ភ្នំពេញៈ ដីកាចាប់ខ្លួនលោក សម រង្ស៊ី នឹងថ្នាក់ដឹកនាំអតីតគណបក្សសង្គ្រោះជាតិមួយចំនួនទៀតត្រូវបានបញ្ជូនទៅប្រទេសសមាជិកអាស៊ានរួចហើយ។
លោក កេត សោផាន់ អ្នកនាំពាក្យក្រសួងការបទេស និងសហប្រតិបត្តិការអន្តរជាតិបានថ្លែងប្រាប់កាលពីម្សិលមិញថា ដីកាចាប់ខ្លួនលោក សម រង្ស៊ី និងមនុស្សមួយចំនួនទៀតត្រូវបានបញ្ជូនទៅកាន់ប្រទេសសមាជិកអាស៊ានរួចហើយ។
លោក សោផាន់ ថ្លែងថា៖ «ការងារនេះស្ថិតក្នុងក្របខ័ណ្ឌនៃកិច្ចសហប្រតិបត្តិការអន្តរជាតិលើវិស័យព្រហ្មទណ្ឌ និងយុត្តិធម៌។ កម្ពុជាបានធ្វើកិច្ចការនេះតាមនីតិវិធីច្បាប់រួចហើយ»។
កាលពីសប្ដាហ៍មុនលោកនាយករដ្ឋមន្ត្រី ហ៊ុន សែន បានថ្លែងក្នុងសន្និសីទរួមជាមួយនាយករដ្ឋមន្ត្រីឡាវដោយលោកបញ្ជាក់ថា ប្រទេសឡាវ និងថៃ បានទទួលដីកាចាប់ខ្លួនលោក សម រង្ស៊ី រួចហើយ។
ឆ្លើយតបនឹងការបញ្ជូនដីកាទៅប្រទេសនៅតំបន់អាស៊ានលោក សម រង្ស៊ី បានថ្លែងប្រាប់តាមអ៊ីមែលកាលពីម្សិលមិញថា មានតែប្រទេស ២ ឬ ៣ ទេដែលនឹងសហការជាមួយលោក ហ៊ុន សែន ប្រឆាំងលើរូបលោក។
លោកថ្លែងថា៖ «ប្រទេសជិតខាងជាច្រើនមាននិន្នាការចាប់យកគោលការណ៍ប្រជាធិបតេយ្យ។ លោក ហ៊ុន សែន បានចូលដៃជាមួយចិនដែលជាប្រទេសមានគោលនយោបាយគឃ្លើន និងវាតទីដែលគំរាមដល់ប្រទេសជិតខាងជាច្រើនទៀត»។
ប៉ុន្តែលោក ផៃ ស៊ីផាន អ្នកនាំពាក្យរាជរដ្ឋាភិបាលបានថ្លែងថា ប្រទេសក្នុងតំបន់នឹងសហការជាមួយកម្ពុជាពីព្រោះលោកថា អំពើរបស់លោក សម រង្ស៊ី មិនមែនជារឿងនយោបាយទេ តែជាបទព្រហ្មទណ្ឌប្រឆាំងនឹងច្បាប់ខ្មែរ។
លោកថ្លែងថា៖ «ករណីរបស់ សម រង្ស៊ី មិនមែនរឿងនយោបាយទេ ជារឿងព្រហ្មទណ្ឌ ហើយមិនត្រឹមតែជាព្រហ្មទណ្ឌធម្មតាទេ គឺជាភេរវជនទៅទៀត ដែលបំផុសឲ្យបះបោរប្រឆាំងដែលនេះជាអំពើភេរវកម្ម។ ដូច្នេះអាស៊ានបានចុះហត្ថលេខារួមគ្នាប្រឆាំងនឹងអំពើភេរវកម្មនេះឯង។ ដូច្នេះរាល់ការមិនធ្វើសហប្រតិបត្តិការបានន័យថា ជាការជ្រៀតជ្រែកផ្ទៃក្នុងរបស់កម្ពុជា»។
លោក ផៃ ស៊ីផាន ថ្លែងថា៖ «វិធានការផ្លូវច្បាប់ដែលកម្ពុជាធ្វើគឺយោងលើអង្គហេតុ និងច្បាប់ ដោយសារសកម្មភាពទាំងអស់នោះធ្វើឲ្យប៉ះពាល់ដល់សន្តិសុខជាតិ»។
ស្របពេលជាមួយគ្នានេះតុលាការក្រុងភ្នំពេញបានចេញដីកាចាប់ខ្លួនលោក សម រង្ស៊ី មួយករណីទៀតគឺពាក់ព័ន្ធនឹងបទចោទ «ប្រមាថចំពោះអង្គព្រះមហាក្សត្រ»។ ការចេញដីកាចាប់ខ្លួនចុងក្រោយនេះធ្វើឡើងដោយលោក កូយ សៅ ចៅក្រមស៊ើបសួរសាលាដំបូងរាជធានីភ្នំពេញកាលពីថ្ងៃចន្ទទី ១៦ កញ្ញា។
