.jpg)
ឧកញ៉ា សុឹង សំអុល និងបក្ខពួក ពេលត្រូវបានចាប់ខ្លួន។ សហការី
មណ្ឌលគិរី: សាលាដំបូងខេត្តមណ្ឌលគិរីបានចេញដីកាបញ្ជាឲ្យជនជាតិចិន ២ នាក់ ដែលជាប្រធានក្រុមហ៊ុន ២ ផ្សេងគ្នាឲ្យចូលខ្លួនបំភ្លឺ ឲ្យបានមុនថ្ងៃទី ៩ ខែ សីហា ឆ្នាំ ២០១៩ ពាក់ព័ន្ធការប្រព្រឹត្តបទល្មើសព្រៃឈើ បន្ទាប់ពីតុលាការបានបញ្ជាឲ្យបុរសជនជាតិខ្មែរ ២ នាក់ ចូលបំភ្លឺនៅថ្ងៃនោះដែរ ខណៈមនុស្ស ៤ នាក់ ដែលជាបក្ខពួកឧកញ៉ា ស៊ឹង សំអុល កំពុងត្រូវបានសមត្ថកិច្ចតាមចាប់ខ្លួន។
តាមដីកាបញ្ជាឲ្យចូលខ្លួន របស់លោក ម៉ម វ៉ាន់ដា តំណាងអយ្យការ អមសាលាដំបូងខេត្តមណ្ឌលគិរី ចុះថ្ងៃទី ១៤ ខែ កក្កដា ដែលភ្នំពេញប៉ុស្ដិ៍ទទួលបាន កាលពីម្សិលមិញ សរសេរថា បញ្ជាឲ្យឈ្មោះ សុង វិនចាង (Song Wenzhang) អាយុ ៦៨ ឆ្នាំ ជាជនជាតិចិន កាន់លិខិតឆ្លងដែនលេខ G40387792 មានសុពលភាពដល់ថ្ងៃទី ២១ កុម្ភៈ ឆ្នាំ ២០២០ មុខរបរជាអគ្គនាយកក្រុមហ៊ុនថាច់វូដ (ខេមបូឌា) មានស្នាក់ការនៅសង្កាត់ភ្នំពេញថ្មី រាជធានីភ្នំពេញ។ ចំណែកម្នាក់ទៀតឈ្មោះ ចាង វិនតាវ (Wentao Zhang) ជនជាតិចិន ជានាយកក្រុមហ៊ុនយ៉ានចាវ (ខេមបូឌា) មានទីស្នាក់ការនៅសង្កាត់កាកាប ខណ្ឌពោធិ៍សែនជ័យ រាជធានីភ្នំពេញ។
ដីកាបញ្ជាក់ថា៖ «ឲ្យចូលបង្ហាញខ្លួន នៅបញ្ជាការដ្ឋានកងរាជអាវុធហត្ថខេត្តមណ្ឌលគិរី ឲ្យបានមុនថ្ងៃទី ៩ ខែ សីហា ឆ្នាំ ២០១៩ នៅរៀងរាល់ម៉ោងធ្វើការ ដើម្បីសាកសួរអំពីករណី លាក់កំបាំងវត្ថុតាង ប្រមូល ដឹកជញ្ជូន និងសន្និធិផលអនុផលព្រៃឈើ ដោយគ្មានលិខិតអនុញ្ញាត និងប្រើប្រាស់គ្រឿងចក្រមិនមានបិទសញ្ញាសម្គាល់រដ្ឋបាលព្រៃឈើ»។
លោក កែន សិរីរដ្ឋា ប្រធានអង្គការសមាគមអភិរក្សសត្វព្រៃនៅកម្ពុជា (WCS) បានសាទរ ចំពោះចំណាត់ការនេះ ដោយលោកថា ពេលនេះ សកម្មភាពកាប់បំផ្លាញព្រៃឈើនៅខេត្តមណ្ឌលគិរីទាំងមូលបាននិងកំពុងស្ងប់ស្ងាត់ល្អណាស់ ព្រោះគណៈកម្មការជាតិដើម្បីទប់ស្កាត់ និងបង្ក្រាបបទល្មើសធនធានធម្មជាតិ បានផ្ដាច់ចរន្ដទីផ្សារទិញលក់ឈើ នៅក្នុងខេត្តមណ្ឌលគិរី ប៉ុន្ដែលោកមិនទាន់សង្ឃឹម ១០០ ភាគរយ ថា គ្មានបទល្មើសព្រៃឈើកើតមាននៅក្នុងខេត្តនេះ នៅថ្ងៃក្រោយទៀតនោះទេ។
លោកបន្តថា លោកក៏ដូចជាប្រជាពលរដ្ឋមូលដ្ឋានដែរ ចង់ឲ្យមានការស្រាវជ្រាវ និងស៊ើបអង្កេតជាលក្ខណៈឯករាជ្យ ដើម្បីស្វែងរកអ្នកពាក់ព័ន្ធថែមទៀត ឬថាតើវាមានការពាក់ព័ន្ធកម្រិតណា?
