ភ្នំពេញៈ សាលាដំបូងរាជធានីភ្នំពេញកាលពីព្រឹកម្សិលមិញបានបើកសវនាការជំនុំជម្រះបណ្ដឹងបរិហារកេរ្តិ៍ ដែលអគ្គនាយកដ្ឋានពន្ធដារបានប្តឹងម្ចាស់កាសែត Cambodia Daily បន្ទាប់ពីកាសែតនេះត្រូវបានបិទទ្វារដ៏ចម្រូងចម្រាស។ ប៉ុន្តែសវនាការបានផ្អាករង់ចាំឯកសារបកប្រែបន្ថែម ហើយនឹងបន្តនៅថ្ងៃទី ១២ មេសា។
សំណុំរឿងបរិហារកេរ្តិ៍នេះត្រូវបានប្តឹងដោយអគ្គនាយកដ្ឋានពន្ធដារ តំណាងដោយលោក វ៉ាន់ ពុទ្ធិពល អគ្គនាយករងនៃអគ្គនាយកដ្ឋានពន្ធដារប្តឹងលោកស្រី Deborah Krisher Steele ម្ចាស់កាសែត Cambodia Daily។
បណ្ដឹងនេះ ពាក់ព័ន្ធនឹងការលើកឡើងរបស់លោកស្រី Deborah ដែលបាននិយាយថា អគ្គនាយកដ្ឋានពន្ធដារបានធ្វើឲ្យបែកធ្លាយឯកសារពាក់ព័ន្ធប្រាក់ពន្ធដែលកាសែត Cambodia Daily ត្រូវបង់គឺមានចំនួនសរុបជាង ៦ លានដុល្លារបូកទាំងការពិន័យថយក្រោយរយៈពេល ១០ ឆ្នាំ និងការអះអាងដែលថាការបិទកាសែតនេះពាក់ព័ន្ធនឹងរឿងនយោបាយ។
ក៏ប៉ុន្តែមុនពេលសួរដេញដោលលើអង្គសេចក្តីលោក ហម ស៊ុនរិទ្ធិ មេធាវីលោកស្រី Deborah បានអះអាងថាការបញ្ជូនលិខិតអញ្ជើញទៅលោកស្រី Deborah បានធ្វើឡើងខុសនីតិវិធី និងខុសអាសយដ្ឋាន។ បន្ទាប់មកមានការដេញដោលលើមេធាវី សេក សោភ័ណ ដែលលោកស្រី Deborah បានពឹងពាក់ តាមអ៊ីមែលឲ្យជួយការពារក្តីដោយគ្មានស្នាមមេដៃ។ ទីបំផុតចៅក្រម សេង លាង បានបញ្ឈប់លោក សោភ័ណ មិនឲ្យការពារក្តីដោយអះអាងថា ការពឹងពាក់មិនស្របតាមនីតិវិធី។
សវនាការបានសួរដេញដោលលើលោក ហេង ណារិទ្ធ អនុប្រធាននាយកដ្ឋានគ្រប់គ្រងអ្នកជាប់ពន្ធធំនៃអគ្គនាយកដ្ឋានពន្ធដារដែលលោកបានឡើងឆ្លើយបំភ្លឺក្នុងនាមអគ្គនាយកដ្ឋាន។ លោក ណារិទ្ធ ថ្លែងថា៖ «ការប្តឹងនេះដោយសារតែលោកស្រី Deborah កាលពីថ្ងៃទី ២៣ សីហា ២០១៧ បាននិយាយតាមវិទ្យុអាស៊ីសេរីដោយបានចោទប្រកាន់អគ្គនាយកដ្ឋានពន្ធដារថាបានធ្វើឲ្យបែកធ្លាយឯកសារ»។
លោកបន្តថា៖ «អគ្គនាយកដ្ឋានពន្ធដារជាស្ថាប័នអនុវត្តច្បាប់ ហើយមិនបានធ្វើឲ្យបែកធ្លាយឯកសារទេ។ ការថ្លែងរបស់លោកស្រីធ្វើឲ្យប៉ះពាល់ដល់អគ្គនាយកដ្ឋានពន្ធដារ»។
