.jpg)
ទិដ្ឋភាពគ្រោះថ្នាក់ចរាចរណ៍រាជធានីភ្នំពេញកាលពីកន្លងមក។ ហេង ជីវ័ន
ភ្នំពេញ: អគ្គស្នងការដ្ឋាននគរបាលជាតិបានចេញរបាយការណ៍មួយកាលពីម្សិលមិញបានបង្ហាញថា មានមនុស្សស្លាប់ និងរបួសដោយសារគ្រោះថ្នាក់ចរាចរណ៍ចំនួន ៨៦ នាក់ ក្នុងនោះស្លាប់ ៣៥ នាក់រយៈពេល ៣ ថ្ងៃ (២៤-២៦មករា) នៃពិធីបុណ្យចូលឆ្នាំចិននៅទូទាំងប្រទេសជាតួលេខខ្ពស់មួយដែលសង្គមស៊ីវិលក៏បានសម្ដែងការព្រួយបារម្ភពីករណីនេះដែរ។
តាមរបាយការណ៍ដែលបានចេញផ្សាយកាលពីម្សិលមិញបានឲ្យដឹងថាក្នុងថ្ងៃចូលឆ្នាំចិនថ្ងៃទី ២៤ ខែមករា គ្រោះថ្នាក់ចរាចរណ៍ទូទាំងប្រទេសបានកើតឡើងចំនួន ១៣ លើក បណ្ដាលឲ្យមនុស្សចំនួន ១២ នាក់ស្លាប់ ចំណែក ១៧ នាក់ទៀតបានរងរបួសធ្ងន់ស្រាល។ ក្នុងនោះអ្នកបើកបរម៉ូតូចំនួន ១១ នាក់ (៩ នាក់មិនពាក់មួកសុវត្ថិភាព) និងរថយន្តតូច ១ នាក់។
របាយការណ៍បន្តថានៅថ្ងៃទី ២៥ ខែមករា គ្រោះថ្នាក់ចរាចរណ៍ទូទាំងប្រទេសបានកើតឡើងចំនួន ២២ លើកបណ្ដាលឲ្យមនុស្សចំនួន ១៤ នាក់បានស្លាប់ ចំណែក ២២ នាក់ទៀតបានរងរបួសធ្ងន់-ស្រាល។ ក្នុងនោះស្លាប់ដោយសារបើកបរម៉ូតូចំនួន ១៣ នាក់ (៧ នាក់មិនពាក់មួកសុវត្ថិភាព) និងដើរថ្មើរជើង ១ នាក់។
របាយការណ៍បន្ថែមថា លុះនៅថ្ងៃទី ២៦ ខែមករានៃបុណ្យចូលឆ្នាំចិននេះគ្រោះថ្នាក់ចរាចរណ៍នៅទូទាំងប្រទេសបានកើតឡើងចំនួន ១៣ លើក បណ្ដាលឲ្យមនុស្សចំនួន ៩ នាក់បានស្លាប់ ចំណែក ១២ នាក់ទៀតបានរងរបួសធ្ងន់ស្រាល។ ក្នុងនោះស្លាប់ដោយការបើកបរម៉ូតូចំនួន ៧ នាក់ (មិនពាក់មួកសុវត្ថិភាព) រថយន្តតូច ១ នាក់ និងថ្មើរជើង ១ នាក់។
លោក ហ៊ឹម យ៉ាន អគ្គស្នងការរងនគរបាលជាតិ និងជាអគ្គលេខាធិការនៃគណៈកម្មាធិការជាតិសុវត្ថិភាពចរាចរណ៍ផ្លូវគោក មិនអាចសុំការបញ្ជាក់បន្ថែមជុំវិញករណីនេះបានទេ ដោយសារទូរស័ព្ទលោកគ្មានអ្នកទទួលកាលពីម្សិលមិញ។
លោក ស ថេត អគ្គស្នងការរងនគរបាលជាតិ និងជាស្នងការនគរបាលរាជធានីភ្នំពេញបានថ្លែងក្នុងកិច្ចប្រជុំផ្សព្វផ្សាយអនុសាសន៍លោកឧបនាយករដ្ឋមន្ត្រី ស ខេង រដ្ឋមន្ត្រីក្រសួងមហាផ្ទៃទាក់ទងការរឹតបន្តឹងច្បាប់ចរាចរណ៍កាលពីម្សិលមិញថា ដើម្បីបង្ការទប់ស្កាត់ និងកាត់បន្ថយឲ្យបាននូវអត្រាគ្រោះថ្នាក់ស្លាប់ដោយចរាចរណ៍នៅរាជធានីភ្នំពេញ បណ្តាខណ្ឌទាំង ១៤ និងការិយាល័យពាក់ព័ន្ធត្រូវរៀបចំកម្លាំងចម្រុះដាក់តាមគោលដៅរឹតបន្តឹងច្បាប់ចរាចរណ៍គ្រប់ខណ្ឌរយៈពេល ៧ ថ្ងៃ គិតពីថ្ងៃផ្សព្វផ្សាយនេះទៅ។
