តាកែវៈ មន្ត្រីនគរបាលថ្នាក់ឧត្តមសេនីយ៍ផ្កាយ ១ ម្នាក់ ដែលមានតួនាទីជាអនុប្រធាននាយកដ្ឋានអង្គភាពកិច្ចការប៉ុស្តិ៍នគរបាលរដ្ឋបាល ត្រូវបានសាលាដំបូងខេត្តតាកែវ ចេញដីកាកោះហៅឲ្យចូលខ្លួនទៅបំភ្លឺនៅខែនេះ ពីបទគំរាមកំហែងថានឹងធ្វើឲ្យខូចខាតទ្រព្យសម្បត្តិអ្នកដទៃដោយបញ្ជាឲ្យបំពេញលក្ខខណ្ឌ និងបទគំរាមកំហែងដោយបញ្ជាឲ្យបំពេញលក្ខខណ្ឌអ្វីមួយ តាមបណ្តឹងរបស់កម្មករផ្នែកគ្រឿងចក្រមួយក្រុមនៃក្រុមហ៊ុនមួយ។
ដីកាកោះចេញដោយតំណាងអយ្យការអមសាលាដំបូងខេត្តតាកែវលោកទេព មុនិន្ទ ចុះថ្ងៃថ្ងៃទី ១៩ ខែ ឧសភា ដែលទើបផ្សព្វផ្សាយថ្មីៗនេះ បានកោះអញ្ជើញឈ្មោះ ឆាន សិទ្ធី ភេទប្រុស អាយុ ៥១ ឆ្នាំ ជាជនសង្ស័យ ស្ថិតនៅភូមិខ្នារ ឃុំក្រាំងធ្នង់ ស្រុកបាទី ខេត្តតាកែវ ឲ្យចូលខ្លួនមកកាន់អយ្យការអមសាលាដំបូងខេត្តតាកែវ (បន្ទប់ព្រះរាជអាជ្ញារងលេខ ៦) នៅថ្ងៃទី ១៩ ខែ មិថុនា ឆ្នាំ ២០១៩ វេលាម៉ោង ៨ ព្រឹកដើម្បីសាក សួរបំភ្លឺ។
ដីកាកោះនោះបញ្ជាក់ថា៖ «ពីដំណើររឿងគំរាមកំហែងថានឹងធ្វើឲ្យខូចខាតទ្រព្យសម្បត្តិអ្នកដទៃដោយបញ្ជាឲ្យបំពេញលក្ខខណ្ឌ និងបទគំរាមកំហែងដោយបញ្ជាឲ្យបំពេញលក្ខខណ្ឌអ្វីមួយ។ សាមីខ្លួនត្រូវអញ្ជើញតាមដីកាកោះនេះឲ្យបានទាន់ពេលវេលា និងយកលិខិតផ្សេងៗ ដែលទាក់ទងនឹងរឿងខាងលើមកជាមួយផង ប្រសិនបើមាន»។
លោក ឆាន សិទ្ធី ដែលមានតួនាទីជាអនុប្រធាននាយកដ្ឋានកិច្ចការប៉ុស្តិ៍នគរបាលនៃអគ្គស្នងការនគរបាលជាតិ ត្រូវបានក្រុមកម្មករផ្នែកគ្រឿងចក្រចំនួន ៤ រូប ដាក់ពាក្យប្តឹងទៅតុលាការ កាលពីថ្ងៃទី ២៣ ខែ ឧសភា ឆ្នាំ ២០១៩។
ពួកគេអះអាងថា កាលពីថ្ងៃទី ២២ ខែ មេសា ឆ្នាំ២ ០១៩ វេលាម៉ោងប្រហែល ២ៈ០០ នាទីរសៀល ពួកគាត់ទាំង ៤ នាក់ បានប្រើប្រាស់គ្រឿងចក្រចំនួន ៤ គ្រឿង ដើម្បីចុះស្ដារប្រឡាយមួយកន្លែងដែលមានទីតាំងស្ថិតនៅភូមិខ្នារ ឃុំក្រាំងធ្នង់ ស្រុកបាទី ខេត្ដតាកែវ។ ខណៈដែលកំពុងតែធ្វើការក៏ស្រាប់តែលោក ឆាន សិទ្ធី និងបក្ខពួក បានមកហាមឃាត់ និងបានដកហូតសោគ្រឿងចក្រ របស់ពួកគាត់អស់ចំនួន ២ គ្រឿង ព្រមទាំងបានស្រែកគំរាមកំហែងខ្លាំងៗ ជាហេតុធ្វើឲ្យពួកគាត់មានការភ័យខ្លាច ក៏បានផ្អាកសកម្មភាពតាមការគំរាមកំហែងរបស់ឈ្មោះ ឆាន សិទ្ធី និងបក្ខពួក។
ពាក្យបណ្តឹងបន្តថាមួយសន្ទុះក្រោយមក បុគ្គលឈ្មោះ ឆាន សិទ្ធី បានបញ្ជាឱ្យបក្ខពួករបស់ខ្លួនចំនួន ២ នាក់ មកប៉ុនប៉ងដុតកម្ទេចគ្រឿងចក្ររបស់ពួកគាត់ ដោយបក្ខពួកខាងលើ បានមកស្រែកគំរាមថា «យកដបសាំងមកដុតអាអ៊ិច[គ្រឿងចក្រ]ហ្នឹងចោល»។ ជនបង្កទាំង ២ រូបនេះ មានម្នាក់បានកាន់កាំបិតផ្គាក់ និងម្នាក់ទៀតកាន់ដបសាំងផងដែរ។
