ភ្នំពេញៈ លោក ប្រាក់ សុខុន រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ និងលោក មិកាមិ ម៉ាសាហ៊ីរ៉ូ (MIKAMI Masahiro) ឯកអគ្គរាជទូតជប៉ុនប្រចាំកម្ពុជាបានចុះហត្ថលេខាលើលិខិតប្ដូរសារស្ដីពីការផ្ដល់ហិរញ្ញប្បទានឥតសំណងរបស់រដ្ឋាភិបាលជប៉ុនដែលមានទឹកប្រាក់ ២ ៤០៥ លានយ៉េនស្មើនឹងប្រមាណ ២២ លានដុល្លារ សម្រាប់អនុវត្តគម្រោង «ពង្រីកប្រព័ន្ធផ្គត់ផ្គង់ទឹកស្អាតនៅខេត្តពោធិ៍សាត់»។
នៅក្នុងអំឡុងពិធីចុះហត្ថលេខាលើលិខិតប្តូរសារស្តីពីជំនួយដែលធ្វើឡើងនៅថ្ងៃទី ០៤ ខែធ្នូ ឆ្នាំ ២០១៩ នៅក្រសួងការបរទេសកម្ពុជាលោក មិកាមិ ម៉ាសាហ៊ីរ៉ូ ថ្លែងថាតាមរយៈហិរញ្ញប្បទានឥតសំណងប្រមាណ ២២ លានដុល្លារអាមេរិក (២ ៤០៥ លានយ៉េន) ដែលបានចុះហត្ថលេខានាថ្ងៃនេះ ជប៉ុននឹងសាងសង់រោងចក្រប្រព្រឹត្តិកម្មទឹកស្អាត និងរៀបចំប្រព័ន្ធចែកចាយទឹកក្នុងក្រុងពោធិ៍សាត់។
លោកបន្តថា ទំនាក់ទំនងកិច្ចសហប្រតិបត្តិការរវាងជប៉ុន និងកម្ពុជាបាននិងកំពុងពង្រីកដល់វិស័យជាច្រើនដែលលោកគិតថាកិច្ចសហប្រតិបត្តិការទាំងនេះបានចូលរួមចំណែកក្នុងការអភិវឌ្ឍសេដ្ឋកិច្ច និងសង្គមកម្ពុជា ទោះបីជាតិចតួចក្តី។ ក្នុងនោះកិច្ចសហប្រតិបត្តិការក្នុងវិស័យផ្គត់ផ្គង់ទឹកស្អាត គឺជាវិស័យមួយគួរឲ្យកត់សម្គាល់សម្រាប់រយៈពេលដ៏វែង និងមានទំហំដ៏ធំតាមរយៈសមិទ្ធផលដែលសម្រេចបាន។
លោកបន្តថា អត្រាផ្គត់ផ្គង់ទឹកស្អាត និងគុណភាពទឹកនៅតំបន់ជាច្រើននៅក្នុងខេត្តក្រុងផ្សេងទៀតមានស្ថានភាពខ្វះខាតច្រើន។
លោកបញ្ជាក់ថា ក្រសួងឧស្សាហកម្ម និងសិប្បកម្មកម្ពុជាបានកំណត់គោលដៅនៃអត្រាផ្គត់ផ្គង់ទឹកស្អាតឲ្យបាន ១០០ ភាគរយនៅគ្រប់តំបន់ទូទាំងប្រទេសកម្ពុជាត្រឹមឆ្នាំ ២០២៥។ លោកបញ្ជាក់ថា៖ «ដូចនេះតាមរយៈគម្រោងនេះរំពឹងថា អត្រាផ្គត់ផ្គង់ទឹកស្អាតក្នុងក្រុងពោធិ៍សាត់ និងមានការកើនឡើង ហើយអត្រាផ្គត់ផ្គង់ទឹកស្អាតនៅទីក្រុងផ្សេងទៀតនឹងមានការអភិវឌ្ឍកាន់តែខ្លាំង»។
លោកឯកអគ្គរាជទូតជប៉ុនបានឲ្យដឹងដែរថា ទោះបីជាបច្ចុប្បន្ននេះកម្ពុជាមានការរីកចម្រើនគួរឲ្យកត់សម្គាល់ក៏ដោយ ក៏កម្ពុជានៅមានកិច្ចការជាច្រើនដែលត្រូវដោះស្រាយដើម្បីលើកកម្ពស់ជីវភាពប្រជាជន ដូចជាការផ្គត់ផ្គង់ទឹកស្អាត ប្រព័ន្ធទឹកកខ្វក់ បញ្ហាសំរាម និងការកកស្ទះចរាចរណ៍ជាដើម ហើយប្រទេសជប៉ុនសង្ឃឹមថានឹងអាចជួយដោះស្រាយបញ្ហាទាំងនោះបានដោយប្រើប្រាស់នូវគម្រោងកិច្ចសហប្រតិបត្តិការសេដ្ឋកិច្ចផ្សេងៗ។
ជាការឆ្លើយតបលោក ប្រាក់ សុខុន បានថ្លែងថា៖ «គម្រោងដែលបានចុះហត្ថលេខានៅថ្ងៃនេះ (ថ្ងៃពុធ) គឺដើម្បីសាងសង់រោងចក្រប្រព្រឹតិ្តកម្ម ទឹកស្អាតដែលអាចផ្គត់ផ្គង់ទឹកស្អាតចំណុះ ៦ ៦០០ ម៉ែត្រគុបក្នុង ១ ថ្ងៃ និងបណ្តាញ ៨៤ គីឡូម៉ែតកន្លះក្នុងនោះមានការតបញ្ចូលផ្ទះគ្រួសារពលរដ្ឋក្រីក្រប្រមាណ ២៥៧ គ្រួសារក្នុងខេត្តពោធិ៍សាត់ផងដែរ»។
លោកបន្ថែមថា តាមគម្រោងផែនការដំណើរការសាងសង់នឹងចាប់ផ្តើមនៅក្នុងខែវិច្ឆិកា ឆ្នាំ ២០២០ ហើយនឹងបញ្ចប់នៅខែកញ្ញា ឆ្នាំ ២០២២។
លោកថ្លែងទៀតថា តាំងនាមរដ្ឋាភិបាលកម្ពុជា និងប្រជាជនកម្ពុជា ជាពិសេសប្រជាជននៅក្នុងខេត្តពោធិ៍សាត៍ លោកសូមថ្លែងអំណរគុណចំពោះរាជរដ្ឋាភិបាលជប៉ុន និងប្រជាជនជប៉ុនចំពោះការផ្តល់ជំនួយដ៏មានសារៈសំខាន់នេះក្នុងការរួមចំណែកអភិវឌ្ឍផែនការយុទ្ធសាស្ត្រជាតិរបស់រាជរដ្ឋាភិបាលស្តីពីការផ្គត់ផ្គង់ទឹកស្អាត និងលើកកម្ពស់អនាម័យនៅជនបទចាប់តាំងពីឆ្នាំ ២០១៤-២០២៥៕