ភ្នំពេញៈ លោក គង់ គាំ អតីតប្រធានគណបក្ស សម រង្ស៊ី កាលពីម្សិលមិញ បានវាយប្រហារចំពោះគម្រោងវិលត្រឡប់មកកម្ពុជាវិញរបស់លោក សម រង្ស៊ី ដោយលោកបានប្រដូចក្រុមលោក សម រង្ស៊ី «អំបិលមួយដៃ» ដែលរលាយក្រៅ «ទឹកឃ្មុំមួយធុង» ដែលមិនអាចមករំខានដល់ពិធីបុណ្យជាតិនោះទេ។
លោក គង់ គាំ ដែលធ្លាប់នៅក្នុងអតីតបក្ស សម រង្ស៊ី និងអតីតបក្សសង្គ្រោះជាតិនោះបានសរសេរលើហ្វេសប៊ុករបស់លោកកាលពីម្សិលមិញថា៖ «អំបិលមួយដៃដែលរលាយក្រៅធុងទឹកឃ្មុំមិនអាចធ្វើឲ្យរសជាតិទឹកឃ្មុំខូចខាតយ៉ាងណាគឺផែនការវិលចូលកម្ពុជាថ្ងៃ ៩ វិច្ឆិកា របស់ក្រុម ៩ នាក់ ឬក្រុមម្រាមដៃ ៩ ក៏មិនអាចធ្វើឲ្យល្អក់តម្លៃ និងរំខានបរិយាកាស «ទិវាឯករាជ្យជាតិ ៩ វិច្ឆិកា» និងថ្ងៃបុណ្យអុំទូក អកអំបុក សំពះព្រះខែ ដែលប្រជាជាតិខ្មែរទាំងមូលមិនអនុញ្ញាតឲ្យក្រុមណាបំផ្លិចបំផ្លាញជាថ្មីបានម្តងទៀតនោះឡើយ»។
លោក គង់ គាំ បច្ចុប្បន្នជាប្រធានកិត្តិយសគណបក្សឆន្ទៈខ្មែរដែលបង្កើតឡើងដោយកូនប្រុសរបស់លោក។ លោកក៏បានរិះគន់អាមេរិកផងដែរ ដោយបានសរសេរថា៖ «ក្រុមដែលអះអាងថា ខ្លួនជាជើងឯកខាងប្រជាធិបតេយ្យ និងសិទ្ធិមនុស្សមានក្រុមលោកខាងលិច (អាមេរិក) ជាបង្អែកកំពុងពង្រីកផែនការ (២០១៣-២០១៩) ពីការប្រើកម្លាំងពលរដ្ឋគួបផ្សំជាមួយកម្លាំងប្រដាប់អាវុធ (ដែលគ្មានទេទ័ពរដ្ឋាភិបាលផ្តាច់ខ្លួន) ប៉ុន្តែអាចមានទ័ពស៊ីឈ្នួលគាំទ្រដោយក្រុមដែលចង់សម្លាប់ឆ្កែចោទថាឆ្កែឆ្កួត (ចោទកម្ពុជាថាមានមូលដ្ឋានទ័ពបរទេស)។ល។ ដើម្បីផ្លាស់ប្តូរផ្តួលរំលំព្រះរាជាណាចក្រកម្ពុជាទី ២ ដូចសម័យ លន់ នល់ សិរិមតៈ សាធារណរដ្ឋខ្មែរជាថ្មីម្តងទៀត»។
លោកថា៖ «ក្រុមអំបិលមួយដៃ (ក្រុម ៩ នាក់ ឬក្រុមម្រាមដៃ ៩) កំពុងរលាយដោយការបែកបាក់ ការចូលសារភាព ការបោះបង់ក្រុមគេយ៉ាងទូលំទូលាយ ជាពិសេសពួកគេមិនទទួលការអើពើ រវើរវាយអំពីការសង្គ្រោះប្រជាធិបតេយ្យ សិទ្ធិសេរីអ្វីដែលជាក់ស្តែងកំពុងនាំទុក្ខ នាំទោស និងនាំឆ្ពោះទៅរកភាពវឹកវរ...»។
លោក គង់ គាំ រិះគន់ការយកថ្ងៃ ៩ វិច្ឆិកា ដើម្បីវិលត្រឡប់របស់លោក សម រង្ស៊ី ដោយលោកថាជាការជ្រើសរើសដើម្បី «ធ្វើជាឱកាសបិទបាំងភាពតៃហោងដ៏អាម៉ាស់នៃសេរីភាព និងជីវិតនយោបាយរបស់ក្រុមមេក្រមី...»។
ភ្នំពេញប៉ុស្តិ៍មិនអាចទាក់ទងលោក គង់ គាំ ដើម្បីសុំការអត្ថាធិប្បាយបន្ថែមបានទេកាលពីម្សិលមិញ។
យ៉ាងណាក្ដីលោក សុខ ទូច ប្រធានរាជបណ្ឌិត្យសភាកម្ពុជាយល់ថា លោក សម រង្ស៊ី នឹងមិនវិលត្រឡប់មកទេ ប៉ុន្តែផែនការវិលត្រឡប់ថ្ងៃទី ៩ វិច្ឆិកា គឺធ្វើឲ្យទិវាឯករាជ្យជាតិ និងបុណ្យអុំទូកមិនមានបរិយាកាសរីករាយដោយសារប្រជាជនរាងចាលនឹងបទពិសោធដែលពួកគេធ្លាប់ជួបពីមុនមក។ រីឯ អាជីវករវិញក៏មិនសប្បាយចិត្តដែរ ព្រោះបើមានបញ្ហាអាចមានអ្នកឆក់យកឱកាស ដូចជា ដុតផ្ទះ លួចរបស់របរ ឬឆក់ប្លន់ជាដើម។
លោកថា៖ «តាមព្រំដែន រដ្ឋាភិបាលបានប្រកាសហើយគឺបង្កើនកម្លាំងកងទ័ព ការបង្កើននេះគឺឆ្លើយតបទៅលោក សម រង្ស៊ី ដែលអះអាងថាកងទ័ពបង្វែរកាណុងទៅរដ្ឋាភិបាល។ អ៊ីចឹងរដ្ឋាភិបាលចង់បង្ហាញថាកងទ័ពបង្វែរកាណុងទៅអ្នកណា? បើអត់មានសកម្មភាពទេបានន័យថា កងទ័ពគាំទ្រ សម រង្ស៊ី។ តែតាមពិតកងទ័ពបំពេញកាតព្វកិច្ចបម្រើប្រទេសជាតិ»។
លោកបន្តថាកាលណាមានចល័តកម្លាំងបែបនេះប្រជាជនក៏មានការភ័យខ្លាចដែរ ។ លោកថា បញ្ហានេះមិនមែនដូចអ្នកនយោបាយ (លោក គង់ គាំ) លើកឡើងទេ។
លោក ឡៅ ម៉ុងហៃ ថ្លែងថា លោកយល់មិនច្បាស់អ្វីដែលលោក គង់ គាំ ចង់និយាយទេ ប៉ុន្តែចំពោះថ្ងៃឯករាជ្យ ៩ វិច្ឆិកា រដ្ឋាភិបាលនឹងរៀបចំជាធម្មតាថែមទាំងធំជាងមុនទៀតផង ពីព្រោះពេលនេះរដ្ឋាភិបាលគ្រប់គ្រងសភាពការណ៍បានល្អហើយ៕