.jpg)
កញ្ញា ស៊ិន ចាន់ពៅរ៉ូហ្សេត អតីតចៅសង្កាត់អូរចាក្នុងក្រុងបាត់ដំបងត្រូវតុលាការកោះហៅ។ ហ្វេសប៊ុក
ភ្នំពេញៈ តុលាការខេត្តបាត់ដំបង បានកោះហៅមន្ត្រីអតីតគណបក្សសង្គ្រោះជាតិ ៥ រូប ឲ្យចូលបំភ្លឺក្នុងនាម «ជនសង្ស័យ» នៅថ្ងៃព្រហស្បតិ៍សប្ដាហ៍ក្រោយពាក់ព័ន្ធនឹងដំណើរ រឿង «ប្រឆាំង នឹងសាលដីការបស់តុលាការកំពូល» ដែលបានសម្រេចរំលាយអតីតគណបក្សប្រឆាំង។
បើតាមលោក ជា ជីវ ប្រធានប្រតិបត្តិ នៃអតីតបក្សសង្គ្រោះជាតិខេត្តបាត់ដំបងបានឲ្យដឹងថា មនុស្សទាំង ៥ នាក់ ដែលត្រូវបានកោះហៅនោះ រួមមានអតីតចៅសង្កាត់អូរចា កញ្ញា ស៊ិន ចាន់ពៅរ៉ូហ្សេត លោក ម៉ក់ រ៉ា អតីតចៅសង្កាត់ទួលតាឯក និងលោក ឃួន ចំរើន អតីតចៅសង្កាត់ចំការសំរោង ស្ថិតក្នុងក្រុងបាត់ដំបង។
ដីកាកោះហៅចេញដោយតំណាងអយ្យការលោក គី ប៊ុណ្ណារ៉ា ចុះថ្ងៃទី ២៤ ខែ មេសា បានកោះហៅឲ្យអ្នកទាំង៣ចូលទៅតុលាការ នៅម៉ោង ៨ ព្រឹកថ្ងៃទី ៩ ខែ ឧសភា សប្ដាហ៍ក្រោយ «ដើម្បីសាកសួរពីដំណើររឿង៖ ប្រឆាំងនឹងសាលដីការបស់តុលាការកំពូល លេខ ៣៤០ (ឆ) ចុះថ្ងៃទី ១៦ ខែ វិច្ឆិកា ឆ្នាំ ២០១៧»។
យោងតាមដីការបស់អយ្យការ សំណុំរឿងនេះត្រូវចុះថ្ងៃទី ២៣ មេសា ហើយនៅថ្ងៃទី ២៤ មេសា តុលាការបានចេញដីកានេះ ទៅជនដែលត្រូវបានកោះហៅ។ ដីកានេះ បានទៅដល់អធិការដ្ឋាននគរបាលក្រុងបាត់ដំបងនៅថ្ងៃទី ២៩ ខែ មេសា។
តំណាងអយ្យការ លោក គី ប៊ុណ្ណារ៉ា បានបដិសេធធ្វើអត្ថាធិប្បាយកាលពីម្សិលមិញដោយលោកប្រាប់ឲ្យសួរទៅតុលាការ ខណៈដែលលោក អ៊ុច សុខុន ស្នងការខេត្តបាត់ដំបង មិនអាចទាក់ទងបាន។
លោក ឆាង វ៉ាន់ឆៃ អធិការក្រុងបាត់ដំបង បានថ្លែងយ៉ាងខ្លីកាលពីម្សិលមិញថា លោកមិនអាចអត្ថាធិប្បាយបានទេ លោកគ្រាន់តែអនុវត្តតាមដីការបស់តុលាការប៉ុណ្ណោះ។
នៅពេលទាក់ទងតាមទូរស័ព្ទកាលពីម្សិលមិញ កញ្ញា រ៉ូហ្សេត បាននិយាយថា កញ្ញានឹងចូលទៅបំភ្លឺតាមការកោះហៅរបស់តុលាការ។ ប៉ុន្តែកញ្ញានិយាយថា កញ្ញាមិនបានដឹងមូលហេតុអ្វីដែលនាំឲ្យមានការចេញដីកាកោះហៅទេ។
រ៉ូហ្សេត បានចោទសួរថា៖ «តើជាង ១ ឆ្នាំនេះ ខ្ញុំជាអតីតចៅសង្កាត់អូរចារទៅធ្វើអ្វីដែលប៉ះពាល់ដល់ប្រទេសជាតិ ដែលនាំឲ្យមានការកោះហៅ។ សូមបងប្អូនតាមដាន។ សកម្មភាពខ្ញុំក្រោយពេលរំលាយគណបក្សគឺបើកហាងលក់នំបញ្ចុករហូតដល់គេចោទថា កន្លែងខ្ញុំ ឧទ្ទាមធ្វើឲ្យខ្ញុំលក់លែងដាច់ ហើយបែកគំនិតទៅរកស៊ីលក់អីវ៉ាន់តាមអនឡាញម៉ៅចម្ការផ្លែឈើដើម្បីផ្គត់ផ្គង់គ្រួសារ មានលុយបង់ធនាគារ»។
