.jpg)
តុលាការកំពូលកាលពីម្សិលមិញបានប្រកាសសាលដីកាកំបាំងមុខ ដោយបង្គាប់ឲ្យសាលាឧទ្ធរណ៍ ជម្រះក្ដីឡើងវិញ ព្រោះតែភ័ស្ដុតាងមិនច្បាស់លាស់ក្នុងសំណុំរឿង។ ហុង មិនា
ភ្នំពេញៈ តុលាការកំពូលកាលពីម្សិលមិញបានប្រកាសសាលដីកាកំបាំងមុខ ដោយបង្គាប់ឲ្យសាលាឧទ្ធរណ៍ ជម្រះក្ដីឡើងវិញ ព្រោះតែភ័ស្ដុតាងមិនច្បាស់លាស់ក្នុងសំណុំរឿងសម្លាប់មនុស្សដែលត្រូវបានផ្ដន្ទាទោសដាក់ពន្ធនាគារ ១ ជីវិត។
ជនជាប់ចោទឈ្មោះ មុំ នី អាយុ ៥៣ ឆ្នាំ ត្រូវបានតុលាការថ្នាក់ក្រោមផ្ដន្ទាទោសដាក់គុក ១ ជីវិត ដោយជាប់ចោទពីបទសម្លាប់មនុស្សកាលពីឆ្នាំ ២០១១ នៅភូមិឈើទាលភ្លោះ ឃុំព្រែកសាម៉ាន់ ស្រុកឆ្លូង ខេត្តក្រចេះ។ ប៉ុន្តែជនជាប់ចោទបានឆ្លើយបដិសេធថា ខ្លួនមិនបានបាញ់សម្លាប់ជនរងគ្រោះឈ្មោះ ឌី សាវី ហៅ ឡោះ នោះទេ។
លោកចៅក្រម គង់ ស្រ៊ីម បានអានសាលដីកាកំបាំងមុខជនជាប់ចោទនៅក្នុងបន្ទប់សវនាការពីម្សិលមិញបានឲ្យដឹងថា៖ «នៅក្នុងសំណុំរឿងនេះមិនមានភ័ស្តុតាងណាមួយច្បាស់លាស់ទេ និងជាភ័ស្តុតាងប្រយោលតែប៉ុណ្ណោះ ព្រោះសាក្សីមិនបានឃើញសកម្មភាពប្រព្រឹត្តរបស់ជនជាប់ចោទជាក់ស្តែងទេ។
តែតុលាការថ្នាក់ក្រោមយកភ័ស្តុតាងប្រយោលនេះមកធ្វើជាសំអាងហេតុក្នុងការចោទប្រកាន់លើជនជាប់ចោទដោយប្រយោលលើភាពមិនច្បាស់លាស់បែបនេះ តុលាការកំពូលសម្រេចបង្វិលទៅសាលាឧទ្ធរណ៍ឲ្យជំនុំជម្រះឡើងវិញម្តងទៀត»។
លោកចៅក្រមបានឲ្យដឹងថា ជនជាប់ចោទបានឆ្លើយបដិសេធថា គេមិនបានបាញ់សម្លាប់ជនរងគ្រោះឈ្មោះ ឌី សាវី ហៅ ឡោះ នោះទេ។ ជនជាប់ចោទថា គេធ្លាប់មានទំនាស់ជាមួយជនរងគ្រោះ ប៉ុន្តែអាជ្ញាធរភូមិ-ឃុំ បានហៅភាគីទាំង ២ ទៅធ្វើកិច្ចសន្យាឈប់បង្កទំនាស់នឹងគ្នាចប់ហើយ។
