ភ្នំពេញៈ ជនជាតិអាមេរិកាំងដើមកំណើតខ្មែរនឹងប្រមូលផ្ដុំគ្នានៅថ្ងៃពុធនេះ ម៉ោងនៅសហរដ្ឋអាមេរិកនៅព្រលានយន្តហោះ Boston Logan ដើម្បីទទួលស្វាគមន៍ការវិលត្រឡប់របស់លោក ជា ធី ដែលបានឈ្នះក្ដីលើការបណ្ដេញចេញខុសនីតិវិធីលើរូបលោកកាលពី ១៨ ខែមុន។
អង្គការ «សិក្ខាសាលាធនធានអាស៊ីអាមេរិកាំង» ហៅកាត់ថា AARW ដែលជាអង្គការផ្ដល់អំណាចដល់សហគមន៍អាមេរិចកាំងដើមកំណើតអាស៊ីប៉ាស៊ីហ្វ៊ិក សម្រាប់ការធ្វើសមាហរណកម្មទៅក្នុងសង្គមអាមេរិកបានថ្លែងក្នុងសេចក្ដីប្រកាសព័ត៌មានមួយកាលពីថ្ងៃអង្គារថា លោក ជា ធី នឹងត្រឡប់ទៅផ្ទះរបស់លោកវិញនៅទីក្រុងឡូវែល រដ្ឋម៉ាសាឈូសេតនៅរសៀលថ្ងៃពុធនេះម៉ោងនៅសហរដ្ឋអាមេរិក។
សេចក្ដីប្រកាសព័ត៌មានដដែលបញ្ជាក់ថា៖ «បន្ទាប់ពីការតស៊ូអស់រយៈពេល ១៨ ខែ ក្រោយពេលលោកត្រូវបានបណ្ដេញចេញដោយខុស [ច្បាប់] លោក [ជា ធី] ដែលជាពលរដ្ឋរស់នៅទីក្រុងឡូវែល រដ្ឋម៉ាសាឈូសេតនឹងត្រឡប់មកផ្ទះរបស់គាត់វិញនៅសហរដ្ឋអាមេរិកនៅថ្ងៃពុធទី ២៦ ខែកុម្ភៈ ឆ្នាំ ២០២០។ លោក ជា ធី គឺជាពលរដ្ឋខ្មែរអាមេរិកាំងដំបូងគេដែលនឹងត្រឡប់មកកាន់តំបន់ឆ្នេរខាងកើត បន្ទាប់ពីត្រូវបានបណ្ដេញចេញ»។
សេចក្ដីប្រកាសព័ត៌មានរបស់ AARW បន្តថា៖ «នៅពេលមកដល់ព្រលានយន្តហោះលោក ជា ធី នឹងជួបកូនប្រុសលោកជាលើកដំបូងដែលមានអាយុ ១ ឆ្នាំកើតក្រោយពេលលោកត្រូវបានបណ្ដេញចេញ»។
លោក Keven Lam ប្រធានអង្គការ AARW បានថ្លែងថា លោក ជា ធី ត្រូវបានបណ្ដេញចេញដោយខុស [ច្បាប់] និងអយុត្តិធម៌ទៅកាន់ប្រទេសកម្ពុជាកាលពីខែសីហា ឆ្នាំ ២០១៨ ដោយផ្អែកលើបទល្មើសមួយដែលមិនគួរត្រូវបានបណ្ដេញចេញទាល់តែសោះដែលលោកបានប្រព្រឹត្តកាលពី ២០ ឆ្នាំមុន។ លោកបន្តថាលោក ជា ធី បានជាប់ពន្ធនាគារ ២ ឬ ៣ ខែមុនពេលត្រូវបានបណ្ដេញមកកម្ពុជា។ ក្រោយពេលតស៊ូអស់រយៈពេល ១៨ ខែប្រឆាំងនឹងក្រសួងសន្តិសុខមាតុភូមិរបស់សហរដ្ឋអាមេរិកលោក ជា ធី បានឈ្នះក្ដីនេះ ហើយត្រូវបានអនុញ្ញាតឲ្យវិលទៅសហរដ្ឋអាមេរិកវិញ។
លោក Bill Herod អ្នកនាំពាក្យអង្គការ KVAO ដែលជួយដល់អ្នកត្រូវបានបណ្ដេញចេញពីសហរដ្ឋអាមេរិកកម្ពុជាបានថ្លែងកាលពីម្សិលមិញយ៉ាងដូច្នេះថា៖ «យើងមានការរីករាយដែលគាត់អាចត្រឡប់ទៅសហរដ្ឋអាមេរិកវិញ ហើយយើងជូនពរគាត់ឲ្យមានជោគជ័យ និងជួបជុំជាមួយមនុស្សជាទីស្រឡាញ់របស់គាត់»។
