.jpg)
លោក កែត ឃី មេធាវីការពារក្ដីអតីតតំណាងរាស្ត្រនៃអតីតបក្សប្រឆាំង។ រូប ហ៊ាន រង្សី
ភ្នំពេញ: តុលាការកំពូលគ្រោងប្រកាសសាលដីកាលើសំណុំរឿងវាយដំអតីតតំណាងរាស្ត្របក្សសង្គ្រោះជាតិលោក គង់ សភា និងលោក ញ៉យ ចំរើន នៅថ្ងៃទី ២៨ ខែ តុលាខាងមុខ បន្ទាប់ពីតុលាការនេះបានបើកសវនាការពីម្សិលមិញជុំវិញការប្ដឹងសារទុក្ខរបស់ក្រុមមេធាវីអតីតតំណាងរាស្ត្រទាំង ២ ដើម្បីប្រឆាំងនឹងសាលក្រមតុលាការជាន់ទាបដែលផ្តល់សំណងតិចតួចដល់ជនរងគ្រោះ។
ការបន្តប្ដឹងសារទុក្ខទៅតុលាការកំពូលនេះធ្វើឡើងបន្ទាប់ពីសាលាឧទ្ធរណ៍តម្កល់សេចក្តីសម្រេចរបស់សាលាដំបូងរាជធានីភ្នំពេញទុកជាបានការ។ បន្ទាប់ពីមានជនដៃដល់មួយក្រុមបានវាយដំលើអតីតតំណាងរាស្ត្រទាំង ២ នាក់បណ្តាលឲ្យរងរបួសធ្ងន់នៅក្បែរវិមានរដ្ឋសភាកាលពីថ្ងៃទី ២៦ ខែ តុលា ឆ្នាំ ២០១៥ កន្លងទៅ។
លោក កែត ឃី មេធាវីម្នាក់ដែលការពារ អតីតតំណាងរាស្ត្រនៃអតីតគណបក្សសង្គ្រោះជាតិ ២ រូប គឺលោក ញ៉យ ចំរើន និងលោក គង់ សភា បានថ្លែងពីម្សិលមិញថា ដោយសារសំណងរដ្ឋប្បវេណីដែលទទួលបានមិនសមល្មមទៅនឹងទំហំនៃការខូចខាតទើបពួកលោកសម្រេចប្ដឹងជំទាស់សារទុក្ខនៅតុលាការកំពូល ព្រោះការវាយដំឲ្យរងរបួសនេះធ្វើឲ្យពួកគាត់ត្រូវចំណាយសម្រាប់ព្យាបាលនៅមន្ទីរពេទ្យប្រទេសថៃ និងក្នុងស្រុកខ្មែរប្រមាណជិត ៧ ម៉ឺនដុល្លារ។
លោកបន្តថា រីឯបញ្ហារថយន្ត ២ គ្រឿង ក៏រងការខូចខាតយ៉ាងដំណំដោយពួកគាត់បានលក់រថយន្តនោះខាតបង់ជាងពាក់កណ្ដាលនៃតម្លៃរថយន្ត ប៉ុន្ដែសំណងដែលបានពីតុលាការសម្រេចនេះក្នុងម្នាក់ទទួលបានតែ ៤០ លានរៀលទេ គឺវាតិចជាង ១ ម៉ឺនដុល្លារ ដោយគ្រាន់តែចំណាយសម្រាប់ជួសជុលរថយន្តក៏វាមិនអាចគ្រប់គ្រាន់ដែរ ហើយនៅត្រូវចំណាយលើការព្យាបាលរបួសទៀតគឺមិនទាន់សមល្មមនឹងទទួលយកទេ។
លោក កែត ឃី បញ្ជាក់ថា៖ «យើងប្ដឹងទាមទារមកតុលាការកំពូលនេះគឺទាមទារឲ្យតុលាការដំឡើងសំណងរដ្ឋប្បវេណីឲ្យសមមាត្រទៅនឹងទំហំនៃការចំណាយ និងខូចខាតដែលគាត់ចំណាយទៅលើការព្យាបាលដេកពេទ្យរាប់ខែនៅថៃ និងស្រុកខ្មែរ។ ចំពោះយើងគឺទាមទារ ១ ពាន់លានរៀល ប៉ុន្ដែមិនបានចំនួននេះទេ គឺសុំឲ្យបានជិត ១ ពាន់លានរៀល។
