.jpg)
លោក អ៊ូ ចម្រើន អាយុ ៣១ ឆ្នាំ ដែលពាក់ព័ន្ធករណីស៊ីដាច់លុយអតិថិជនសរុប ជាង ១២ លានរៀល។ នគរបាល
ឧត្តរមានជ័យៈ បុគ្គលិកធនាគារស្ថាបនាម្នាក់ត្រូវបានសាលាដំបូងខេត្តឧត្តរមានជ័យសម្រេចឃុំខ្លួនជាបណ្ដោះអាសន្នកាលពីម្សិលមិញ បន្ទាប់ពីកម្លាំងសមត្ថកិច្ចនគរបាលស្រុកត្រពាំងប្រាសាទ ចាប់ឃាត់ខ្លួនកាលពីរសៀលថ្ងៃទី ១៧ ខែ ឧសភា ឆ្នាំ ២០១៩ ពាក់ព័ន្ធនឹងករណីយកលុយសំណងរបស់អតិថិជនសរុបជាង ១២ លានរៀល ដោយមិនព្រមបង់ចូលធនាគារ។
លោក អ៊ូ ចម្រើន អាយុ ៣១ ឆ្នាំ ជាបុគ្គលិកផ្នែកឥណទាននៃធនាគារស្ថាបនាសាខាស្រុកត្រពាំងប្រាសាទ ខេត្តឧត្តរមានជ័យ ត្រូវបានក្រុមគណៈកម្មការនាយកធនាគារនៃសាខាខាងលើនេះ ប្ដឹងចោទប្រកាន់ពីបទ «រំលោភលើសេចក្ដីទុកចិត្ត» បន្ទាប់ពីរកឃើញថាគាត់បានដកយកលុយចំនួន ១២ ៣៥០ ០០០ រៀល ដែលអតិថិជនចំនួន ៧ នាក់បានបង់រំលស់សងមកធនាគារទៅចាយវាយដោយគ្មានមូលហេតុ។
លោក ហ៊ែល ឆេងហុង ប្រធានលេខាធិការដ្ឋានរដ្ឋបាលសាលាដំបូងខេត្តឧត្តរមានជ័យ បានប្រាប់ភ្នំពេញប៉ុស្តិ៍កាលពីម្សិលមិញថា ជនជាប់ចោទឈ្មោះ អ៊ូ ចម្រើន ត្រូវបានលោក ស៊ឹម ពិចិត្រ ចៅក្រមស៊ើបសួរក្នុងសំណុំរឿងនេះ សម្រេចឃុំខ្លួនជាបណ្ដោះអាសន្ន នៅ ថ្ងៃ ចន្ទ (ម្សិលមិញ) បន្ទាប់ពីជនសង្ស័យខាងលើនេះត្រូវបានលោក គង់ រតនា តំណាងអយ្យការអមសាលាដំបូងខេត្តសម្រេចចោទប្រកាន់ពីបទ «រំលោភលើទំនុកចិត្ត» តាមបញ្ញត្តិមាត្រា ៣៩១ និង ៣៩២ នៃក្រមព្រហ្មទណ្ឌ។
យោងតាមមាត្រា ៣៩២ លោក អ៊ូ ចម្រើន ដែលជាជនជាប់ចោទក្នុងសំណុំរឿងនេះនឹងត្រូវប្រឈមនឹងការផ្ដន្ទាទោសដាក់ពន្ធនាគារពី ៦ ខែទៅ ៣ ឆ្នាំ និងពិន័យជាប្រាក់ពី ១ លានរៀលទៅ ៦ លានរៀល។
លោក ទឹម វណ្ណឌី ប្រធានការិយាល័យព្រហ្មទណ្ឌកម្រិតស្រាលនៃស្នងការដ្ឋាននគរបាលខេត្តឧត្តរមានជ័យបានប្រាប់ភ្នំពេញប៉ុស្តិ៍ដែរថា៖ «នៅពេលនេះ ជនជាប់ចោទ ត្រូវបាននាំយកទៅឃុំខ្លួនក្នុងពន្ធនាគារខេត្តឧត្តរមានជ័យដើម្បីរង់ចាំការជំនុំជម្រះនៅថ្ងៃក្រោយ»។
បើតាមលោក វណ្ណឌី មុនពេលសម្រេចកសាងសំណុំរឿងបញ្ជូនទៅតុលាការ មន្ត្រីជំនាញការិយាល័យព្រហ្មទណ្ឌកម្រិតស្រាលនៃស្នងការដ្ឋាននគរបាលខេត្តឧត្តរមានជ័យបានព្យាយាមសម្រុះសម្រួលភាគីទាំងសងខាង ប៉ុន្តែលោក អ៊ូ ចម្រើន ដែលជាភាគីចុងចម្លើយ ក្រៅពីសារភាពថាខ្លួនពិតជាបានយកលុយជាង ១២ លានរៀលទៅចាយវាយនិងចាញ់ការភ្នាល់ល្បែងអស់នោះ មិនបានបង្ហាញការតាំងចិត្តណាមួយក្នុងការរកប្រាក់សងបំណុលទៅឲ្យភាគីធនាគារវិញឡើយ៕
