានរលាយបាត់ទៅ ក៏កើតមានបាតុភូតព្យុះចំនួន ៣ កើតឡើងព្រមៗគ្នា ទើបធ្វើឲ្យមានឥទ្ធិពលខ្យល់ និងភ្លៀងប៉ះពាល់ដល់កម្ពុជាតាមតំបន់មាត់សមុទ្រ និងតំបន់ព្រំដែនកម្ពុជា-វៀតណាម»។
លោក កែវ វី បញ្ជាក់ថា៖ «ប៉ុន្តែរហូតមកដល់ពេលនេះ ស្ថានភាពអាកាសធាតុមកដល់ពេលនេះ គឺវាបានធូរស្រាលហើយ។ បញ្ហាជំនន់ទឹកភ្លៀងនៅតាមមូលដ្ឋានតាមបណ្ដាខេត្ដក៏មានការធូរស្រាលឡើងវិញដែរ។ ពលរដ្ឋបានវិលត្រឡប់ទៅកាន់លំនៅឋានវិញអស់ហើយ»។
លោក ឃាង ភារម្យ អ្នកនាំពាក្យរដ្ឋបាលសាលាខេត្ដព្រះសីហនុថ្លែងពីម្សិលមិញថា គ្រោះទឹកជំនន់ទឹកភ្លៀងរយៈពេលខ្លីចាប់ពីដើមខែសីហារហូតមកនេះ បានបង្កផលប៉ះពាល់ដល់សង្កាត់ ទាំង ៤ នៃក្រុងព្រះសីហនុ និងស្រុកព្រៃនប់។ ក្នុងនោះពលរដ្ឋរងផលប៉ះពាល់ចំនួន ១ ៧៣៦ គ្រួសារ ផ្ទះចំនួន ៩៣៧ ខ្នង និងសម្ភារ រថយន្ត ម៉ូតូ ម៉ាស៊ីនភ្លើង និងគ្រឿងអេឡិចត្រូនិករាប់រយគ្រឿងផ្សេងទៀត។
លោកថ្លែងថា៖ «មកដល់ល្ងាចនេះភ្លៀងកំពុងបន្ដធ្លាក់ ពេលនេះយើងកំពុងតាមដាន មិនទាន់ដឹងថាអាចនឹងមានបញ្ហាជន់លិចកើតឡើងថែមទៀត ឬយ៉ាងណាទេ»។
ទាក់ទងគ្រោះទឹកជំនន់ទឹកភ្លៀងនេះ លោក លឹម គានហោ រដ្ឋមន្រ្តីក្រសួងធនធានទឹក និងឧតុនិយម ក្នុងសន្និសីទនេះដែរ បានស្នើដល់បណ្ដាញប្រព័ន្ធ ផ្សព្វផ្សាយបន្តសហការផ្សព្វផ្សាយពីបញ្ហាគ្រោះទឹកជំនន់ និងគ្រោះរាំងស្ងួត ដោយផ្ដិតយកតថភាពបច្ចុប្បន្នភាពចៀសវាងការបំប៉ោងព័ត៌មានមិនពិត។
លោកថ្លែងថា៖ «ខ្ញុំសំណូមពរកុំយកបញ្ហាបច្ចេកទេសនេះទៅបំភ្លៃទៅវាយប្រហារ ឬធ្វើអាជីវកម្មជារឿងនយោបាយទៅវិញ វាមិនមានលក្ខណៈល្អប្រសើរទេ»។
លោករដ្ឋមន្រ្ដីបានបញ្ជាក់ថា៖ «ជំនន់នៅក្នុងប្រទេស កម្ពុជា មាន ២ គឺជំនន់ទឹកភ្លៀង និងជំនន់ទឹកទន្លេមេគង្គ។ ប៉ុន្ដែឥឡូវជំនន់ទន្លេមេគង្គនៅមិនទាន់ជន់ឡើងទេ។ មូលហេតុបង្កឲ្យមានជំនន់ទឹកភ្លៀងមកពីទីតាំងដែលទទួលទឹកភ្លៀងនោះមិនសមតុល្យ ទៅនឹងបរិមាណទឹកភ្លៀងដែលធ្លាក់មកទើបធ្វើឲ្យមានការជន់លិច ដែលកន្លែងនោះមិនអាចទទួលយកចំនួនទឹកភ្លៀងនោះបាន»។
លោក ផៃ ស៊ីផាន អ្នកនាំពាក្យរាជរដ្ឋាភិបាលបានបញ្ជាក់ថា បញ្ហាគ្រោះទឹកជំនន់ និងគ្រោះរាំងស្ងួតកើតឡើងក្នុងពេលតែមួយតាមបណ្ដាខេត្ដមួយចំនួននៅកម្ពុជាក្នុងឆ្នាំ ២០១៩ នេះ ជាដំណោះស្រាយបច្ចេកទេសក្នុងការទាញទឹកពីកន្លែងជន់លិចយក ទៅប្រើប្រាស់នៅតំបន់រាំងស្ងួត ហើយថានឹងលើកយកទៅពិភាក្សាបញ្ហានេះជាមួយក្រសួងពាក់ព័ន្ធ។
គួរបញ្ជាក់ថា ស្ថានភាពអាកាសធាតុនៅកម្ពុជាក្នុងឆ្នាំ ២០១៩ នេះ បានបង្កឲ្យមានគ្រោះ រាំងស្ងួតនៅតាមបណ្ដាខេត្ដមួយចំនួនក្នុងភាគពាយព្យ និងបង្កគ្រោះទឹកជំនន់តាមបណ្ដាខេត្ដជាប់សមុទ្រ និងខេត្ដជាប់ព្រំដែនវៀតណាមធ្វើឲ្យស្រូវជាច្រើនម៉ឺនហិកតារងផលប៉ះពាល់ និងខូចខាត និងមនុស្សចំនួន ៤ នាក់បានស្លាប់ ព្រោះគ្រោះទឹកជំនន់៕