លោកថា ការធ្វើបែបនេះដើម្បីយកលទ្ធផលមកវិភាគថា តើក្នុងអំឡុងពេលអនុវត្តការងារ ១ សប្តាហ៍នេះមានការថយចុះ ឬមានប្រសិទ្ធភាពកម្រិតណា ដើម្បីឈានទៅដាក់ផែនការអនុវត្តបន្តទៀត។
លោកបានណែនាំឲ្យកម្លាំងចម្រុះយកចិត្តទុកដាក់លើជនបរទេសដែលបើកបរនៅរាជធានីភ្នំពេញ ជាពិសេសជនបរទេសដែលប្រើប្រាស់រថយន្តមានស្លាកលេខ នប និង ខម។ល។ ទន្ទឹមនឹងនេះលោកបានណែនាំដល់កម្លាំងទាំងអស់ ត្រូវគោរពវិន័យឲ្យបានល្អ អនុវត្តឲ្យបានម៉ឺងម៉ាត់ ដើម្បីទទួលបាននូវការសាទរ និងគាំទ្រពីមជ្ឈដ្ឋានទូទៅ។
លោក គឹម បញ្ញា នាយកអង្គការមូលនិធិបង្ការរបួសអាស៊ី (AIP) ប្រចាំនៅកម្ពុជាបានថ្លែងថាចំនួនតួលេខអ្នកស្លាប់ និងអ្នករបួសក្នុងគ្រោះថ្នាក់ចរាចរណ៍រយៈពេល ៣ ថ្ងៃនេះជារឿងគួរឲ្យព្រួយបារម្ភ។ លោកថានេះដោយសារមានកត្តាមួយចំនួនដូចជា ការបើកបរមិនគោរពច្បាប់ បើកបរល្បឿនលឿន បើកបរក្នុងស្ថានភាពស្រវឹង បើកបរមិនពាក់មួកសុវត្ថិភាព ឬខ្សែក្រវាត់ និងកត្តារួមផ្សំជាច្រើនទៀត។
លោកបានបន្តថា ដើម្បីកាត់បន្ថយការគ្រោះថ្នាក់ចរាចរណ៍នេះត្រូវតែមានការចូលរួមទាំងអស់គ្នា។ ជាក់ស្ដែងគណៈកម្មាធិការសុវត្ថិភាពចរាចរណ៍ផ្លូវគោក និងអាជ្ញាធរពាក់ព័ន្ធបានដាក់ចេញវិធានការច្រើនចំណុចព្រមទាំងមានការណែនាំបន្ថែមពីលោកឧបនាយករដ្ឋមន្ត្រី ស ខេង រដ្ឋមន្ត្រីក្រសួងមហាផ្ទៃជុំវិញការប្រុងប្រយ័ត្ន និងការទប់ស្កាត់ករណីនេះ។
លោក បញ្ញា បានបញ្ជាក់ថា៖ «ក្រៅពីការអនុវត្តច្បាប់ចំពោះជនបើកបរល្មើសច្បាប់ចរាចរណ៍ភាគីពាក់ព័ន្ធក៏ត្រូវតែអប់រំផ្សព្វផ្សាយបន្ថែមទៀតឲ្យបានទូលំទូលាយនៅតាមមូលដ្ឋាន សាលារៀន និងទីប្រជុំជននានា។
បន្ថែមលើនេះយើងគួរតែរកវិធីសាស្ត្រយ៉ាងណាធ្វើឲ្យអ្នកល្មើសច្បាប់គាត់ចេះខ្មាសអៀនចេះស្រឡាញ់កិត្តិយសគាត់ នៅពេលគាត់បើកបរបំពានច្បាប់»។
បើតាមរបាយការណ៍ប្រចាំឆ្នាំរបស់គណៈកម្មាធិការជាតិសុវត្ថិភាពចរាចរណ៍ផ្លូវគោកបានបង្ហាញថា នៅពេញ ១ ឆ្នាំ នៃឆ្នាំ ២០១៩ មានករណីគ្រោះថ្នាក់ចរាចរណ៍កើតឡើងចំនួន ៤ ១២១ លើក ដែលធ្វើឲ្យមនុស្សស្លាប់ចំនួន ១ ៩៨១ នាក់ និងរងរបួសចំនួន ៦ ១៤១ នាក់ ដែលគិតជាមធ្យមគឺក្នុង ១ ថ្ងៃ មានមនុស្សស្លាប់ ៥,៤ នាក់ ដែលភាគច្រើនកើតឡើងនៅរាជធានីភ្នំពេញ ខេត្តព្រះសីហនុនិងខេត្តកណ្ដាល៕
