.jpg)
ជនជាប់ចោទ យិន ហេង នៅសាលាដំបូងភ្នំពេញពីម្សិល។ ហេង ជីវ័ន
ភ្នំពេញៈ យុវជនម្នាក់ដែលគេអះអាងថាជាភេទទី៣ ឈ្មោះ យិន ហេង ហៅ ចំប៉ីខ្មៅ ត្រូវបានសាលាដំបូងរាជធានីភ្នំពេញប្រកាសសាលក្រមកាលពីម្សិលមិញដោយផ្តន្ទាទោសដាក់ពន្ធនាគារ ២ ឆ្នាំ តែអនុវត្តទោសតែ ១ ឆ្នាំ និងពិន័យជាប្រាក់ ៣ លានរៀល បន្ទាប់ពីជំនុំជម្រះកាលពីថ្ងៃទី ៤ មិថុនា រឿងបង្ហោះហ្វេសប៊ុកប្រមាថជាតិសាសន៍ខ្មែរ។
នៅក្នុងបន្ទប់សវនាការកាលពីម្សិលមិញលោកចៅក្រម ម៉ៅ ស៊ីណា បានអានសាលដីកានៅចំពោះមុខជនជាប់ចោទថាក្រោយពីបានស្តាប់ចម្លើយរបស់ជនជាប់ចោទនិងក្រោយពីបានស្តាប់ការសន្និដ្ឋានរបស់តំណាងអយ្យការរួមទាំងបានពិនិត្យលើភ័ស្តុតាង និងអង្គហេតុផងនោះ ក្រុមប្រឹក្សាជំនុំជម្រះយល់ឃើញថា ជនជាប់ចោទ ឈ្មោះ យិន ហេង ហៅ ចំប៉ីខ្មៅ ពិតជាបានប្រព្រឹត្តដូចបទចោទរបស់ចៅក្រមស៊ើបសួរមែន។
លោកថ្លែងថា៖ «ដូច្នេះតុលាការសម្រេចផ្តន្ទាទោសជនរូបនេះ កំណត់រយៈពេល ២ ឆ្នាំ តែឲ្យអនុវត្តទោសក្នុងពន្ធនាគារ ១ ឆ្នាំ ឯទោសនៅសល់ព្យួរចោទពីបទញុះញង់ឲ្យមានការរើសអើងតាមមាត្រា ៤៩៦ នៃក្រមព្រហ្មទណ្ឌ និងពិន័យប្រាក់ ៣ លានរៀល ចូលថវិការដ្ឋ»។
បន្ទាប់ពីបានស្តាប់សេចក្តីប្រកាសសាលក្រមនេះ ជនជាប់ចោទ យិន ហេង ហៅ ចំប៉ីខ្មៅ បានឆ្លើយប្រាប់ចៅក្រមថាអត្ថន័យនៃសាលក្រម គឺគាត់ត្រូវបានតុលាការផ្តន្ទាទោសរយៈពេល ២ ឆ្នាំពេញ។ ប៉ុន្តែតុលាការ ឲ្យគាត់អនុវត្តទោសនៅក្នុងពន្ធនាគារតែ ១ ឆ្នាំទេ។
ចំប៉ីខ្មៅ បញ្ជាក់ថា៖ «សាលក្រមនេះ ខ្ញុំព្រមទទួលយកហើយពេលចេញពីពន្ធនាគារវិញខ្ញុំក៏ឈប់ប្រព្រឹត្តកំហុសឆ្គងដដែលនេះទៀតហើយ»។
គួររំឭកថា យុវជន យិន ហេង ហៅ ចំប៉ីខ្មៅ ត្រូវបានសមត្ថកិច្ចស្រាវជ្រាវចាប់ខ្លួនកាលពីល្ងាចថ្ងៃទី ៥ ខែ កុម្ភៈ ឆ្នាំ ២០១៩ នៅក្នុងខណ្ឌដូនពេញ រាជធានីភ្នំពេញ ក្រោយពីយុវជនរូបនេះសរសេរសារបង្ហោះតាមគណនី Facebook ឈ្មោះ «ចំប៉ីខ្មៅ» ជាខ្សែវីដេអូផ្សាយផ្ទាល់ ដោយបានជេរប្រមាថមកលើពលរដ្ឋខ្មែរគ្រប់ជាន់ថ្នាក់ កាលពីថ្ងៃទី ៤ ខែ កុម្ភៈ ឆ្នាំ ២០១៩ នៅមុខព្រះបរមរាជវាំងដោយបានប្រើនូវពាក្យពេចន៍ធ្ងន់ៗក្នុងន័យប្រមាថលើជាតិសាសន៍ខ្មែរ។
បន្ទាប់មកក៏មានបញ្ជាផ្ទាល់ពីលោក ស ខេង រដ្ឋមន្ដ្រីក្រសួងមហាផ្ទៃ និងលោក នេត សាវឿន អគ្គស្នងការនគរបាលជាតិរួមលោក ស ថេត ស្នងការនគរបាលរាជធានីភ្នំពេញដើម្បីឲ្យសមត្ថកិច្ចស្វែងរកចាប់ខ្លួន៕
