.jpg)
ជនសង្ស័យ ២ នាក់ និងគ្រឿងញៀន ត្រូវបានចាប់បាន។ FN
ក្រចេះ: គ្រាន់តែនៅក្នុងថ្ងៃទី ១៣ ខែ កក្កដា ឆ្នាំ ២០១៩ សមត្ថកិច្ចបានចុះបង្ក្រាបគ្រឿងញៀននៅទូទាំងប្រទេសបានចំនួន ៣២ ករណី ឃាត់ខ្លួនជនសង្ស័យចំនួន ៧២ នាក់ ខណៈកាលពីម្សិលមិញសមត្ថកិច្ច បានបញ្ជូនជនសង្ស័យ ២ នាក់ ទៅបញ្ជាការដ្ឋានកងរាជអាវុធហត្ថខេត្តក្រចេះជាមួយគ្រឿងញៀនមេតំហ្វេតាមីនកន្លះគីឡូក្រាម។
លោក ផាត សុភ័ក្រ្ត វាសនា មេបញ្ជាការកងរាជអាវុធហត្ថក្រុងក្រចេះបានឲ្យដឹងកាលពីម្សិលមិញថា ជនសង្ស័យដែលកម្លាំងសមត្ថកិច្ចរបស់លោកចាប់បាន ឈ្មោះ ធឿន រក្សស្មី អាយុ ១៨ ឆ្នាំ និងឈ្មោះ សំ សុជា អាយុ ១៨ ឆ្នាំពួកគេគ្មានមុខរបរទេ និងមានលំនៅក្នុងភូមិការប៉ូ សង្កាត់អូរឫស្សី ក្រុងខេត្តក្រចេះ។
លោកបន្តថា ជនសង្ស័យត្រូវបញ្ជូនទៅបញ្ជាការដ្ឋានអាវុធហត្ថខេត្តរួចហើយ បន្ទាប់ពីចាប់ខ្លួនពួកគេ។ ចំពោះវត្ថុតាងគ្រឿងញៀនដែលសមត្ថកិច្ចដកហូតបានពីជនសង្ស័យមានម្សៅក្រាមពណ៌សប្រភេទមេតំហ្វេតាមីន ចំនួនកន្លះគីឡូក្រាម។ នៅពេលសួរថា តើមានជនប៉ុន្មាននាក់ដែលជាប់ពាក់ព័ន្ធ?
លោកបញ្ជាក់ថា៖ «រឿងនេះ ខ្ញុំមិនអាចប្រាប់លម្អិតបានទេ សមត្ថកិច្ចយើងកំពុងស្រាវជ្រាវតាមរកបក្ខពួកជន សង្ស័យបន្តទៀត»។
តាមកំណត់ហេតុរបស់អាវុធហត្ថក្រុងក្រចេះ គ្រឿងញៀនចំនួនកន្លះគីឡូក្រាមនេះត្រូវបានក្រុមជនសង្ស័យច្រកចូលក្នុងកញ្ចប់ប្លាស្ទិកនំរបស់កូនក្មេង ហើយជនសង្ស័យទាំង ២ នាក់ខាងលើ ត្រូវបានសមត្ថកិច្ចអាវុធហត្ថចាប់ខ្លួនជាក់ស្តែង ខណៈកំពុងចែកចាយបន្តទៅឲ្យម៉ូយ។ ចំពោះវត្ថុតាងដកហូតបានរួមមាន ម៉ាទឹកកកចំនួន ៦ កញ្ចប់ធំ ៥ និង ១ កញ្ចប់តូចស្មើ ៥១០,៥៤ ហ្រ្កាម និងទូរស័ព្ទដៃចំនួន ២ គ្រឿង។
កាលពីដើមខែកក្កដាអាជ្ញាធរខេត្តស្ទឹងត្រែង រួមជាមួយខេត្តក្រចេះ ព្រះវិហារ រតនគិរី និងមណ្ឌលគិរី បានរួមគ្នាដុតកម្ទេចគ្រឿងញៀនដែលបង្ក្រាបបានជាង ២០០ គីឡូក្រាម។
ជាមួយគ្នានេះគេហទំព័ររបស់ អគ្គស្នងការនគរបាលជាតិបានចុះផ្សាយថា ការបង្ក្រាបគ្រឿងញៀនទូទាំងប្រទេសនៅថ្ងៃទី ១៣ ខែ កក្កដា ឆ្នាំ ២០១៩ បានចំនួន ៣២ ករណី ក្នុងនោះសមត្ថកិច្ចឃាត់ខ្លួនជនសង្ស័យ បានចំនួន ៧២ នាក់ (ស្រី ២ នាក់) ហើយក្នុងចំណោមជនសង្ស័យដែលត្រូវបានឃាត់ខ្លួនទាំង ៧២ នាក់នោះ មានមុខសញ្ញាជួញដូរគ្រឿងញៀនចំនួន ៣៧ នាក់ និងអ្នកប្រើប្រាស់ ៣៥ នាក់។
ចំពោះវត្ថុតាងដែលចាប់បានក្នុងថ្ងៃទី ១៣ ខែ កក្កដា រួមមាន ថ្នាំញៀនមេតំហ្វេតាមីន (ICE) ទម្ងន់ ១១,១៧ ក្រាមនិង ១៤ កញ្ចប់ ក្នុងនោះខាងមន្ទីរប្រឆាំងគ្រឿងញៀន នៃក្រសួងមហាផ្ទៃ បង្ក្រាបបានអំពើជួញដូរចំនួន ៤ ករណី ឃាត់ខ្លួន ៦ នាក់ ចាប់យកគ្រឿងញៀនមេតំហ្វេតាមីន ice ២,៥០ ក្រាម ក្រៅពីនេះមានចាប់ខ្លួននៅខេត្តបាត់ដំបង កំពង់ចាម កំពង់ធំ កំពត កណ្តាល ពោធិ៍សាត់ និងរាជធានីភ្នំពេញ ជាមួយនឹងវត្ថុតាងគ្រឿងញៀនមួយចំនួន៕
