ភ្នំពេញៈ ចំនួនអ្នកស្លាប់ និងរងរបួសដោយករណីរន្ទះបាញ់ និងខ្យល់កន្ត្រាក់ បានកើន ឡើងដល់ ២០ នាក់ហើយ គិតចាប់ពីដើមខែមករា រហូតដល់ថ្ងៃទី ៩ ខែ មេសា ឆ្នាំ ២០១៩។ នេះបើតាមអ្នកនាំពាក្យគណៈកម្មាធិការជាតិគ្រប់គ្រងគ្រោះមហន្តរាយលោក កែវ វី។
លោក វី ដែលកំពុងធ្វើការផ្សព្វផ្សាយអំពីវិធានការត្រៀមបង្ការ និងឆ្លើយតបជាបន្ទាន់ ចំពោះជនរងគ្រោះដោយសារករណីខ្យល់កន្ត្រាក់ និងរន្ទះបាញ់ ព្រមទាំងបាតុភូតគ្រោះធម្មជាតិមួយចំនួនទៀតបានថ្លែងប្រាប់ភ្នំពេញប៉ុស្តិ៍កាលពីម្សិលមិញថា បាតុភូតខ្យល់កន្ត្រាក់និងរន្ទះបាញ់ បានសម្លាប់មនុស្សសរុប ៧ នាក់ និងបង្ករបួសធ្ងន់ និងស្រាល ១៣ នាក់ ព្រមទាំងបង្កការខូចខាតផ្ទះសំបែងប្រជាពលរដ្ឋ សរុបចំនួន ៩១៩ ខ្នង ក្នុងនោះ ១២៩ ខ្នងបានរងការខូចខាតទាំងស្រុង និង ៧៩០ ខ្នងទៀតខូចខាតជាមធ្យម។
លោកបញ្ជាក់ថា៖ «រន្ទះបាញ់បានសម្លាប់មនុស្ស ៦ នាក់ និងបង្ករបួសមនុស្ស ៥ នាក់ ព្រមទាំងសម្លាប់គោ ក្របីប្រជាកសិករ ៨ ក្បាល និង បង្ក ការខូចខាតផ្ទះ ២ ខ្នង ខណ:ខ្យល់កន្ត្រាក់បានបង្កឲ្យមានជនរងគ្រោះម្នាក់ស្លាប់ និង ៨ នាក់ទៀតរងរបួសធ្ងន់ និងស្រាល»។
លោក វី បានបន្ថែមថា ក្រៅពីបង្កឲ្យមានការស្លាប់ និងរបួសមនុស្សជាច្រើននាក់ និងបំផ្លាញលំនៅឋានប្រជាពលរដ្ឋរាប់រយខ្នងនោះបាតុភូតខ្យល់កន្ត្រាក់ ក៏បានបំផ្លាញដំបូលអគារសាលារៀនចំនួន ១៦ អគារ ឃ្លាំងស្តុកកសិផលចំនួន ៤ និងស្តង់លក់ដូរចំនួន ៩៤ ស្តង់ផងដែរ។
ជាមួយគ្នានេះ លោក វី បានអំពាវនាវដល់ប្រជាពលរដ្ឋ ដែលរស់នៅក្នុងតំបន់ងាយរងគ្រោះឬតំបន់ដែល ងាយប្រឈមទៅនឹងបាតុភូតគ្រោះធម្មជាតិខាងលើនេះឲ្យបង្កើនការប្រុងប្រយ័ត្ន ដោយរៀបចំបោះស្នឹង ចងខ្សែទាញបង់បាញ់រឹតផ្ទះសំបែងឲ្យជាប់កុំឲ្យប៉ើងរបើកនៅពេលមានករណីខ្យល់កន្ត្រាក់កើតឡើង និងចៀស វាងការប្រើប្រាស់ទូរស័ព្ទដៃនិងឧបករណ៍ដែលអាចចម្លងចរន្តអគ្គិសនី នៅពេលមេឃរកកលភ្លៀងនិងក្នុងអំឡុងពេលមានភ្លៀងធ្លាក់។
បើតាមការព្យាករអាកាសធាតុរបស់ក្រសួងធនធានទឹក និងឧតុនិយម នាថ្ងៃអង្គារម្សិលមិញកម្ពុជានៅតែស្ថិតក្រោមឥទ្ធិពលនៃប្រព័ន្ធសម្ពាធទាប និងសម្ពាធខ្ពស់ ដែលបង្កឲ្យមានភ្លៀងធ្លាក់ពីតិចទៅមធ្យម និងមានលាយឡំដោយបាតុភូតខ្យល់កន្ត្រាក់ និងផ្គររន្ទះមកជាមួយផងដែរ៕