.jpg)
ជនសង្ស័យជនជាតិចិន ដែលចាក់ទៅលើជនជាតិចិនដូចគ្នាក្រោយទាស់ពាក្យសម្ដី។ ហ្វេសប៊ុក
ព្រះសីហនុៈ នគរបាលក្រុងព្រះសីហនុ នឹងបញ្ជូនបុរសជនជាតិចិនម្នាក់ ទៅស្នងការដ្ឋាននគរបាលខេត្តព្រះសីហនុនៅថ្ងៃអង្គារនេះ បន្ទាប់ពីបានចាប់ឃាត់ខ្លួនកាលពីយប់ថ្ងៃទី ១៩ ខែ ឧសភា នៅម្តុំសណ្ឋាគារលឺស៊ីង ក្រុង-ខេត្តព្រះសីហនុបន្ទាប់ពីជននេះ បានវាយបុរសចិនដូចគ្នាម្នាក់ឲ្យរងរបួសធ្ងន់។
លោក ភុល ភស្តា អធិការក្រុងព្រះសីហនុ បានប្រាប់ភ្នំពេញប៉ុស្តិ៍ពីម្សិលមិញថា បុរសជនជាតិចិនម្នាក់ ដែលវ៉ៃជនជាតិចិនគ្នាឯងម្នាក់ ឲ្យរងរបួសធ្ងន់នោះ លោកមិនបានចាំឈ្មោះទេ ប៉ុន្តែលោកនឹងបញ្ជូនបន្តទៅស្នងការដ្ឋាននគរបាលខេត្តនៅថ្ងៃនេះ។
លោកថា៖ «ទំនាស់របស់ពួកគេគ្រាន់តែឆាតតាមហ្វេសប៊ុក ក៏ទាស់ពាក្យសម្តីគ្នាប៉ុណ្ណឹងទេ ហើយពួកគេក៏ណាត់គ្នាចេញមកវ៉ៃគ្នាតែម្តង»។
លោកប្រាប់តាមសម្តីបុរសសង្ស័យថា រវាងបុរសសង្ស័យ និងបុរសចិនម្នាក់ទៀត គឺជាមិត្តភក្ដិនឹងគ្នា ហើយមុនពេលកើតហេតុ បុរសម្នាក់ នៅក្នុងចំណោម ២ នាក់ បានឆាតទៅគ្នាលេងតាមហ្វេសប៊ុក។ នៅពេលកំពុងឆាតទៅរកគ្នាចុះឡើងៗក៏ស្រាប់តែកើតមានទំនាស់ពាក្យសម្តីគ្នា។
ពេលនោះបុរសសង្ស័យ បានណាត់បុរសរងគ្រោះ មកជួបដើម្បីវ៉ៃគ្នានៅម្តុំសណ្ឋាគារឈ្មោះលឺស៊ីង ក្នុងភូមិសាស្រ្តសង្កាត់លេខ ៣ ក្រុង-ខេត្តព្រះសីហនុ ហើយពួកគេក៏ចេញមកជួបគ្នា និងវាយតប់គ្នាតែម្តង។
លោកបានបន្តថា ខណៈពួកគេកំពុងវាយតប់គ្នានោះ ស្រាប់តែជនសង្ស័យ បានយកកូនកាំបិតចាក់ត្រូវចំពោះបុរសរងគ្រោះបណ្តាលឲ្យរងរបួសធ្ងន់ ហើយត្រូវគេបញ្ជូនទៅសង្គ្រោះបន្ទាន់នៅមន្ទីរពេទ្យបង្អែកក្រុងព្រះសីហនុ។ ចំណែកជនបង្កត្រូវបានសមត្ថកិច្ចរបស់លោកចុះធ្វើអន្តរាគមន៍ និងបានចាប់ឃាត់ខ្លួនតែម្តង៕
