.jpg)
ក្រុមអ្នកសម្អាតចុះប្រមូលសំរាម តាមប្រឡាយក្នុងរាជធានីភ្នំពេញ កាលពីឆ្នាំ ២០១៤។ រូបថត ផាក់ ស៊ាងលី
ភ្នំពេញៈ នៅថ្ងៃទី ១៥ ខែកញ្ញាស្អែកនេះប្រជាពលរដ្ឋប្រមាណជាង ២០ លាននាក់ក្នុងបណ្ដាប្រទេស ១៥០ លើពិភពលោករួមទាំងកម្ពុជាផងដែរនឹងនាំគ្នារៀបចំទិវាសម្អាតអនាម័យពិភពលោកក្រោមប្រធានបទ «រួមគ្នាដើម្បីពិភពលោកស្អាត» ខណៈដែលសំរាមនៅតែត្រូវបានគេបោះចោលពាសវាលពាសកាលនៅតាមទីសាធារណៈនានា ទាំងនៅរាជធានីភ្នំពេញ និងនៅតាមបណ្តាខេត្ត។
លោក នេត្រ ភត្រា រដ្ឋលេខាធិការ និងជាអ្នកនាំពាក្យក្រសួងបរិស្ថានបានថ្លែងកាលពីម្សិលមិញថា សម្រាប់ប្រទេសកម្ពុជា ទិវានេះនឹងមានការចូលរួមពីគ្រប់ភាគីពាក់ព័ន្ធទាំងអស់ ចុះធ្វើសកម្មភាពបោសសម្អាត និងអនាម័យ នៅតាមទីធ្លាសាធារណៈ ដើម្បីលើកកម្ពស់បរិស្ថាន និងសោភណភាពក្នុងរាជធានី- ខេត្ត ទូទាំងប្រទេសកម្ពុជា។
លោកថ្លែងថា៖ «រឿងបរិស្ថានគឺជារឿងរបស់យើងទាំងអស់គ្នា ដូច្នេះចាំបាច់គ្រប់បណ្ដាភាគីពាក់ព័ន្ធទាំងអស់នៅក្នុងក្របខ័ណ្ឌទូទាំងប្រទេសត្រូវរួមគ្នាការពារ អភិរក្ស និងអភិវឌ្ឍដោយសម្អាតបរិស្ថានរបស់យើងឲ្យបានល្អ ពោលគឺរួមគ្នាបញ្ឈប់ការបំផ្លិចបំផ្លាញ និងបំពុលបរិស្ថានតទៅទៀត»។
បើតាមលោក ភត្រា ប្រជាពលរដ្ឋនៅតាមមូលដ្ឋាន គប្បីត្រូវសម្អាតគេហដ្ឋាន និង ទីធ្លាជុំវិញផ្ទះរួមទាំងដងផ្លូវសាធារណៈ និងទីកន្លែងផ្សេងៗទៀតនៅក្នុងសហគមន៍របស់ពួកគេឲ្យបានល្អស្អាតដើម្បីលើកកម្ពស់បរិស្ថាន និងសោភណភាពលំនៅឋាន និងសហគមន៍របស់ពួកគេ។ លោកបញ្ជាក់ថា៖ «បរិស្ថានល្អស្អាតនាំឲ្យការរស់នៅមានផាសុកភាព»។
ជាមួយគ្នានេះដែរលោក ហង់ ជួនណារ៉ុន រដ្ឋមន្ត្រីក្រសួងអប់រំ យុវជន និងកីឡា បានអំពាវនាវដល់គ្រប់គ្រឹះស្ថានសិក្សាទាំងអស់ដឹកនាំសិស្សានុសិស្ស ចូលរួមនៅក្នុងទិវានេះ ដើម្បីបោសសម្អាត និងអនាម័យនៅក្នុងទីធ្លាសាលារៀន និងទីសាធារណៈនានាឲ្យបានស្អាតប្រកបដោយសុខភាព។