ដីកាចាប់ខ្លួនរបស់លោក កូយ សៅ ធ្វើឡើងដោយយោងលើដីកាបញ្ជូនឲ្យឆ្លើយចុះថ្ងៃទី ១៦ កញ្ញា ដែលក្នុងដីកានោះតំណាងអយ្យការបានឯកភាពស្នើសុំឲ្យចៅក្រមស៊ើបសួរចេញដីកាបង្គាប់ឲ្យចាប់ខ្លួនលើជនត្រូវចោទ សម រង្ស៊ី។ ដីកាបង្គាប់ឲ្យចាប់ខ្លួននេះក៏យោងលើរបាយការណ៍របស់មន្ត្រីនគរបាលយុត្តិធម៌ដែលបានបញ្ជាក់ថា លោក សម រង្ស៊ី មិនស្ថិតនៅមូលដ្ឋានរបស់លោកក្នុងសង្កាត់ចាក់អង្រែលើ ខណ្ឌមានជ័យទេ។
ដីកាសរសេរថា៖ «ដូច្នេះតុលាការគប្បីចេញដីកាបង្គាប់ឲ្យចាប់ខ្លួនជនត្រូវចោទដើម្បីឲ្យជនត្រូវចោទរូបនេះមកបង្ហាញខ្លួនចំពោះមុខតុលាការដើម្បីរកការពិតក្នុងរឿងក្ដីនេះស្របតាមនីតិវិធីច្បាប់»។
លោក កូយ សៅ បញ្ជាដល់កងកម្លាំងសាធារណៈឲ្យស្រាវជ្រាវរកចាប់ និងនាំខ្លួនលោក សម រង្ស៊ី មកប្រគល់ជូនសាលាដំបូងរាជធានីភ្នំពេញដើម្បីចាត់ការតាមច្បាប់ និងប្រាប់ដល់ពន្ធនាគារឲ្យទទួលជនត្រូវចោទយកទៅឃុំផងដែរ។
កាលពីសប្ដាហ៍មុនលោក សម រង្ស៊ី ថ្លែងក្នុងកិច្ចសម្ភាសជាមួយវិទ្យុអាស៊ីសេរីនៅយប់ថ្ងៃទី ១២ កញ្ញា ថា ព្រះមហាក្សត្របច្ចុប្បន្នជា «អាយ៉ង» និងជា «ចំណាប់ខ្មាំង» របស់លោកនាយករដ្ឋមន្ត្រី ហ៊ុន សែន ហើយថាព្រះអង្គចង់រក្សារាជបល្ល័ង្ក។
អ្នកនាំពាក្យក្រសួងយុត្តិធម៌លោក គឹម សន្តិភាព បានថ្លែងពីម្សិលមិញថា លោក សម រង្ស៊ី អាចជាប់ទោសរហូតដល់ ១០ ឆ្នាំពាក់ព័ន្ធនឹងបទចោទ «ប្រមាថចំពោះអង្គព្រះមហាក្សត្រ» ដោយសារភាពមិនរាងចាលនៃការប្រព្រឹត្តបទល្មើស។
លោក គឹម សន្តិភាព ដែលជារដ្ឋលេខាធិការក្រសួងយុត្តិធម៌បានថ្លែងថា៖ «យោងតាមក្រមព្រហ្មទណ្ឌនៃព្រះរាជាណាចក្រកម្ពុជាមាត្រា ៨៣ មាត្រា ៨៨ មាត្រា ៤៣៧ ស្ទួន ទណ្ឌិតរូបនេះស្ថិតក្នុងភាពមិនរាងចាលនៃការប្រព្រឹត្តបទល្មើស បទប្រមាថចំពោះអង្គព្រះមហាក្សត្រ ហេតុនេះអតិបរមានៃទោសដាក់ពន្ធនាគារនឹងកើនឡើងទ្វេដងពី ៥ ឆ្នាំទៅ ១០ ឆ្នាំ ប្រសិនបើតុលាការរកឃើញនូវទោសកំហុសនេះម្តងទៀត!»។
ឆ្លើយតបនឹងការវិវឌ្ឍលើសំណុំរឿងនេះលោក សម រង្ស៊ី បានថ្លែងតាមអ៊ីមែលកាលពីម្សិលមិញថា៖ «ខ្ញុំចង់សើច ពីព្រោះយើងនឹងឃើញតុលាការអាយ៉ងបន្តចេញដីកាចាប់ខ្លួនមិនពិតប្រាកដកាន់តែច្រើនយ៉ាងវក់វីលើរូបខ្ញុំ ដោយគ្មានឥទ្ធិពលអ្វីទាំងអស់ ដោយសារតែខ្ញុំបានបញ្ចេញមតិប្រហាក់ប្រហែលគ្នានេះក្នុងគោលបំណងបើកឲ្យមានការជជែកដេញដោលបែបប្រជាធិបតេយ្យលើតួនាទីដ៏ចម្រូងចម្រាសនៃព្រះមហាក្សត្របច្ចុប្បន្ន»។
លោកក៏បានភ្ជាប់មកជាមួយនូវការលើកឡើងនានាពាក់ព័ន្ធនឹងតួនាទីរបស់ព្រះមហាក្សត្រដូចដែលលោកធ្លាប់បានលើកឡើងតាមបណ្ដាញហ្វេសប៊ុក និងធ្វីធើររបស់លោក៕