ខេត្តស្ទឹងត្រែងៈ យ៉ាងតិចមានសត្វគោ-ក្របី ជិត ៥០ ក្បាលបានងាប់ និង ៧០ ក្បាលទៀតកំពុងមានជំងឺនៅឃុំព្រែកមាស និងឃុំថ្មកែវក្នុងស្រុកសៀមប៉ាង ខេត្តស្តឹងត្រែង ខណៈសត្វទាំងនេះត្រូវបានអ្នកភូមិលែងឲ្យដើររកស៊ីស្មៅតាមព្រៃភ្នំ ហើយផឹកទឹកព្រែក និងទឹកអូរ បណ្ដាលឱ្យកើតជំងឺឆ្លងពីមួយទៅមួយ។ នេះបើតាមមន្ត្រីអាជ្ញាធរមូលដ្ឋានប្រាប់កាលពីម្សិលមិញ។
លោក ស៊ីង ណាន មេឃុំថ្មកែវបានថ្លែងថាចាប់តាំងពីដើមខែឧសភាមកសត្វគោ-ក្របី អ្នកភូមិរបស់លោកបានចាប់ផ្ដើមឈឺសរុប ៦០ ក្បាល និងងាប់ ៤០ ក្បាល ដោយសាររដូវវស្សាមានភ្លៀងធ្លាក់ ហើយអ្នកភូមិបានលែងឲ្យដើររកស៊ីស្មៅ ឬស្លឹកឈើនៅតាមព្រៃភ្នំ ហើយវាផឹកទឹកអូរ ទឹកព្រែក ដែលហូរពីលើភ្នំ ខណៈទឹកនោះមានផ្ទុកមេរោគច្រើនប្រភេទ។
លោកបន្តថាក្នុងតំបន់នោះមិនមានក្រុមហ៊ុនធ្វើអាជីវកម្មអ្វីទេ ដោយលោកថា សត្វគោ-ក្របី ទាំងនោះមុនពេលងាប់គឺវាឈឺតែ ២ ឬ ៣ ថ្ងៃប៉ុណ្ណោះ ដោយមានអាការហើមពោះ (ប៉ោងពោះ) និងឈឺ ហើយមានរឹងត្រង់បំពង់កមិនអាចស៊ីស្មៅបាន។ លោកបានស្នើឱ្យអាជ្ញាធរពាក់ព័ន្ធក៏ដូចមន្ទីរកសិកម្មខេត្ត ជួយចុះទប់ស្កាត់ដោយចាក់ថ្នាំវ៉ាក់សាំង និងជួយព្យាបាលដល់សត្វគោក្របីរបស់ពួកគាត់ផង។
លោកបានបញ្ជាក់ថា៖ «ម្សិលមិញហ្នឹង ខ្ញុំក៏បានដើររកក្របីខ្ញុំដែរ ដោយឃើញវាងាប់ ៥ ក្បាលនៅក្បែរព្រែកក្រោយភូមិខ្ញុំ ក្រោយមកខ្ញុំបានសួរអ្នកភូមិខ្ញុំ ហើយខ្ញុំគិតមើល សរុបទៅគឺងាប់ ៤០ ក្បាលហើយ ៦០ ក្បាលកំពុងឈឺ។ ម្សិលមិញហ្នឹង ខ្ញុំបានប្រាប់ទៅខាងមន្ទីរកសិកម្មខេត្តដែរ ហើយគេបានផ្ដល់ថ្នាំដែរ តែមិនទាន់គ្រប់គ្រាន់ទេ»។
លោក ផួង លុន មេឃុំព្រែកមាសបានឲ្យដឹងដែរថាឃុំរបស់លោកក៏មានសត្វគោ-ក្របី ៨ ក្បាលងាប់ដែរ ហើយ ១០ ក្បាលទៀតកំពុងមានជំងឺក្នុងរដូវធ្លាក់ភ្លៀងជាពេលដែលកសិករចាប់ផ្តើមបង្កបង្កើនផលដោយពឹងលើសត្វគោក្របីជាកម្លាំងអូសទាញ។
លោកបន្តថានៅថ្ងៃទី ២២ ខែឧសភានេះ លោកនឹងកោះហៅមេភូមិគ្រប់ភូមិក្នុងឃុំរបស់លោកមកប្រជុំបូកសរុបតួលេខ និងស្វែងរកវិធានការទប់ស្កាត់ជំងឺដើម្បីបញ្ចៀសគ្រោះមហន្តរាយ ខណៈការប្រែប្រួលអាកាសធាតុក៏កំពុងបង្កផលប៉ះពាល់ដល់សត្វគោ-ក្របី ហើយលោកក៏បានស្នើសុំជំនួយពីមន្ទីរកសិកម្មរុក្ខា ប្រមាញ់ និងនេសាទ ខេត្តស្ទឹងត្រែងជួយទប់ស្កាត់បញ្ហានេះផងដែរ។