ព្រោះមហាជននៅតែបន្តតាមដានសំណុំរឿងនេះ ចាប់តាំងដើមរហូតមក ហើយកន្លងមក មន្ត្រីរបស់លោកធ្លាប់រាយការណ៍ពីករណីកាប់បំផ្លាញព្រៃឈើនេះដែរ ប៉ុន្ដែមិនសូវមានប្រសិទ្ធភាពទេ។
លោកបញ្ជាក់ថា៖ «ខ្ញុំគិតថា វាជាឱកាសមួយរបស់គណៈកម្មការជាតិ ដើម្បីទប់ស្កាត់ និងបង្ក្រាបបទល្មើស ធនធានធម្មជាតិបង្ហាញស្នាដៃ និងក៏ជាការអង្កេតមួយរបស់មហាជនថា តើការ អនុវត្តច្បាប់របស់គណៈកម្មការហ្នឹង ស្ថិតនៅក្នុងក្របខ័ណ្ឌភ្លើងចំបើង ឬក៏រងើកភ្លើងធ្យូង ប៉ុន្ដែមួយរយៈនេះ គឺស្ងាត់មែន ខ្ញុំក៏បាននៅខេត្តមណ្ឌលគិរីមួយរយៈដែរ ហើយអ្វីដែលយើងចង់បានបន្តទៀត គឺអ្នកពាក់ព័ន្ធផ្សេងៗទៀត»។
លោក ម៉ម វ៉ាន់ដា កាលពីថ្ងៃទី ១១ ខែ កក្កដា បានបញ្ជាឲ្យឈ្មោះ ណេង ម៉ៅ ភេទប្រុស អាយុ ៥០ ឆ្នាំ មុខរបរជាអ្នកចាត់ចែងប្រមូលឈើឲ្យក្រុមហ៊ុន ម៉ាស្ទ័រខេសាន់ មានទីលំនៅបច្ចុប្បន្ន ភូមិក្បាលស្នួល ឃុំស្នួល ស្រុកស្នួល ខេត្តក្រចេះ និងបញ្ជាឲ្យឈ្មោះ សាំង សុខុន ភេទប្រុស អាយុ ២៧ ឆ្នាំ មុខរបរជាអ្នកចាត់ចែងរបស់ក្រុមហ៊ុនម៉ាស្ទ័រខេសាន់មានទីលំនៅបច្ចុប្បន្ន ភូមិកោះសំរោង ឃុំកោះសំរោង ស្រុកកំពង់សៀម ខេត្តកំពង់ចាម។
ដីកាលោក ម៉ម វ៉ាន់ដា បញ្ជាក់ថា៖ «អ្នកទាំង ២ ត្រូវចូលបង្ហាញខ្លួន នៅបញ្ជាការដ្ឋានកងរាជអាវុធហត្ថខេត្តមណ្ឌលគិរី ឲ្យបានមុនថ្ងៃទី ៩ ខែ សីហា ឆ្នាំ ២០១៩ នៅរៀងរាល់ម៉ោងធ្វើការដើម្បីសាកសួរអំពីករណី ប្រមូលដឹកជញ្ជូន និងសន្និធិផល និងអនុផលព្រៃឈើដោយគ្មានលិខិតអនុញ្ញាត»។
គួររំឭកថា រហូតមកដល់ពេលនេះ មានមនុស្សទាំងជនជាតិខ្មែរ និងចិន សរុបចំនួន ៨ នាក់បន្ថែមទៀត ត្រូវបានសមត្ថកិច្ចតាមចាប់ខ្លួន និងត្រូវតុលាការបញ្ជាឲ្យចូលខ្លួនបំភ្លឺជុំវិញករណីបទល្មើសព្រៃឈើពាក់ព័ន្ធជាមួយឧកញ៉ា ស៊ឹង សំអុលដែលត្រូវបានតុលាការសម្រេចឃុំខ្លួនរួចហើយ ខណៈដែលជនជាតិវៀតណាម ២ នាក់ និងខ្មែរ ៣ នាក់ ក្នុងបទល្មើសព្រៃឈើមួយផ្សេងទៀត ត្រូវបានតុលាការចោទប្រកាន់ និងបញ្ជូនទៅឃុំខ្លួន កាលពីថ្ងៃទី ១៥ ខែកក្កដា។
ពាក់ព័ន្ធនឹងការបង្ក្រាបបទល្មើសព្រៃឈើនៅថ្ងៃទី ១៣-១៤ ខែ កក្កដា ឆ្នាំ ២០១៩ កម្លាំងអាវុធហត្ថខេត្តព្រះវិហារ បានសហការជាមួយមន្ត្រីជំនាញ មន្ទីរបរិស្ថាន និងខណ្ឌរដ្ឋបាលព្រៃឈើព្រះវិហារចុះទៅចំណុច ភូមិសាស្ត្រស្រុកជាំក្សាន្ត ដើម្បីការពារជំនាញមន្ទីរបរិស្ថានធ្វើការវាស់វែងឈើ សម្រាប់សាងសង់ផ្ទះរបស់អតីតយុទ្ធជន និងស្រាវជ្រាវពិនិត្យឯកសារពាក់ព័ន្ធព្រមទាំងទីតាំងដែលបានយកឈើពីដីសម្បទានសង្គមកិច្ច។
បច្ចុប្បន្នកម្លាំងជំនាញបានធ្វើការវាស់វែងសម្រេចបាន ឈើត្បែងចំនួន ៩៥០ កំណាត់ ស្មើនឹង ៤៥,១៦២ ម៉ែត្រគុប ឈើខ្លុងចំនួន ៧១៩ កំណាត់ ស្មើនឹង ២៨,៦០៨ ម៉ែត្រគុប ឈើត្រាចចំនួន ៨០ កំណាត់ ស្មើនឹង ៥,៥៧៦ ម៉ែត្រគុប ឈើផ្ចិកចំនួន ១១៨ កំណាត់ ស្មើនឹង ១៤,៤២០ ម៉ែត្រគុប និងប្រភេទឈើផ្សេងៗជាច្រើនទៀត។ បច្ចុប្បន្ន វត្ថុតាងត្រូវបានសមត្ថកិច្ចថែរក្សាទុក ដើម្បីរង់ចាំគោលការណ៍ពីរដ្ឋមន្ត្រីបរិស្ថាន៕