លោកមេធាវីថ្លែងថា៖ «យើងមិនទាន់អាចសន្និដ្ឋានបានថាយ៉ាងណាទេ គឺយើងកំពុងរង់ចាំមើលការប្រកាសលទ្ធផលសាលដីកានៅថ្ងៃទី ២៨ ខែតុលានេះ។ យើងជាដើមបណ្ដឹងរដ្ឋប្បវេណីគឺមានសិទ្ធិត្រឹមតែទារសំណងរដ្ឋប្បវេណីដែលមិនសមល្មមនឹងការខូចខាតយើងមិនអាចប្តឹងរឿងទណ្ឌកម្មបានទេ ហើយពួកខ្ញុំរំពឹងថា តុលាការកំពូលនឹងពិនិត្យលើអង្គហេតុកូនក្តីខ្ញុំ ដោយផ្ដល់យុត្តិធម៌សម្រាប់ពួកគាត់»។
លោក នៅ មុនីជោត តំណាងមហាអយ្យការនៃតុលាការកំពូលបានសន្និដ្ឋានថា ដោយសាររឿងនេះមានដើមបណ្តឹងជាអ្នកប្តឹងសារទុក្ខ ហើយប្តឹងតែរឿងសំណងរដ្ឋប្បវេណីប៉ុណ្ណោះ ហើយភាគីខាងជនរងគ្រោះទាមទារឲ្យមានការដំឡើងសំណងដោយលោកជំរុញឲ្យក្រុមប្រឹក្សាអង្គជំនុំជម្រះមេត្តាពិចារណាទៅលើភ័ស្តុតាងដែលមានដាក់នៅក្នុងបណ្តឹង។
លោកបានបញ្ជាក់ថា៖ «ខ្ញុំសូមក្រុមប្រឹក្សាពិចារណាតាមនីតិវិធីច្បាប់ ដើម្បីឲ្យភាគីទាំងសងខាងអស់ការសង្ស័យ»។
ដោយឡែកសម្រាប់ភាគីជាជនជាប់ចោទឈ្មោះ ចាយ សារិទ្ធ លោក ម៉ៅ ហឿន និងលោក សុត វណ្ណនី មិនបានពឹងពាក់រកមេធាវីឲ្យជួយការពារក្នុងរឿងក្ដីនេះទេដោយចាប់ពីសំណុំរឿងនៅក្នុងសាលាដំបូងរាជធានីភ្នំពេញ រហូតដល់សាលាឧទ្ធរណ៍ និងតុលាការកំពូល។
កាលពីថ្ងៃទី ២៦ ខែ តុលា ឆ្នាំ ២០១៥ មានបាតុកម្មមួយទាមទារទម្លាក់លោក កឹម សុខា ពីអនុប្រធានទី ១ នៃរដ្ឋសភា។ ក្រោយពេលបាតុករបានរំសាយ សមាជិកសភា ២ រូបពីគណបក្សប្រឆាំងគឺលោក ញ៉យ ចំរើន និងលោក គង់ សភា ត្រូវបានបាតុកររុំមុខអូសទាញចេញពីឡានហើយវាយតប់បណ្ដាលឲ្យរងរបួសយ៉ាងដំណំ។
នៅខែ ឧសភា ឆ្នាំ ២០១៦ តុលាការក្រុងភ្នំពេញបានកាត់ទោសជនជាប់ចោទ ៣ នាក់គឺ ចាយ សារិទ្ធ លោក ម៉ៅ ហឿន និងលោក សុត វណ្ណនី ពីបទហិង្សាដោយចេតនាមានស្ថានទម្ងន់ទោសហើយផ្តន្ទាទោសពួកគេដាក់ពន្ធនាគារ ៤ ឆ្នាំ តែអនុវត្តទោសតែ ១ ឆ្នាំ ហើយ ៣ ឆ្នាំទៀតត្រូវបានព្យួរ។ សាលក្រមក៏តម្រូវឲ្យជនទាំង ៣ បង់ប្រាក់ពិន័យ ៦ លានរៀលចូលថវិការដ្ឋក្នុងម្នាក់ៗ និងរួមគ្នាសងសំណងរដ្ឋប្បវេណីចំនួន ៨០ លានរៀលដល់ជនរងគ្រោះ។ សាលក្រមនេះត្រូវបានសាលាឧទ្ធរណ៍តម្កល់ទុកជាបានការកាលពីថ្ងៃទី ១១ មិថុនា ឆ្នាំ ២០១៨ កន្លងទៅនេះ៕
