.jpg)
បុរសចិន ២ នាក់ត្រូវបានបញ្ជូនទៅឃុំខ្លួននៅពន្ធនាគារខេត្តស្វាយរៀង។ រូបថត នគរបាល
ស្វាយរៀង/ព្រះសីហនុៈ អយ្យការអមសាលាដំបូងខេត្តស្វាយរៀង បានសម្រេចឃុំខ្លួនបុរសចិន ២ នាក់ កាលពីថ្ងៃទី ១៨ ខែតុលា ពាក់ព័ន្ធបទចាប់បង្ខាំងបុរសចិន ២ នាក់ ជំរិតទារប្រាក់នៅក្រុងបាវិត ខណៈសមត្ថកិច្ចខេត្តព្រះសីហនុកំពុងតាមចាប់ខ្លួនជនជាតិចិន ១ ក្រុម ដែលពាក់ព័ន្ធករណីជំរិតទារប្រាក់ពីជនជាតិចិន ៥ នាក់ កាលពីថ្ងៃទី ១៨ តុលា នៅភូមិ-សង្កាត់ ៣។
លោក ទេព ផល្លា អ្នកនាំពាក្យសាលាដំបូងខេត្តស្វាយរៀងថ្លែងពីម្សិលមិញថា បុរសសង្ស័យជនជាតិចិនឈ្មោះ ហ្វង់ ឈីឆឹង (ហៅក្រៅ ម៉ឺង គ័រ) អាយុ ៤៥ ឆ្នាំ និង ធឹង ចាស៊ាង អាយុ ២៨ ឆ្នាំ ត្រូវចៅក្រមស៊ើបសួរសម្រេចចោទប្រកាន់ និងបញ្ជូនទៅឃុំខ្លួនបណ្តោះអាសន្ននៅពន្ធនាគារខេត្តកាលពីថ្ងៃទី ១៨ តុលា បន្ទាប់ពីសមត្ថកិច្ចបានចាប់ឃាត់ខ្លួនកាលពីថ្ងៃទី ១៦ ខែតុលា។
លោកថ្លែងថា៖ «ជនទាំង ២ នាក់ត្រូវចោទពីបទបង្ខាំងមនុស្សក្នុងគោលដៅជំរិតទារប្រាក់ តាមបញ្ញត្តិមាត្រា ២៥៣ នៃក្រមព្រហ្មទណ្ឌ»។ យោងមាត្រា ២៥៣ ចែងថា បើការចាប់បង្ខាំងមានរយៈពេលតិចជាង ៤៨ ម៉ោង ត្រូវជាប់ពន្ធនាគារពីមួយឆ្នាំទៅ ៣ ឆ្នាំ និងបើចាប់ឃុំ ឬការបង្ខាំងរយៈពេលចាប់ពី ៤៨ ម៉ោងដល់តិចជាង ១ ខែ គឺត្រូវជាប់ពន្ធនាគារពី ៣ (បី) ឆ្នាំទៅ ៥ (ប្រាំ) ឆ្នាំហើយបើការចាប់ឃុំ ឬការបង្ខាំងរយៈពេលស្មើ ឬលើសពី ១ ខែ គឺត្រូវជាប់ពន្ធនាគារពី ៥ (ប្រាំ) ឆ្នាំទៅ ១០ (ដប់) ឆ្នាំ។
លោក ស្រី វុត្ថា មេបញ្ជាការរងកងរាជអាវុធហត្ថខេត្តស្វាយរៀងបានថ្លែងពីម្សិលមិញថា ករណីនេះមានជនរងគ្រោះឈ្មោះ យ៉ាង អាសឹង អាយុ ២៣ ឆ្នាំ មុខរបរមិនពិតប្រាកដមានទីលំនៅក្នុងក្រុងណាននីង ខេត្តគ័ងស៊ី ប្រទេសចិន និងទី ២- ឈ្មោះ ល័រ សាវជៀន អាយុ ២៥ ឆ្នាំមុខរបរអាជីវករស្នាក់នៅក្រោយផ្សារអន្តរជាតិស្ថិតក្នុងភូមិបាវិតកណ្តាលសង្កាត់-ក្រុងបាវិត។
លោកឲ្យដឹងថា ក្នុងប្រតិបត្តិការនេះ សមត្ថកិច្ចបានចុះបង្ក្រាបនៅយប់ថ្ងៃទី ១៤ ខែតុលា នៅចំណុចផ្ទះសំណាក់យីហោ មហាជ័យ និងឆែកឆេរបន្ទប់ផ្ទះសំណាក់លេខ ២៣ ដែលជនសង្ស័យស្នាក់នៅក្នុងភូមិបាវិតកណ្តាល សង្កាត់-ក្រុងបាវិត ដោយរកឃើញមនុស្សចំនួន ៣ នាក់ នៅក្នុងបន្ទប់។ ក្នុងនោះជនរងគ្រោះមាន ២ នាក់ និងជនសង្ស័យម្នាក់ (ជនជាតិចិនទាំង ៣ នាក់)។
លោកបន្តថា រហូតមកដល់ម៉ោង ៩ និង ១៥ នាទីយប់ថ្ងៃទី ១៦ ខែ តុលា ឆ្នាំ ២០១៩ កម្លាំងអាវុធហត្ថបានបន្តចុះប្រតិបត្តិការនៅមុខសណ្ឋាគារ JP ស្ថិតក្នុងភូមិបាវិតកណ្តាល សង្កាត់បាវិតដោយឃាត់ខ្លួនជនសង្ស័យជាជនជាតិចិនម្នាក់ទៀតជាក្រុមតែមួយ។
ដោយឡែកនៅឯខេត្តព្រះសីហនុកាលពីថ្ងៃទី ១៨ ខែតុលា កម្លាំងនគរបាលខេត្តព្រះសីហនុបានរំដោះជនជាតិចិន ៥ នាក់ (ស្រីម្នាក់) ពាក់ព័ន្ធការបង្ខាំងជំរិតទារប្រាក់ស្ថិតនៅភូមិ ៣ សង្កាត់លេខ ៣ ប៉ុន្តែជនសង្ស័យបានគេចខ្លួន។
លោក កុល ផាលី ស្នងការរងខេត្តព្រះសីហនុទទួលផែនព្រហ្មទណ្ឌថ្លែងពីម្សិលមិញថា ជនរងគ្រោះត្រូវបានក្រុមជនសង្ស័យវាយឲ្យរបួសពេញខ្លួន ដែលជាការគំរាមជនរងគ្រោះបង្ខំជំរិតទារប្រាក់ហើយជនរងគ្រោះត្រូវបានសមត្ថកិច្ចបញ្ជូនភ្លាមៗទៅពិនិត្យសុខភាពនៅមន្ទីរពេទ្យក្រុងព្រះសីហនុ៕
