ភ្នំពេញ: គណៈកម្មាធិការជាតិរៀបចំការបោះឆ្នោត (គ.ជ.ប) កាលពីម្សិលមិញបានបង្ហាញចំនួន និងគុណភាពទឹកខ្មៅជ្រលក់ម្រាមដៃដែលបម្រើឲ្យការបោះឆ្នោតជ្រើសតាំងតំណាងរាស្ត្រនៅថ្ងៃទី ២៩ កក្កដាខាងមុខក្រោយពីបានចំណាយថវិកាចំនួន ៨០ ម៉ឺនដុល្លារទិញពីក្រុមហ៊ុនមួយរបស់ប្រទេសឥណ្ឌា។ យោងតាមលោក ហ៊ឺ រ៉ុង ប្រធាននាយកដ្ឋានប្រតិបត្តិការទទួលបន្ទុកបោះពុម្ពសន្លឹកឆ្នោតនៃ គ.ជ.ប។
ការបញ្ជាក់នេះបន្ទាប់ពីមានការរិះគន់ពីអតីតបក្សប្រឆាំង និងសង្គមស៊ីវិលមួយចំនួនដោយលើកឡើងថាទឹកខ្មៅជ្រលក់ដៃនេះអាចលុបជ្រះ ឬអាចបង្កឲ្យ ប៉ះពាល់ដល់សុខភាពអ្នកទៅបោះឆ្នោតផងដែរ។
ការបង្ហាញរបស់ គ.ជ.ប នេះធ្វើក្នុងកិច្ចប្រជុំជាមួយភាគីពាក់ព័ន្ធស្ដីពីដំណើរការប្រព្រឹត្តទៅនៃការឃោសនាបោះឆ្នោតជ្រើសតាំងតំណាងរាស្ត្រនីតិកាលទី ៦ ឆ្នាំ ២០១៨ ការពារសន្ដិសុខនៅតាមការិយាល័យបោះឆ្នោត និងរាប់សន្លឹកឆ្នោត និងការបង្ហាញពីគុណភាពទឹកខ្មៅជ្រលក់ម្រាមដៃលុបមិនជ្រះនៅទីស្នាក់ការ គ.ជ.ប។
លោក ហ៊ឺ រ៉ុង ប្រធាននាយកដ្ឋានប្រតិបត្តិការទទួលបន្ទុកបោះពុម្ពសន្លឹកឆ្នោតបានថ្លែងថា គ.ជ.ប បានបញ្ជាទិញទឹកខ្មៅជ្រលក់ដៃ មានចំនួន ៥១ ពាន់ដបពីក្រុមហ៊ុនឈ្មោះ MYSORE PAIMTS & VARNISH LTD. របស់ប្រទេសឥណ្ឌាដោយប្រើប្រាស់ថវិកាប្រមាណ ៨០ ម៉ឺនដុល្លារ ហើយត្រូវបានបញ្ជូនមកដល់ប្រទេសកម្ពុជាកាលពីថ្ងៃទី ៥ ខែកក្កដា។
លោកបញ្ជាក់ថា៖ «ទឹកខ្មៅទាំងនេះគឺសម្រាប់យើងប្រើនៅតាមការិយាល័យបោះឆ្នោតជាង ២ ម៉ឺនការិយាល័យនៅទូទាំងប្រទេសដោយក្នុង ១ ការិយាល័យតម្រូវឱ្យប្រើទឹកខ្មៅចំនួន ២ ដបសម្រាប់ជ្រលក់ម្រាមដៃអ្នកបោះឆ្នោតរួច»។
លោក ទេព នីថា អគ្គលេខាធិការ គ.ជ.ប បានអះអាងក្រោយពិនិត្យ និងពិសោធទឹកខ្មៅជ្រលក់ដៃថា ទឹកខ្មៅនេះមានគុណភាពល្អណាស់គឺដូចទឹកខ្មៅដែលបានប្រើសម្រាប់ការបោះឆ្នោតជ្រើសរើសក្រុមប្រឹក្សាឃុំ-សង្កាត់ នៅអាណត្តិទី ០៤ ដែរ។
