.jpg)
លោកស្រី ឃួន សុដារី (ឆ្វេង) នៅក្នុងកិច្ចប្រជុំ IPU ពីម្សិលមិញ។ រូបថត រដ្ឋសភាកម្ពុជា
ភ្នំពេញៈ អតីតមេបក្សប្រឆាំងលោក សម រង្ស៊ី ត្រូវបានអញ្ជើញឲ្យចូលរួមកិច្ចប្រជុំមហាសន្និបាតសហភាពអន្តរសភា (IPU) នៅក្នុងទីក្រុងហ្សឺណែវស្របគ្នានឹងគណៈប្រតិភូសភាកម្ពុជាដែលដឹកនាំដោយលោកស្រី ឃួន សុដារី អនុប្រធានទី ២ នៃរដ្ឋសភាដែលគូប្រជែងនយោបាយមកពីគណបក្សដែលធ្លាប់ជាគូប្រកួតដ៏ស្រួចស្រាល់ទាំង ២ នេះនឹងថ្លែងសុន្ទរកថាដោយឡែកពីគ្នានៅចំពោះមុខមហាសន្និបាតដែលមានសមាជិកមកពី ១៣៥ ប្រទេសចូលរួម។
មហាសន្និបាតសហភាពអន្តរសភា (IPU) លើកទី ១៣៩ នេះត្រូវធ្វើឡើងចាប់ពីថ្ងៃទី ១៤ ដល់ថ្ងៃទី ១៨ ខែតុលានាទីក្រុងហ្សឺណែវ ប្រទេសស្វ៊ីសក្រោមប្រធានបទ «ភាពជាថ្នាក់ដឹកនាំសភាក្នុងការជំរុញសន្តិភាព និងការអភិវឌ្ឍក្នុងយុគសម័យនៃនវានុវត្តន៍ និងការផ្លាស់ប្តូរតាមបែបបច្ចេកវិទ្យា» ឬ «Parliamentary leadership in promoting peace and development in the age of innovation and technological change.» ដែលមានសមាជិកចូលរួមមកពី ១៣៥ ប្រទេសនៅទូទាំងពិភពលោក។
យោងតាមសេចក្ដីប្រកាសព័ត៌មានរបស់រដ្ឋសភាកម្ពុជាដែលផ្សព្វផ្សាយនៅលើទំព័រហ្វេសប៊ុករបស់ខ្លួនកាលពីម្សិលមិញបានឲ្យដឹងថា គណៈប្រតិភូកម្ពុជាដែលដឹកនាំដោយលោកស្រី ឃួន សុដារី អនុប្រធានទី ២ នៃរដ្ឋសភាបាននិងកំពុងចូលរួមកិច្ចប្រជុំក្រុមប្រឹក្សាភិបាលលើកទី ២០៣ និងមហាសន្និបាតលើកទី ១៣៩ ដែលក្នុងនោះគេក៏ឃើញមានវត្តមានតំណាងរាស្ត្រគណបក្សកាន់អំណាចលោក ឈាង វុន ផងដែរ។
កិច្ចប្រជុំក្រុមប្រឹក្សាភិបាលផ្តោតទៅលើការពិនិត្យសមាជិកភាព ពិនិត្យស្ថានភាពហិរញ្ញវត្ថុរបាយការណ៍អំពីសកម្មភាពប្រធាន និងអគ្គលេខាធិការ IPU ដែលបានសម្រេចរយៈពេល ១ ឆ្នាំរបស់ស្ថាប័ននេះរបាយការណ៍នៃកិច្ចប្រជុំដែល IPU បានរៀបចំអំពីផែនការយុទ្ធសាស្ត្រ IPU ឆ្នាំ ២០១៧-២០២១ និងការរៀបចំកិច្ចប្រជុំនាពេលខាងមុខជាដើម។ នេះបើយោងតាមសេចក្ដីប្រកាសព័ត៌មានដដែល។
លើសពីនេះអ្វីដែលគួរកត់សម្គាល់អតីតមេបក្សប្រឆាំង និងបច្ចុប្បន្នជាប្រធានចលនាសង្គ្រោះជាតិ (CNRM) គឺលោក សម រង្ស៊ី ក៏ត្រូវបានអញ្ជើញឲ្យចូលរួមនៅក្នុងកិច្ចប្រជុំនេះផងដែរជាទីដែលលោកនឹងថ្លែងសុន្ទរកថានៅថ្ងៃទី ១៨ ខែតុលានៅចំពោះមុខគណៈប្រតិភូសភាអន្តរជាតិ។ នេះបើតាមមន្ត្រីអតីតបក្សប្រឆាំងកាលពីម្សិលមិញ។