លោក ហេង ណារិទ្ធ អះអាងថាចំណុចមួយទៀតដែលអគ្គនាយកដ្ឋានពន្ធដារថា ជាការបរិហារនោះគឺការលើកឡើងរបស់លោកស្រី Deborah នៅក្នុងវិទ្យុអាស៊ីសេរីដែលចោទប្រកាន់ថាពន្ធដារ «មានចេតនានយោបាយ ចង់បិទកាសែតគាត់ចោល។ ចំណុចនេះអគ្គនាយកដ្ឋានពន្ធដារមិនពាក់ព័ន្ធរឿងនយោបាយទេ។ អគ្គនាយកដ្ឋានពន្ធដារធ្វើការប្រមូលពន្ធលើស្ថាប័នសារព័ត៌មានទាំងអស់ និងបុគ្គលដែលជាប់ពន្ធ»។
លោកបន្តថា៖ «ដូច្នេះយើងប្តឹងដោយយោងលើចំណុច ១ គឺថាអគ្គនាយកដ្ឋានធ្វើឲ្យបែកធ្លាយឯកសារ និងទី ២ ចោទថាជារឿងនយោបាយក្នុងគោលបំណងបិទកាសែត»។
ពាក់ព័ន្ធនឹងការបែកធ្លាយឯកសារពន្ធដារលោក ហេង ណារិទ្ធ អះអាងថា អគ្គនាយកដ្ឋានពន្ធដារបានបញ្ជូនលិខិតមួយទៅកាសែត Cambodia Daily កាលពីថ្ងៃទី ៤ ខែសីហា ឆ្នាំ ២០១៧ ដោយបានហៅបុគ្គលិកកាសែតនេះមកទទួល។ ប៉ុន្តែរហូតដល់ថ្ងៃទី ០៧ ខែឆ្នាំដដែលទើបលោកស្រី Deborah អះអាងនៅក្នុងកាសែត Cambodia Daily ថា លោកស្រីបានទទួលលិខិតនោះ។ លោកនិយាយថា រាល់ឯកសារដែលផ្ញើចេញត្រូវមានហត្ថលេខាអ្នកទទួល ប៉ុន្តែឯកសារដែលបែកធ្លាយនោះមិនមានស៊ីញ៉េទទួលទេ។
លោក អៀង សុភាព អតីតបុគ្គលិកផ្នែករដ្ឋបាលនៅកាសែត Cambodia Daily បានឡើងធ្វើជាសាក្សីដោយបញ្ជាក់ថា លោកបានទៅទទួលយកលិខិតជូនដំណឹងស្តីពីការកំណត់ពន្ធឡើងវិញនេះនៅអគ្គនាយកដ្ឋានពន្ធដារ ប៉ុន្តែលោកមិនចាំថ្ងៃ។
ឯកសារកំណត់ពន្ធរយៈពេល ១០ ឆ្នាំសម្រាប់កាសែត Cambodia Daily នេះ ត្រូវបានបែកធ្លាយដំបូងកាលពីថ្ងៃទី ៤ ខែសីហា ២០១៧ នៅលើទំព័រហ្វេសប៊ុករបស់លោក អ៊ូ ច័ន្ទឫទ្ធិ អតីតតំណាងរាស្ត្រគណបក្សសង្គ្រោះជាតិ។
ចំណែកមេធាវីការពារលោកស្រី Deborah បានដាក់ឯកសារមួយដែលលោកស្រីបានផ្ញើតាមរយៈមេធាវីក្នុងខែមីនានេះ ប៉ុន្តែចៅក្រមមិនអនុញ្ញាតឲ្យអាននៅឡើយ ដោយសារលោកមិនទទួលយកការបកប្រែឯកសារនោះ ដោយលោកថាក្រៅផ្លូវការ។
លោក សេង លាង ចៅក្រមជំនុំជម្រះបានសម្រេចផ្អាកសវនាការនេះដោយរង់ចាំមេធាវីនៃភាគីទាំង ២ ដាក់លិខិតពាក់ព័ន្ធជាភាសាខ្មែរហើយសវនាការនឹងបន្តនៅថ្ងៃទី ១២ ខែមេសាខាងមុខនេះ។
កាសែត Cambodia Daily ដែលជាកាសែតឯករាជ្យមួយនៅកម្ពុជាបានសម្រេចបិទទ្វារកាលពីថ្ងៃទី ៤ ខែកញ្ញា ឆ្នាំ ២០១៧ មួយខែក្រោយពីមានការបែកធ្លាយឯកសារ និងបន្ទាប់ពីអគ្គនាយកដ្ឋានពន្ធដារតម្រូវឲ្យបង់ពន្ធសរុបចំនួន ៦ លាន ១ សែនដុល្លារដោយគិតថយក្រោយរយៈពេល ១០ ឆ្នាំ៕