.jpg)
មន្ត្រី CMAC ពេលប្រមូលទុកគ្រាប់មីនដែលដោះបានកន្លងមក។ រូបថត CMAC
ភ្នំពេញ: យ៉ាងហោចណាស់មានជនរងគ្រោះស្លាប់ ពិការ និងរបួសសរុប ៦៦ នាក់ ដែលកើតឡើងដោយសារផ្ទុះគ្រាប់បណ្ដាលមកពីរានដីព្រៃមានមីនមកប្រើប្រាស់ ការកែច្នៃយុទ្ធភណ្ឌមិនទាន់ផ្ទុះ ការរុករកអនុផលព្រៃឈើ និងការបរបាញ់សត្វព្រៃខុសច្បាប់គិតចាប់ពីខែមករាដល់ដើមខែតុលាឆ្នាំនេះដោយចំនួននេះមានការកើនឡើងបើធៀបនឹងរយៈពេលដូចគ្នាកាលពីឆ្នាំមុន ដែលមានត្រឹមតែចំនួន ៤៣ នាក់។
តាមរបាយការណ៍របស់អាជ្ញាធរកម្ពុជាគ្រប់គ្រងសកម្មភាពកំចាត់មីន និងសង្គ្រោះជនពិការដោយមីន (អាជ្ញាធរមីន) ដែលភ្នំពេញប៉ុស្ដិ៍ទទួលបានកាលពីម្សិលមិញបង្ហាញថា អត្រាគ្រោះថ្នាក់ដោយសារការផ្ទុះមីន និងយុទ្ធភណ្ឌមានការកើនឡើងគួរឲ្យកត់សម្គាល់។
របាយការណ៍ដដែលបានបន្តថា៖ «ចាប់ពីខែមករាដល់ដើមខែតុលា ឆ្នាំ ២០១៩ មានជនរងគ្រោះស្លាប់ ពិការ និងរបួសសរុបចំនួន ៦៦ នាក់ដែលមានឧប្បត្តិហេតុគ្រោះថ្នាក់មីន និងសំណល់ជាតិផ្ទុះពីសង្គ្រាម (ស.ផ.ស) សេសសល់ពីសង្គ្រាមមានចំនួន ៤៦ ករណី។ តួលេខនេះបង្ហាញពីការកើនឡើងបើប្រៀបធៀបនឹងរយៈពេលដូចគ្នានៅក្នុងឆ្នាំ ២០១៨ ដែលមានឧប្បត្តិហេតុគ្រោះថ្នាក់បែបនេះត្រឹមតែ ២៩ ករណីប៉ុណ្ណោះ»។
របាយការណ៍បន្ថែមថាក្នុងចំណោមជនរងគ្រោះទាំង ៦៦ នាក់នេះគឺមានជនរងគ្រោះដោយសារមីនចំនួន ១៨ នាក់ និងសំណល់ជាតិផ្ទុះពីសង្គ្រាម (ស.ផ.ស) ៤៨ នាក់ដោយមានជនរងគ្រោះស្លាប់ចំនួន ១១ នាក់របួសចំនួន ៤៣ នាក់ និងពិការអវយវៈ ១២ នាក់។ ក្នុងនោះជនរងគ្រោះជាបុរសចំនួន ៤៥ នាក់ ក្មេងប្រុសអាយុក្រោម ១៨ ឆ្នាំចំនួន ១៥ នាក់ និងស្ត្រី ៦ នាក់។
លោក នី ញ៉ អនុប្រធាននាយកដ្ឋានសង្គ្រោះជនពិការដោយសារមីននៃអាជ្ញាធរមីនបានឲ្យដឹងកាលពីម្សិលមិញថា តួលេខនេះបានកើនឡើងគួរឲ្យបារម្ភព្រោះបើប្រៀបធៀបក្នុងរយៈពេលដូចគ្នាកាលពីឆ្នាំ ២០១៨ មានត្រឹមតែ ៤៣ នាក់ប៉ុណ្ណោះ ខណៈឆ្នាំ ២០១៩ នេះមាន ៦៦ នាក់ ។