លោក សម រង្ស៊ី មិនបានឆ្លើយតបនឹងសំណើសុំការអត្ថាធិប្បាយទេកាលពីម្សិលមិញ ប៉ុន្តែលោក ឡុង ប៊ុត្ដា អតីតតំណាងរាស្ត្រអតីតបក្សប្រឆាំងបានឲ្យដឹងពីទីក្រុងប៉ារីសមកថាលោក សម រង្ស៊ី ពិតជាត្រូវបានអញ្ជើញឲ្យចូលរួមក្នុងកិច្ចប្រជុំដ៏សំខាន់នេះមែន។ លោកថ្លែងថា៖ «គេអញ្ជើញគាត់...គាត់នឹងទុកឲ្យរបបលោក ហ៊ុន សែន ប្រឈមនឹងអន្តរជាតិ។ គាត់នឹងចូលរួម»។
លោករំពឹងថាលោក ឈាង វុន នឹងមិនអាចទៅធ្វើការបណ្ដេញលោក សម រង្ស៊ី ដូចការដែលលោកបានបណ្តេញលោកស្រី មូរ សុខហួរ អតីតតំណាងរាស្ត្រអតីតគណបក្សប្រឆាំងកាលពីពេលថ្មីៗនេះបានឡើយ។
បើយោងតាមលោក ប៊ុត ធារី ដែលជាមនុស្សជំនិតនឹងលោក សម រង្ស៊ី បានអះអាងថា សហភាពអន្តរសភាបានប្រាប់ឲ្យលោក សម រង្ស៊ី ធ្វើការរាយការណ៍ភ្លាមៗ ប្រសិនមានការធ្វើអាកប្បកិរិយាមិនសមរម្យណាមួយចំពោះរូបលោកដោយអ្នកណាម្នាក់។
លោក ប៊ុត ធារី បានសរសេរនៅលើទំព័រហ្វេសប៊ុករបស់លោកថា៖ «នៅទីក្រុងហ្សឺណែវប្រធានសហភាពអន្តរសភា (IPU) បានមានប្រសាសន៍ប្រាប់លោកប្រធាន សម រង្ស៊ី ថា បើលោក ឈាង វុន ធ្វើអាកប្បកិរិយាមិនសមរម្យចំពោះលោកដូចដែលបានធ្វើមកលើលោកជំទាវ មូរ សុខហួរ កន្លងទៅថ្មីៗនោះសូមឲ្យលោកប្រធាន សម រង្ស៊ី រាយការណ៍ប្រាប់គេភ្លាម»។
លោកបានសរសេរបន្តថា៖ «សង្ឃឹមថាលោក ឈាង វុន ចេះមានសុជីវធម៌ខ្លះផង»។
លោក ឈាង វុន មិនអាចទាក់ទងសុំអធិប្បាយបានទេកាលពីម្សិលមិញ ប៉ុន្តែបើតាមសេចក្ដីប្រកាសព័ត៌មានរបស់រដ្ឋសភាកម្ពុជាលោកស្រី សុដារី ក៏គ្រោងថ្លែងសុន្ទរកថានៅក្នុងអង្គប្រជុំនោះផងដែរ។
គួរបញ្ជាក់ថានៅក្នុងកិច្ចប្រជុំភាពជាដៃគូនៃសភាអាស៊ីអឺរ៉ុបលើកទី ១០ ដែលធ្វើឡើងនៅក្នុងទីក្រុងប្រ៊ុចសែលប្រទេសបែលហ្ស៊ិកនៅថ្ងៃទី ២៧ និង ២៨ ខែកញ្ញាដែលផ្តោតលើបញ្ហាប្រឈមផ្នែកបរិស្ថានសម្រាប់តំបន់អាស៊ី និងអឺរ៉ុបគណៈប្រតិភូសភាកម្ពុជាដែលមានលោក ឈាង វុន បានបណ្ដេញអតីតតំណាងរាស្ត្រលោកស្រី មូរ សុខហួរ ដែលមកសម្តែងការគួរសមចំពោះរូបលោកក្នុងនាមជាខ្មែរដូចគ្នា។
កាលនោះលោក ឈាង វុន បានទទួលស្គាល់ថាលោកពិតជាបានដេញលោកស្រី សុខហួរ មែន ដោយសារតែលោកប្រកាន់ជំហរថា ប្រតិភូកម្ពុជាគឺជាតំណាងស្របច្បាប់តែ ១ គត់របស់កម្ពុជានៅលើឆាកអន្តរជាតិជាអ្វីដែលអនុប្រធានអតីតគណបក្សប្រឆាំងរូបនេះបានសម្តែងការ «សោកស្ដាយ»៕