លោក Bill Herod បន្តថា លោក ជា ធី មិនមែនជាមនុស្សទី ១ ទេដែលបានឈ្នះក្ដីលើការបណ្ដេញចេញហើយបានត្រឡប់ទៅសហរដ្ឋអាមេរិក។ មនុស្ស ២ នាក់ផ្សេងទៀតធ្លាប់បានជោគជ័យក្នុងការត្រឡប់ទៅសហរដ្ឋអាមេរិកវិញក្រោយពីការតស៊ូតាមផ្លូវច្បាប់ ហើយទីបញ្ចប់ករណីទាំងនោះត្រូវបានបង្ហាញថា ពួកគេគឺជាជនជាតិអាមេរិកាំង។
លោកបន្តថា នាពេលបច្ចុប្បន្ននេះនៅមានដំណើរការតាមផ្លូវច្បាប់ខ្លះទៀត ដែលកំពុងធ្វើ។ រាល់ករណីទាំងនេះអង្គការ KVAO បានជួយពួកគេក្នុងការរក្សាឯកសារច្បាប់ចាំបាច់នានា។
អ្នកស្រី Emily Zeeberg អ្នកនាំពាក្យស្ថានទូតសហរដ្ឋអាមេរិកប្រចាំកម្ពុជា មិនអាចទាក់ទងសុំការបញ្ជាក់បានទេកាលពីម្សិលមិញ។
លោក កុយ គួង អ្នកនាំពាក្យក្រសួងការបរទេសបានថ្លែងថា លោកមិនបានដឹងជាក់លាក់ករណីនេះទេ ប៉ុន្តែលោកកោតសរសើរដល់លោក ជា ធី ដែលបានតស៊ូការពារភាពយុត្តិធម៌របស់លោក។
លោកថ្លែងយ៉ាងដូច្នេះថា៖ «រដ្ឋាភិបាលកម្ពុជាយើង ជនជាតិយើង សម្ដេចតេជោលោកបានបញ្ជាក់ហើយថា ឲ្យលោកទុកចោលយ៉ាងម៉េច? បើអាមេរិកគេមិនព្រមអ៊ីចឹងខ្មែរយើងត្រូវតែទទួលយកហើយព្រោះជនជាតិយើង។ បើទៅប្រទេសគេ គេមិនព្រមទុកដោយសារតែគេចោទថា គាត់ធ្វើខុស អ៊ីចេះមួយអ៊ីចុះពីរ យើងត្រូវតែទទួល ហើយរឿងគាត់ឈ្នះក្ដីវិញយើងអបអរសាទរហើយដែលគាត់អាចវិលទៅរស់នៅជួបជុំសាច់ញាតិក្រុមគ្រួសារគាត់វិញនោះ។ វាជាការឈ្លាសវៃរបស់គាត់ហើយ ដែលគាត់យល់ថាការឲ្យមកនេះ មិនត្រឹមត្រូវ ហើយគាត់ប្ដឹងផ្ដល់រកយុត្តិធម៌ទៅតុលាការរបស់អាមេរិកវិញនោះ»។
កាលពីថ្ងៃអង្គារម្សិលមិញ ក្រុមតស៊ូមតិប្រឆាំងនឹងការបណ្ដេញចេញជនជាតិខ្មែរពីសហរដ្ឋអាមេរិកបានក្រើនរំឭកដល់ពលរដ្ឋខ្មែរ សហគមន៍ខ្មែរ នៅសហរដ្ឋអាមេរិកថា មន្ត្រីអនុវត្តច្បាប់អន្តោប្រវេសន៍ និងគយ ហៅកាត់ថា ICE ចាប់ផ្ដើមចាប់សមាជិកសហគមន៍ខ្មែរនៅក្នុងខែកុម្ភៈនេះ។ ក្រុមតស៊ូមតិបានប្រាប់ឲ្យអ្នកដែលទទួលបានបទបញ្ជាបណ្ដេញចេញ ឬអ្នកដែលត្រូវបានកោះហៅឲ្យធ្វើការទាក់ទងជាបន្ទាន់ទៅកាន់មេធាវីរបស់ពួកគេ។
មន្ត្រីអនុវត្តច្បាប់អន្តោប្រវេសន៍ និងគយ អាមេរិកបានឲ្យដឹងកាលពីចុងឆ្នាំមុនថា ការបណ្ដេញចេញខ្មែរអាមេរិកាំងមានការកើនឡើងរហូតដល់ ២៧៩ ភាគរយពីឆ្នាំ ២០១៧ ដល់ ២០១៨។ មានពលរដ្ឋខ្មែរប្រមាណ ១ ៩០០ នាក់នៅសហរដ្ឋអាមេរិកដែលមានបទបញ្ជាបណ្ដេញចេញដែលក្នុងនោះ ១ ៤០០ នាក់នៃពួកគេ គឺជាជនឧក្រិដ្ឋដែលត្រូវបានកាត់ទោសរួចហើយ៕