.jpg)
ទីស្នាក់ការស្ថាប័នអង្គភាពប្រឆាំងអំពើពុករលួយដែលក្រុមមន្ត្រីត្រូវទៅប្រកាសទ្រព្យសម្បត្តិ។ ហេង ជីវ័ន
ភ្នំពេញៈ គិតត្រឹមថ្ងៃទី ៤ ខែមករា ឆ្នាំ ២០២០ នេះមានមន្ត្រីប្រកាសទ្រព្យសម្បត្តិ និងបំណុលជិត ៨០០០ នាក់បានដាក់ឯកសាររួចរាល់ទៅអង្គភាពប្រឆាំងអំពើពុករលួយ (ACU) ក្នុងចំណោមអ្នកជាប់កាតព្វកិច្ចត្រូវប្រកាសទ្រព្យសម្បត្តិ និងបំណុលប្រមាណ ២ ម៉ឺននាក់នៅឆ្នាំនេះ។
កាលពីថ្ងៃទី ១៧ ខែតុលាឆ្នាំ ២០១៩ ACU បានចេញសេចក្តីជូនដំណឹងដល់ក្រសួងស្ថាប័នរាជធានី-ខេត្តជិត ៥០ ដើម្បីឲ្យមន្ត្រីដែលជាប់កាតព្វកិច្ចត្រូវប្រកាសទ្រព្យសម្បត្តិ និងបំណុលតាមកាលកំណត់ចាប់ពីថ្ងៃទី ១ ដល់ថ្ងៃទី ៣១ ខែមករា ឆ្នាំ ២០២០។
ACU បញ្ជាក់នៅក្នុងសេចក្តីជូនដំណឹងស្ដីពីលទ្ធផលនៃការទទួលឯកសារប្រកាសទ្រព្យសម្បត្តិ និងបំណុលចុះថ្ងៃទី ៤ ខែមករា ថាចំនួនឯកសារប្រកាសនេះគឺធ្វើឡើងតាមរបប ២ ឆ្នាំម្តងនៅឆ្នាំ ២០២០ សម្រាប់អ្នកដែលបានប្រកាសទ្រព្យសម្បត្តិ និងបំណុលកាលពីឆ្នាំ ២០១៨។
សេចក្តីជូនដំណឹងដដែលបន្តថា៖ «នៅថ្ងៃសៅរ៍ទី ៤ ខែមករានេះនាយកដ្ឋានប្រកាសទ្រព្យសម្បត្តិ និងបំណុលបានទទួលឯកសារប្រកាសទ្រព្យសម្បត្តិ និងបំណុលចំនួន ៦៩ ច្បាប់។ គិតត្រឹមថ្ងៃទី ៤ មករានេះឯកសារប្រកាសទ្រព្យសម្បត្តិ និងបំណុលដែលទទួលបានមានចំនួនសរុប ៧ ៧៩១ ច្បាប់»។
លោក ខូយ លឹមហុង ឧបការីនៃអង្គភាពប្រឆាំងអំពើពុករលួយប្រាប់ភ្នំពេញប៉ុស្តិ៍ពីម្សិលមិញថា តាមកាលបរិច្ឆេទនៃការជូនដំណឹងនេះ គឺទើបតែចាប់ផ្តើមរយៈពេល ៥ ថ្ងៃប៉ុណ្ណោះ ប៉ុន្តែដោយសារតែមន្ត្រីដែលជាប់កាតព្វកិច្ចមួយចំនួនបានចូលខ្លួនមកប្រកាសទ្រព្យសម្បត្តិ និងបំណុលមុនកាលកំណត់។
លោកថាតួលេខដែលទទួលបាននេះ គឺធ្វើឡើងតាំងពីអំឡុងខែធ្នូមកម្ល៉េះ។ លោកបន្ថែមថាក្នុងឆ្នាំនេះអ្នកជាប់កាតព្វកិច្ចដែលត្រូវប្រកាសទ្រព្យសម្បត្តិមានយ៉ាងហោចណាស់ ២ ម៉ឺននាក់។
លោកបញ្ជាក់ថា៖ «ដោយសារតែអ្នកជាប់កាតព្វកិច្ចមួយចំនួន គាត់រវល់ខ្លាំងនៅក្នុងខែមករាហ្នឹងហើយមួយចំនួនទៀតគាត់មានស្មារតីចង់ប្រកាសមុនកាលកំណត់ប្រហែលជាង ៥០០០ នាក់បានចូលខ្លួនមកប្រកាសមុនថ្ងៃទី ១»។
បើតាមលោក លឹមហុង តាមច្បាប់ស្តីពីការប្រឆាំងអំពើពុករលួយបុគ្គលដែលជាប់កាតព្វកិច្ចប្រកាសទ្រព្យសម្បត្តិ និងបំណុលនេះគឺមានមន្ត្រីរាជការស៊ីវិល ដែលមានតួនាទីចាប់ពីប្រធាននាយកដ្ឋានឡើងទៅដែលពួកគាត់ទទួលបានការតែងតាំងពីអនុក្រឹត្យ និងព្រះរាជក្រឹត្យ។