លោកថ្លែងថា៖ «សូមគ្រឹះស្ថានសិក្សា សិស្សានុសិស្ស លោកគ្រូ អ្នកគ្រូ មាតាបិតាសិស្សចូលរួមសម្អាតបរិស្ថានដើម្បីឱ្យពិភពលោកកាន់តែស្រស់ស្អាត និងកាត់បន្ថយការប្រើប្រាស់ថង់ប្លាស្ទិក និងគ្រប់គ្រងកាកសំណល់បានត្រឹមត្រូវ»។
នៅរាជធានីភ្នំពេញមានសំរាម និងកាកសំណល់ផ្ទះបាយត្រូវបានគេប៉ាន់ប្រមាណជាមធ្យម ២៧០០ តោនក្នុងមួយថ្ងៃក្នុងនោះកាកសំណល់ថង់ និងជ័រប្លាស្ទិកគ្រប់ប្រភេទមានចំនួន ១៨ ភាគរយនៃកាកសំណល់ដែលប្រមូលបានពីទូទាំង ១២ ខណ្ឌក្នុងរាជធានី។ នេះបើតាមលោក កែវ ចាន់ណារិទ្ធ ប្រធានគណៈគ្រប់គ្រងទីលានចាក់សំរាមដង្កោកាលពីម្សិលមិញ។
លោកបន្តថា៖ «ការប្រមូល និងគ្រប់គ្រងកាកសំណល់ថង់ប្លាស្ទិកគឺមិនងាយស្រួលនោះទេ។ ថង់ប្លាស្ទិកងាយរសាត់ទៅតាមខ្យល់ និងបង្កឲ្យខូចសោភណភាព និងបរិស្ថានក្នុងទីក្រុងដូចជាបង្កការកកស្ទះប្រព័ន្ធលូទឹកធ្វើឲ្យមានការលិចលង់នៅពេលមានភ្លៀងធ្លាក់ជាដើម»។
រដ្ឋាភិបាលកម្ពុជាតាមរយៈក្រសួងបរិស្ថានកាលពីពេលថ្មីៗកន្លងទៅនេះ បានចេញសារាចរណែនាំដល់គ្រប់បណ្ដាមន្ទីរ ស្ថាប័ន និងអង្គភាពរួមទាំងបុគ្គលពាក់ព័ន្ធទាំងអស់ចូលរួមបញ្ឈប់ការបោះចោលសំរាម និងកាកសំណល់គ្រប់ប្រភេទពាសវាលពាសកាល ដោយទាមទារឲ្យមានការបែងចែក និងវេចខ្ចប់សំរាមឲ្យបានត្រឹមត្រូវតាមលក្ខណៈបច្ចេកទេស។
មិនតែប៉ុណ្ណោះបានដាក់ចេញនូវការផាកពិន័យយ៉ាងធ្ងន់ធ្ងរផងដែរដល់ជនទាំងឡាយណាដែលបន្តបោះចោលសំរាមដោយឥតសណ្ដាប់ធ្នាប់លើទីសាធារណៈ។
ជាមួយគ្នានេះក្រសួងបានតម្រូវឲ្យគ្រប់បណ្ដាអាជីវករក្នុងផ្សារទំនើបទាំងអស់ត្រូវបូកបន្ថែមតម្លៃថង់ប្លាស្ទិកចំនួន ៤០០ រៀលក្នុងមួយថង់លើទំនិញដែលអតិថិជនរបស់ខ្លួនបានទិញ និងទាមទារវេចខ្ចប់ដោយថង់ប្លាស្ទិកនោះផងដែរ។
ទោះជាបែបនេះក្ដី ថង់ប្លាស្ទិកនៅតែត្រូវបានគេប្រទះឃើញអណ្ដែតនៅតាមមាត់ច្រាំងទន្លេ ស្ទឹង បឹង ព្រែក និងតាមប្រព័ន្ធលូរំដោះទឹកក្នុងរាជធានី-ខេត្ត និងតាមដងផ្លូវ ឬសួនច្បារសាធារណៈផងដែរ៕