លោកបញ្ជាក់ថា៖ «យើងបានសាកល្បងរួចហើយគឺសាកល្បងដូចកាលបោះឆ្នោតឃុំ-សង្កាត់ដែរ ហើយបានធានាថាគុណភាព (ទឹកខ្មៅ) នេះល្អ ហើយខ្ញុំសូមជម្រាបបន្ថែមថាបើយើងនៅខាងក្រៅកន្លែងបោះឆ្នោតគឺទឹកថ្នាំនេះរក្សាបាននូវគុណភាពដូចគ្នាក្នុងការបោះឆ្នោតក្រុមប្រឹក្សាឃុំ-សង្កាត់មានន័យថា យើងជ្រលក់វាភ្លាម វាក៏មិនទាន់ចេញពណ៌ភ្លាមដែរ បើយើងចេញទៅក្រៅ ឬត្រូវកម្ដៅថ្ងៃវានឹងចេញពណ៌យ៉ាងរហ័ស»។
លោក ចៅ តឹង តំណាងគណបក្សប្រជាជនកម្ពុជាដែលចូលរួមពិសោធទឹកខ្មៅជ្រលក់ដៃបានអះអាងថាទឹកខ្មៅនេះមានគុណភាពល្អព្រោះលោកបានជ្រលក់ដៃ ហើយយកទៅលាងនឹងទឹកសាប៊ូ ទឹកអូសាវ៉ែល និងសាប៊ូលាងបន្ទប់ទឹកប៉ុន្ដែមិនអាចលុបទឹកខ្មៅនេះជ្រះទេ។
លោកបញ្ជាក់ថា៖ «យើងបានពិសោធទាំងអស់គ្នាហើយឃើញផ្ទាល់ភ្នែកហើយថា វាមិនអាចលុបជ្រះទេ អ៊ីចឹងវាមិនអាចដូចការលើកឡើងរបស់បុគ្គលមួយចំនួននោះទេ ហើយវាក៏ស្រាយមន្ទិលសង្ស័យរបស់ពួកគាត់ដែរ»។
លោក សម គន្ធាមី នាយកប្រតិបត្តិអង្គការនិចហ្វិក (NICFEC) ថ្លែងថា៖ «ខ្ញុំទៅពិសោធន៍ជាមួយគេដែរពេលជ្រលក់ដៃចូលទៅគឺភ្លាមៗមើលមិនសូវឃើញចេញពណ៌ ប៉ុន្ដែយើងទុកប្រហែល ២ ឬ ៣ នាទីទើបឡើងពណ៌បន្ដិចម្ដងៗ ហើយពណ៌វាហ្នឹងក៏មិនសូវដិតចេញជាពណ៌ស្វាយខ្លាំងដូចយើងធ្លាប់បោះឆ្នោតកាលពីអាណត្តិមុនទេ។ មើលទៅដូចជាមិនអីទេយើងអាចប្រើបាន»។
ក្នុងពិធីសម្ពោធដាក់ឲ្យប្រើប្រាស់ស្ពានអាកាសផ្សារដីហុយកាលពីថ្ងៃទី ២ កក្កដា ឆ្នាំ ២០១៨ លោកនាយករដ្ឋមន្ត្រី ហ៊ុន សែន បានលើកឡើងថាមានក្រុមមួយបានរៀបចំកិច្ចប្រជុំជាសម្ងាត់ ដើម្បីបំភ្លៃថាទឹកខ្មៅរបស់ គ.ជ.ប សម្លាប់អ្នកបោះឆ្នោតក្នុងរយៈពេល ២៤ ម៉ោងដើម្បីបំភិតបំភ័យកុំឱ្យប្រជាពលរដ្ឋទៅបោះឆ្នោត។ ប៉ុន្ដែលោកបានចាត់ទុកផែនការនេះជាអំពើល្មើសច្បាប់ធ្ងន់ធ្ងរ ធ្វើឡើងដើម្បីបំផ្លាញការបោះឆ្នោត និងបំភ្លៃដល់ប្រជាពលរដ្ឋដោយត្រូវតែចាត់វិធានការបន្ទាន់មិនអាចលើកលែងឡើយ៕