លោកបានបញ្ជាក់ថា៖ «ខ្ញុំនៅមិនទាន់បានប្រមូលរបាយការណ៍លម្អិតពីតាមភូមិនីមួយៗទេ ព្រោះមេភូមិទាំងនោះកំពុងស្រង់ស្ថិតិ ខណៈអ្នកខ្លះមិនទាន់រកសត្វគោ-ក្របី ឃើញនៅឡើយ។ អ៊ីចឹងខ្ញុំត្រូវនៅចាំរបាយការណ៍ពួកគាត់ថែមទៀត»។
លោក ផាន់ យុទ្ធ អភិបាលស្រុកសៀមប៉ាងបានឲ្យដឹងកាលពីម្សិលមិញថា លោកគ្រាន់តែទទួលព័ត៌មានពីលោកមេឃុំ ប៉ុន្ដែចំនួនជាក់លាក់មិនទាន់អាចប្រាប់បានទេ ប៉ុន្ដែលោកបានចាត់មន្ត្រីជំនាញឲ្យចុះទៅជួយស្រង់ទិន្នន័យ និងចែកថ្នាំព្យាបាល។
លោកបានបន្តថា៖ «ខ្ញុំអត់ទាន់ដឹងចំនួនច្បាស់ទេ ប្រហែលជាស្អែក ទើបមន្ត្រីរបស់ខ្ញុំរាយការណ៍មក ព្រោះនៅក្នុងតំបន់នោះមិនសូវមានសេវាប្រព័ន្ធទូរស័ព្ទ»។
លោក លៀង សេង ប្រធានមន្ទីរកសិកម្ម ខេត្តស្ទឹងត្រែងបានបញ្ជាក់ថាសត្វគោ-ក្របី ភាគច្រើនតែងកើតជំងឺអុតក្តាមដែលមានដំបៅនៅក្រចកជើង និងមាត់ ហៀរសំបោរ ពងបែកអណ្តាត ស៊ីអាហារមិនកើត ហើយអាចធ្វើឲ្យសត្វងាប់បានបើយើងមិនបានថែទាំ និងចាក់ថ្នាំឲ្យបានទាន់ពេលវេលា។
លោកបានបន្តទៀតថានៅតំបន់នោះ សត្វគោក្របីផឹកទឹកអូរ ព្រែក និងតាមជង្ហុកជើងភ្នំ ហើយទឹកទាំងនោះវាមានមេរោគប្លែកៗច្រើនណាស់ដែលបង្កឱ្យក្លាយជាជំងឺដល់សត្វគោក្របីបែបនេះ។
លោកថ្លែងថា៖ «ខ្ញុំអត់មានតួលេខច្បាស់ទេ ចាំមន្ត្រីខ្ញុំរាយការណ៍មកសិន ព្រោះខ្ញុំបានចាត់ឲ្យមន្ត្រីចុះទៅដល់ទីនោះហើយ គឺខ្ញុំឲ្យពួកគាត់ជួយចាក់ថ្នាំ ផ្ដល់ថ្នាំ និងតាមដានជំងឺទាំងនោះឲ្យពលរដ្ឋ»។
លោកបញ្ជាក់ថាម្ចាស់សត្វនីមួយៗនៅពេលគោក្របីកើតមានជំងឺឆ្លងនេះសូមរាយការណ៍បន្ទាន់ទៅមន្ត្រីពេទ្យសត្វនៅតាមភូមិ ហើយមន្ទីរកសិកម្មនឹងបញ្ជូនភ្នាក់ងារបសុព្យាបាលសត្វទៅជួយអន្តរាគមន៍បន្ថែមទៀត ដើម្បីទប់ស្កាត់ការឆ្លងរាលដាល។
តាមរបាយការណ៍របស់មន្ទីរកសិកម្មខេត្តស្ទឹងត្រែងបានបង្ហាញថា ការចាក់វ៉ាក់សាំងការពារជំងឺឆ្លងសត្វគោ-ក្របីចាប់តាំងពីដើមខែមករាមកមន្ត្រីបសុព្យាបាលនៃមន្ទីរកសិកម្មរុក្ខាប្រមាញ់ និងនេសាទខេត្ត ជួយព្យាបាល សត្វគោបានចំនួន ២១៣ ក្បាល និងសត្វក្របី ៤១ ក្បាលព្រមទាំងចាក់វ៉ាក់សាំងការពារសត្វគោបាន ៧៦៧ ក្បាល និងសត្វក្របីបាន ២២៥ ក្បាលផងដែរ៕