ជាមួយគ្នានេះជនទាំង ២ នាក់ បានគំរាមដល់ពួកគាត់ ដោយបានយកដបប្រេងសាំងនោះបោក និងដុតទៅលើព្រៃដែលនៅជិតនឹងគ្រឿងចក្រ ស្ថិតនៅក្បែរការដ្ឋានរបស់ពួកគាត់។ នៅពេលនោះដោយមានការភ័យខ្លាចខូចខាតទ្រព្យសម្បត្ដិ ពួកគាត់ក៏បានបញ្ឈប់សកម្មភាព និងបានបញ្ចៀសគ្រឿងចក្រ ចេញទៅកន្លែងមានសុវត្ថិភាព។
ពាក្យបណ្តឹងបានបន្ថែមថា លុះស្អែកឡើងគឺនៅថ្ងៃទី ២៣ ខែ មេសា ឆ្នាំ ២០១៩ ម៉ោងប្រហែលជា ៧ៈ០០ នាទីព្រឹក ពួកគាត់ក៏បានសម្រេចដាក់គ្រឿងចក្រចុះបន្ដការងារស្ដារប្រឡាយនោះទៀត ក៏ស្រាប់តែជនបង្កឈ្មោះឆាន សិទ្ធី ដដែល បានមកគំរាមកំហែងជាថ្មីម្តងទៀត ដើម្បីឲ្យពួកគាត់បញ្ឈប់សកម្មភាពកាយប្រឡាយនេះតទៅទៀត។ ជននោះបានគំរាមថា បើមិនឈប់ទេ នឹងបាញ់សម្លាប់ពួកគាត់ ដែលនៅពេលនោះជនបង្កក៏មានកាំភ្លើង ១ ដើមជាប់នឹងចង្កេះមកជាមួយផងដែរ។
លោក ឆាន សិទ្ធី ដែលរងការចោទប្រកាន់ និងការកោះហៅពីតុលាការ មិនអាចទាក់ទងបានទេ ដោយលោក បានចុះបេសកកម្មទៅប្រទេសវៀតណាម។
ប៉ុន្តែ លោក អីុង សំអុល ប្រធាននាយកដ្ឋានកិច្ចការប៉ុស្តិ៍នគរបាលនៃអគ្គស្នងការនគរបាលជាតិ ប្រាប់ភ្នំពេញប៉ុស្តិ៍ថា ការកោះហៅមន្ត្រីរូបនេះ គឺមិនពាក់ព័ន្ធ ឬប៉ះពាល់ដល់ស្ថាប័ននោះទេ ព្រោះករណីនេះ គឺជារឿងបុគ្គល ខណៈលោកអះអាងថា ការចោទប្រកាន់ពីពលរដ្ឋទាំង ៤ នាក់នោះ ក៏មិនប្រាកដថា ត្រឹមត្រូវនោះដែរ ព្រោះវាកំពុងស្ថិតក្នុងនីតិវិធីរបស់តុលាការនៅឡើយ។
លោកបញ្ជាក់ថា៖ «ប្រជាពលរដ្ឋមានភាពស្មើភាពគ្នា ចំពោះមុខច្បាប់ បើយើងធ្វើខុសច្បាប់ គេហៅហើយ។ គេហៅទៅសាកសួរ មិនទាន់បានដឹងថា ខុសត្រូវទេ ប៉ុន្ដែគេហៅទៅសួរមើល៍ ព្រោះគាត់មានកាតព្វកិច្ចត្រូវឆ្លើយជាមួយគេ។ បើគាត់បានធ្វើដូចគេចោទថា បានយកកាំភ្លើងទៅគំរាមកំហែងដូចគេថាហ្នឹង គឺខុសច្បាប់ហើយ។ ប៉ុន្តែខ្ញុំគិតថា គាត់អត់មានធ្វើអ៊ីចឹងទេ ព្រោះគាត់អត់មានកាំភ្លើងផង ហើយកាំភ្លើងហ្នឹងទាល់តែគាត់ចុះបេសកកម្ម ទើបបានមាន តែបើមិនមែនបេសកកម្មផង ម៉េចគាត់មាន?»។
ពាក់ព័ន្ធនឹងករណីនេះដែរ លោកឆាន សិទ្ធី ក៏ធ្លាប់ត្រូវបានប្រជាពលរដ្ឋចំនួន ១០ គ្រួសារ រស់នៅក្នុងភូមិខ្នារ ឃុំក្រាំងធ្នង់ ស្រុកបាទី ខេត្ដតាកែវ ប្តឹងទៅអាជ្ញាធរស្រុកបាទី និងមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្តតាកែវ ដើម្បីទប់ស្កាត់កុំឲ្យមន្ត្រីរូបនេះយកដីប្រជាពលរដ្ឋដែលកាន់កាប់ និងអាស្រ័យផល តាំងពីឆ្នាំ ១៩៩៧ ទៅចុះបញ្ជីធ្វើជាកម្មសិទ្ធិផ្ទាល់ខ្លួនផងដែរ៕