.jpg)
ក្បាលគោដែលងាប់ និងទឹកនៅជិតចម្ការអំពៅក្រុមហ៊ុនចិន ដែលសង្ស័យមានជាតិពុល។ រូបថត សហគមន៍
ព្រះវិហារៈ សត្វគោយ៉ាងហោចណាស់ ១៦ ក្បាលបានពុលងាប់ជាបន្តបន្ទាប់កាលពីថ្ងៃសៅរ៍ចុងសប្ដាហ៍មុន ក្រោយពីបានផឹកទឹកជិតចម្ការអំពៅក្រុមហ៊ុនចិន នៅភូមិជោគជ័យក្នុងឃុំសង្កែ ២ និងភូមិប្រើសក្អក ក្នុងឃុំម្លូព្រៃ ២ ស្រុកឆែប ខេត្ត ព្រះវិហារ ជាករណីមួយដែលមន្ត្រីកំពុងស្រាវជ្រាវរកមូលហេតុនៅឡើយ។ នេះបើតាមពលរដ្ឋ។
លោក ផាវ យ៉ន ជនជាតិដើមភាគតិចកួយ រស់នៅក្នុងភូមិសំបូរ បានឲ្យដឹងថា ក្នុងចំណោមគោដែលងាប់នោះមានគោរបស់គាត់ចំនួន ៣ ក្បាល។
លោកថា លោកនិងអ្នកភូមិផ្សេងទៀតបានលែងគោជាច្រើនឲ្យស៊ីស្មៅតាមស្រែចម្ការ និងគោខ្លះបានចូលទៅស៊ីនៅចម្ការអំពៅរបស់ក្រុមហ៊ុនឈ្មោះ រ៉ូយ ហ្វេង ហើយវាបានទៅផឹកទឹកត្រពាំង។
លោកថា ក្រោយមកក៏មានគោងាប់ជាបន្តបន្ទាប់តែម្តង។
លោក យ៉ន បានបញ្ជាក់ថា៖ «កាលពីម្សិលម្ង៉ៃ ងាប់អស់ ១២ ក្បាល។ ខ្ញុំឃើញកន្លែងខ្លះងាប់ ៣ កន្លែងខ្លះងាប់ ២ ក៏មាន។ មិនដឹងថា វាពុលថ្នាំឬយ៉ាងណាទេ។ មិនទាន់រក មូលហេតុឃើញទេ»។ ប៉ុន្តែលោកថា គោដែលងាប់មានចេញឈាមតាមមាត់។
លោក យ៉ន ក៏បានឲ្យដឹងផងដែរថា គោខ្លះត្រូវបានម្ចាស់លក់ទៅឲ្យជនជាតិចាមក្នុងតម្លៃចាប់ពី ១៥ ម៉ឺនទៅ ២៥ ម៉ឺន ហើយខ្លះទៀតត្រូវបានម្ចាស់កាប់ចែកគ្នាហូបផងដែរ។ ប៉ុន្តែមិនឃើញអ្នកហូបមានបញ្ហាសុខភាពទេ។
អ្នកភូមិ បានរាយការណ៍ជូនអាជ្ញាធរ ដើម្បីសុំឲ្យចុះពិនិត្យទឹកត្រពាំងនិងទំនប់ទឹកទីនោះ។
ដោយឡែក លោក ពាន ផាត ជាពលរដ្ឋក្នុងភូមិប្រើសក្អក ក៏មានគោ ៤ ក្បាលងាប់ផងដែរ។
លោក ផាត បានថ្លែងថា លោកនិងអ្នកភូមិបានចុះពិនិត្យទឹកត្រពាំងនិងទំនប់ដែលនៅក្បែរក្រុមហ៊ុនចិនហើយបានឃើញមានថ្នាំពុលជាច្រើនដែលត្រូវបានគេលួចដាក់នៅ ៤ កន្លែងផ្សេងគ្នានៃប្រភពទឹកទាំងនោះ។
លោក ផាត បាននិយាយថា៖ «ថ្នាំហ្នឹងគេចាក់នៅទីកន្លែងដីស្រែពលរដ្ឋជិតចម្ការអំពៅ។ ថ្នាំហ្នឹងច្រើនណាស់។ គោផឹកទៅងាប់។ តែមិនដឹងអ្នកណាដាក់ថ្នាំបំពុលទេ»។
លោកថា កាលពីរដូវប្រាំងឆ្នាំមុន ក៏មានករណីគោពុលថ្នាំងាប់ដូចគ្នានេះដែរ តែជនល្មើសមិនត្រូវបានរកឃើញដើម្បីយកទៅផ្តន្ទាទោសនោះទេ។
លោក ខៀវ យ៉ែន មេឃុំសង្កែ ២ បានអះអាងថា គោងាប់នេះគឺបណ្តាលមកពីពុលថ្នាំ ដែលត្រូវបានអ្នកភូមិលួចដាក់នៅតាមត្រពាំង និងទំនប់ទឹកដើម្បីសម្លាប់សត្វស្លាបនៅក្នុងរដូវប្រាំងនេះ។
លោកបានបញ្ជាក់ថា៖ «ប្រជាពលរដ្ឋយើងក្នុងមូលដ្ឋានដាក់ថ្នាំសម្លាប់សត្វដូចជា សត្វកុក ដើម្បីយកធ្វើម្ហូបហូប។ ពេលនោះគោមួយហ្វូងទៅផឹកទឹកនិងពុលទៅ។ នៅកន្លែងនោះក៏ឃើញមានសត្វកុកងាប់ដែរ។ កន្លែងហ្នឹងមានទីតាំងនៅក្បែរក្រុមហ៊ុនដែរ»។
លោក សុខសាន្ត តារា អភិបាលស្រុក ឆែប បានឲ្យដឹងថា ក្រោយពីទទួលបានព័ត៌មាននេះ លោកបានចាត់ឲ្យមន្ត្រីកសិកម្មស្រុកឲ្យចុះទៅពិនិត្យ តែមិនទាន់ទទួលបានរបាយការណ៍ពីការចុះពិនិត្យនោះទេ។
លោកអភិបាលបញ្ជាក់ថា៖ «ខ្ញុំឲ្យគេចុះពិនិត្យហើយ។ តែមិនទាន់ទទួលបានរបាយការណ៍។ អ៊ីចឹង យើងមិនទាន់ហ៊ានសន្និដ្ឋានថា យ៉ាងម៉េចទេ ដោយសារមិនទាន់មានការពិសោធ និងស្រាវជ្រាវរបស់ក្រុមជំនាញ»៕