លោកចៅក្រមបន្តថាយោងតាមកំណត់ហេតុដែលដាក់នៅតុលាការបង្ហាញថា បន្ទាប់ពីថ្ងៃកើតហេតុគេបានឃើញជនជាប់ចោទឈ្មោះ មុំ នី បានដើរទៅមាត់ទន្លេ ហើយបានបោះកាំភ្លើងចោល។ រីឯស្ត្រីឈ្មោះ គា ប៊ុនណាវី ជាអតីតមេឃុំ ព្រែកសាម៉ាន់ បាននិយាយនៅតុលាការថ្នាក់ក្រោមដែរថា កាលពីគាត់នៅជាមេឃុំ គឺគាត់បានផ្សះផ្សាទំនាស់រវាងជនជាប់ចោទ និងជនរងគ្រោះដែរ ហើយភាគីទាំង ២ ក៏បានត្រូវរ៉ូវគ្នារួចហើយដែរ។
អ្នកស្រី តាំ រុំសី អាយុ ៣៨ ឆ្នាំជាប្រពន្ធរបស់ជនជាប់ចោទឈ្មោះ មុំ នី ដែលបានចូលស្តាប់ការប្រកាសសាលដីកាពីម្សិលមិញបានថ្លែងឲ្យដឹងនៅក្រៅបន្ទប់សវនាការថា៖ «តុលាការកំពូលបានផ្តល់យុត្តិធម៌ដល់ស្វាមីរបស់អ្នកស្រីយ៉ាងពិតប្រាកដ។ ព្រោះថាស្វាមីរបស់អ្នកស្រីពិតជាមិនបានបាញ់សម្លាប់ជនរងគ្រោះនោះទេ»។
អ្នកស្រីប្រាប់ថា ដោយសារការចោទប្រកាន់មិនត្រឹមត្រូវនេះហើយបានធ្វើឲ្យស្វាមីរបស់អ្នកស្រីជាប់ពន្ធនាគារ ៤ ឆ្នាំមកហើយ ហើយក៏ធ្វើឲ្យកូនប្រុសស្រីរបស់អ្នកស្រី ២ នាក់ ដែលមានអាយុ ១២ ឆ្នាំ និងកូនស្រីអាយុ ១១ ឆ្នាំ ត្រូវឈប់រៀន ព្រោះគ្មានអ្នកផ្គត់ផ្គង់ឲ្យរៀនសូត្រ។
អ្នកស្រី តាំ រុំសី និយាយថា៖ «ខ្ញុំសូមឲ្យតុលាការនៅសាលាឧទ្ធរណ៍ដោះលែងស្វាមីខ្ញុំវិញ ព្រោះការចោទប្រកាន់លើស្វាមីខ្ញុំជារឿងមិនពិតទេ»។ យោងកំណត់ហេតុរបស់តុលាការបង្ហាញថាកាលពីយប់ថ្ងៃទី ១៨ ខែធ្នូ ឆ្នាំ ២០១១ ជនរងគ្រោះឈ្មោះ ឌី សាវី ហៅ ឡោះ ត្រូវគេបាញ់សម្លាប់នៅភូមិឈើទាលភ្លោះ ឃុំព្រែកសាម៉ាន់ ស្រុកឆ្លូង ខេត្តក្រចេះលុះដល់ឆ្នាំ ២០១៦ ទើបសមត្ថកិច្ចចាប់ខ្លួនជនជាប់ចោទបាន។
កំណត់ហេតុបន្តថា ជនជាប់ចោទត្រូវបានសាលាដំបូងខេត្តក្រចេះប្រកាសសាលក្រមនៅថ្ងៃទី ៨ ខែកុម្ភៈ ឆ្នាំ ២០១៦ ផ្តន្ទាទោស ឈ្មោះ មុំ នី ដាក់ពន្ធនាគារ ១ ជីវិត។ ប៉ុន្តែត្រូវជនជាប់ចោទប្តឹងទាស់ទៅសាលាឧទ្ធរណ៍ហើយត្រូវបានសាលាឧទ្ធរណ៍កាលពីថ្ងៃទី ១៨ មីនា ឆ្នាំ ២០១៩ តម្តល់សាលក្រមរបស់សាលាដំបូងខេត្តក្រចេះនៅដដែល៕