លោកបន្តថា ចំពោះកងកម្លាំងប្រដាប់អាវុធវិញក៏ត្រូវជាប់កាតព្វកិច្ចប្រកាសទ្រព្យសម្បត្តិនេះដែរគឺចាប់ពីថ្នាក់វរសេនីយ៍ឯកឡើងលើ (ស័ក្តិ ៥) គឺត្រូវតែចូលខ្លួនមកប្រកាសទ្រព្យសម្បត្តិ និងបំណុលនេះហើយក្រៅពីនេះ គឺក្នុងករណីចាំបាច់ដោយច្បាប់បានតម្រូវឲ្យក្រុមប្រឹក្សាឃុំ សង្កាត់ ឬបុគ្គលមួយចំនួនផ្សេងទៀតត្រូវចូលខ្លួនមកប្រកាសតាមការកោះហៅរបស់ ACU នៅពេលមានមន្ទិលសង្ស័យ ឬតម្រុយអ្វីមួយជុំវិញបញ្ហាអំពើពុករលួយ។
លោក មាស សុភ័ណ្ឌ អ្នកនាំពាក្យក្រសួងព័ត៌មានបានប្រាប់ភ្នំពេញប៉ុស្តិ៍ពីម្សិលមិញថា មន្ត្រីក្រសួងនេះបានប្រកាសទ្រព្យសម្បត្តិ និងបំណុលតាមកាលកំណត់ដោយច្បាប់ និងបានធ្វើឡើងតាមរយៈក្រុមជនបង្គោលជាបន្តបន្ទាប់។ លោកបញ្ជាក់ថា ការប្រកាសនេះគឺជាករណីចាំបាច់ដែលក្រសួងក៏តែងតែជំរុញដល់មន្ត្រីរបស់ខ្លួនដើម្បីចូលរួមទប់ស្កាត់អំពើពុករលួយ។
លោកបន្តថា៖ «មន្ត្រីក្រសួងព័ត៌មានទាំងអស់ដែលជាប់កាតព្វកិច្ច គឺបានបំពេញបែបបទជាបន្តបន្ទាប់ទៅហើយ។ ចំពោះខ្ញុំ ខ្ញុំបានប្រកាសរួចហើយ»។
យោងតាមច្បាប់ប្រឆាំងអំពើពុករលួយរាល់ជនទាំងឡាយណាដែលមិនបានចូលខ្លួនមកប្រកាសទ្រព្យសម្បត្តិ និងបំណុលតាមកាលកំណត់នោះអាចប្រឈមនឹងការពិន័យជាប្រាក់ និងការដាក់ពន្ធនាគារចាប់ពី ១ ខែ ដល់ ១ ឆ្នាំ។
លោក លឹមហុង បញ្ជាក់ថារហូតមកដល់បច្ចុប្បន្នមិនទាន់មានបុគ្គលណាម្នាក់ទទួលរងនូវទណ្ឌកម្មនេះនៅឡើយទេ ខណៈកន្លងមកគ្រាន់តែមានការជូនដំណឹងពីភាពយឺតយ៉ាវក្នុងការប្រកាសទ្រព្យសម្បត្តិតែប៉ុណ្ណោះ។
លោក សន ជ័យ ប្រធានអង្គការសម្ព័ន្ធគណនេយ្យភាពសង្គមកម្ពុជាបានលើកឡើងថា ច្បាប់ប្រឆាំងអំពើពុករលួយនៅតែមានចំណុចខ្វះខាតច្រើន ដែលជាទូទៅការប្រកាសទ្រព្យសម្បតិ្តនេះបានដាក់នៅក្នុងស្រោមសំបុត្រដែលលោកចង់ឲ្យមានការពិនិត្យមើលទៅលើលក្ខខណ្ឌផ្លូវច្បាប់ឡើងវិញ ដើម្បីឲ្យមានការបើកចំហជាសាធារណៈ។
លោកថាកន្លងមកការប្រកាសទ្រព្យសម្បត្តិនេះគឺគ្រាន់តែជាយន្តការមួយដែលធ្វើឡើងទៅតាមច្បាប់តែប៉ុណ្ណោះក៏ប៉ុន្តែចំពោះបទល្មើសពុករលួយផ្សេងៗគឺភាគច្រើនក្នុងទម្រង់នៃការរំលោភអំណាច និងបទល្មើសព្រៃឈើនៅតែបន្តកើតមាន។
លោកថា៖ «យើងចង់ឃើញទិដ្ឋភាពមួយនៃការប្រកាសទ្រព្យសម្បត្តិជាសាធារណៈដោយការធ្វើវិសោធនកម្មច្បាប់ស្តីពីការប្រឆាំងអំពើពុករលួយនេះ»៕
វីដេអូ៖