កញ្ញានិយាយថា ការដែលតុលាការ ចេញដីកាកោះនេះ គឺជារឿងបំបាក់ស្មារតីកញ្ញា និងអ្នកផ្សេងទៀត។ កញ្ញានិយាយថា នៅលើបណ្ដាញសង្គម កញ្ញាមិនបាននិយាយអ្វីធ្វើឲ្យប៉ះពាល់ដល់សាលដីកាទេ គ្រាន់តែបញ្ចេញមតិយោបល់ ក្នុងនាមពលរដ្ឋដែលមានសិទ្ធិរិះគន់អ្នកនយោបាយ។
កញ្ញានិយាយថា៖ «ខ្ញុំមានការភ្ញាក់ផ្អើលទាក់ទងនឹងដំណើររឿងប្រឆាំងសាលដីការបស់តុលាការកំពូល ខ្ញុំភ្ញាក់ផ្អើលថា ខ្ញុំប្រឆាំងអី ហើយប្រឆាំងយ៉ាងម៉េច។ ខ្ញុំនឹងចូលទៅតុលាការផ្ទាល់តុលាការសួរអីខ្ញុំនឹងឆ្លើយប្រាប់តាមអ្វីដែលតុលាការសួរ។ ខ្ញុំមានតែ ២ នាក់ ម្ដាយ និងកូន ម្ដាយខ្ញុំគាត់បារម្ភ គាត់តក់ស្លុត។ តែសម្រាប់ខ្ញុំវាធម្មតាទេ បើតុលាការកោះហៅខ្ញុំក៏ដូចមនុស្សទូទៅ មានការភ័យខ្លាចហើយ ខ្លាចមានគុកមានច្រវាក់ ឬមានការឃុំឃាំង ប៉ុន្តែខ្ញុំសម្រេចចិត្តចូលតាមអ្វីដែលតុលាការកោះហៅ»។
កញ្ញាលើកឡើងថា កញ្ញាបានគោរពតាមដីការបស់តុលាការកំពូលដោយសុខចិត្តដើរចេញពីតំណែងដែលពលរដ្ឋបានបោះឆ្នោតឲ្យ។ កញ្ញាបានលើកជាសំណួរទៀតថា៖ «រហូតដល់ជាង ១ ឆ្នាំ ទើបមានដីកាកោះហៅថា ប្រឆាំងតុលាការ តើខ្ញុំប្រឆាំងកន្លែងណា ខ្ញុំទៅបាតុកម្មកន្លែងណា ខ្ញុំទៅហិង្សាកន្លែងណា និងញុះញង់កន្លែងណា»។
ចំណែក លោក ឃួន ចំរើន អតីតចៅសង្កាត់ចំការសំរោង បានថ្លែងពីម្សិលមិញថា លោកក៏មិនដឹងរឿងហេតុដែលនាំឲ្យមានការកោះហៅដែរ។ លោកនិយាយថា៖ «រកនឹកមិនទាន់ឃើញមិនដឹងថា គេថា ខ្ញុំយ៉ាងណា ព្រោះខ្ញុំមិនដែលទៅណាផងខ្ញុំនៅតែផ្ទះមិនមានសកម្មភាពអីទាំងអស់សួរមេឃុំមេស្រុកនេះក៏ដឹងដែរ»។
លោក ជា ជីវ និយាយថា លោកក៏មិនដឹងថា មានរឿងអ្វីដែលបណ្ដាលឲ្យមានការកោះហៅនេះដែរ។ ប៉ុន្តែលោកសង្ស័យលើវីដេអូមួយដែលរ៉ូហ្សេតបានបង្ហោះគាំទ្រលោក សម រង្ស៊ី ឡើងជាប្រធានបក្សស្តីទីរបស់អតីតគណបក្សសង្គ្រោះជាតិ។ លោកថា នៅក្នុងវីដេអូនោះ មានមនុស្សទាំង៣ដែលត្រូវបានកោះហៅ ក្នុងចំណោមមនុស្សប្រមាណ៨នាក់។
លោក ឆាយ គឹមខឿន អ្នកនាំពាក្យអគ្គស្នងការនគរបាលជាតិ បានឲ្យដឹងកាលពីម្សិលមិញថា តាមអ្វីដែលលោកទទួលបានមិនទាន់ផ្លូវការគឺថា សំណុំរឿងនេះធ្វើឡើងតាមបណ្ដឹងរបស់អាជ្ញាធរ ដែលបានប្ដឹងពួកគេតាំងពីមុនបោះឆ្នោត ២៩ កក្កដាឆ្នាំមុន។ លោកថារឿងខ្លះពាក់ព័ន្ធនឹងយុទ្ធនាការម្រាមដៃស្អាត និងការគាំទ្រភ្លើងទៀន។ លោកបន្តថា បណ្ដឹងនោះមិនមែនទៅពីខាងនគរបាលទេ៕