លោកបានបន្តថា តាមការកត់សម្គាល់ ករណីគ្រោះថ្នាក់ដោយសារគ្រាប់មីន ឬយុទ្ធភណ្ឌមិនទាន់ផ្ទុះភាគច្រើនកើតឡើងនៅរដូវប្រាំងដោយជនរងគ្រោះបានដើរបរបាញ់សត្វក្នុងព្រៃ កែច្នៃគ្រាប់ (ដំលេង) ហើយនៅរដូវវស្សាគឺគ្រាន់តែខូចខាតគ្រឿងចក្រភ្ជួររាស់មួយចំនួន ឬរបួសបន្ដិចបន្ដួចតែប៉ុណ្ណោះ។
លោក នីញ៉ បានបញ្ជាក់ថា៖ «ខណៈនេះសង្គមស៊ីវិល និងរដ្ឋាភិបាលបាននិងកំពុងសហការគ្នាយ៉ាងជិតស្និទ្ធធ្វើការលើរឿងនេះ ជាពិសេសផ្សព្វផ្សាយអប់រំ ណែនាំ និងដាក់ចេញវិធានការជាច្រើនទៀត។ ខ្ញុំសូមអំពាវនាវសាធារណជន សូមកុំប៉ះពាល់គ្រាប់មីន ឬគ្រាប់មិនទាន់ផ្ទុះ ហើយប្រញាប់រាយការណ៍មកសមត្ថកិច្ចជំនាញដើម្បីដោះស្រាយ និងចាត់វិធានការការពារ»។
លោក ហេង រតនា អគ្គនាយកមជ្ឈមណ្ឌលសកម្មភាពកំចាត់មីនកម្ពុជា (CMAC) កាលពីម្សិលមិញមិនអាចទាក់ទងសុំការបញ្ជាក់បានទេ ដោយសារមិនមានអ្នកទទួលទូរស័ព្ទ។
តាមសេចក្ដីប្រកាសព័ត៌មានរបស់អាជ្ញាធរកម្ពុជាគ្រប់គ្រងសកម្មភាពកំចាត់មីន និងសង្គ្រោះជនពិការដោយសារមីនចុះថ្ងៃ ១៥ មីនាឆ្នាំនេះបានឲ្យដឹងថាលោក ហ៊ុន សែន នាយករដ្ឋមន្ត្រីកម្ពុជា និងជាប្រធានអាជ្ញាធរមីនបានអំពាវនាវដល់ពលរដ្ឋថា ដើម្បីបន្តកាត់បន្ថយគ្រោះថ្នាក់ដោយសារមីន និងយុទ្ធភណ្ឌមិនទាន់ផ្ទុះ៖ «ត្រូវរាយការណ៍ជាបន្ទាន់ឲ្យអាណាព្យាបាល សមត្ថកិច្ចនគរបាល អាជ្ញាធរមូលដ្ឋាន ឬអង្គភាពបោសសម្អាតមីនដែលនៅជិតបំផុតកន្លែងគ្រាប់មីន ឬគ្រាប់យុទ្ធភណ្ឌមិនទាន់ផ្ទុះដែលបងប្អូនក្មួយៗបានជួបប្រទះ ដោយកុំប៉ះពាល់វាជាដាច់ខាត»។
លោកនាយករដ្ឋមន្ត្រី ហ៊ុន សែន បន្តថា៖ «មិនត្រូវប្រើប្រាស់គ្រឿងចក្រធុនធ្ងន់ដើម្បីចូលធ្វើការរុករានដីព្រៃ ឬដីចម្ការដែលនៅមិនទាន់បានបោសសម្អាតមីនសំណល់ជាតិផ្ទុះពីសង្គ្រាម និងគ្រាប់បែកចង្កោមដែលអាចបង្កឲ្យមានគ្រោះថ្នាក់ ជាពិសេសគ្រោះថ្នាក់ដោយសារមីនតោន»។
ទោះយ៉ាងណាលោក នី ញ៉ បានបន្ថែមថាមានជនរងគ្រោះដោយសារមីនសរុបចំនួន ៦៤ ៨៤៤ នាក់ក្នុងនោះមនុស្សជិត ២ ម៉ឺននាក់បានស្លាប់ ហើយអ្នកដែលនៅរស់រានមានជីវិត ប៉ុន្ដែធ្លាក់ខ្លួនពិការមានជាង ៤ ម៉ឺននាក់គិតចាប់ពីឆ្នាំ ១៩៧៩ រហូតដល់ខែសីហា ឆ្នាំ ២០១៩ នេះ៕
