.jpg)
សាកសពបុរសជនជាតិចិនដែលត្រូវគេបាញ់សម្លាប់។ រូបថត នគរបាល
ព្រះសីហនុៈ នគរបាលខេត្តព្រះសីហនុកាលពីម្សិលមិញនៅតែកំពុងបន្តធ្វើការស៊ើបអង្កេតករណីបាញ់បុរសជនជាតិបរទេសម្នាក់ស្លាប់នៅភូមិ ១ សង្កាត់ លេខ ៤ ខេត្តព្រះសីហនុកាលពីថ្ងៃទី ២៤ ខែ សីហា ឆ្នាំ ២០១៩ និងករណីដែលជនបរទេសមួយក្រុមបានព្រួតគ្នាវាយអ្នកបកប្រែភាសាជាជនជាតិខ្មែរម្នាក់កាលពីថ្ងៃទី ២៣ ខែ សីហា។
ជនបរទេសដែលត្រូវបានគេបាញ់សម្លាប់នោះ ត្រូវបានរាយការណ៍ថា គឺជាជនជាតិចិន។ លោកឧត្តមសេនីយ៍ទោ ជួន ណារិន្ទ ស្នងការនគរបាលខេត្តព្រះសីហនុបានប្រាប់ភ្នំពេញប៉ុស្តិ៍កាលពីម្សិលមិញថា ករណីក្រុមជនជាតិចិនដែលបាញ់សម្លាប់បុរសជាជនជាតិចិនដូចគ្នាម្នាក់ស្លាប់កាលពីថ្ងៃទី ២៤ ខែសីហា និងក្រុមជនជាតិចិន ១ ក្រុមទៀតដែលព្រួតគ្នាវាយអ្នកបកប្រែភាសាជាជនជាតិខ្មែរនោះសមត្ថកិច្ចរបស់លោកកំពុងតែធ្វើការស្រាវជ្រាវរកអត្តសញ្ញាណក្រុមជនល្មើសទាំងនោះហើយ។
លោកថ្លែងថា៖ «សមត្ថកិច្ចរបស់ខេត្តព្រះសីហនុកំពុងប្រជុំពិភាក្សាគ្នាដើម្បីចាត់ការរឿងទាំង ២ ករណីនេះហើយ»។
ដូចគ្នានេះដែរលោក កុល ផាលី ស្នងការរងទទួលផែនព្រហ្មទណ្ឌនៃស្នងការនគរបាល ខេត្តព្រះសីហនុក៏បានឲ្យដឹងផងដែរថា ជុំវិញបញ្ហានេះកម្លាំងសមត្ថកិច្ចកំពុងធ្វើការស្រាវជ្រាវ ដើម្បីចាប់ខ្លួនក្រុមជនសង្ស័យទាំង ២ ក្រុមនេះហើយ។ «ករណីនេះយើងមិនធ្វេសប្រហែសឡើយ មិនទាន់បានកំណត់អត្តសញ្ញាណជនល្មើសទេ ប៉ុន្តែពួកគេជាជនជាតិចិនដូចគ្នា»។
បើតាមលោក ផាលី ហេតុការណ៍នេះបានកើតឡើងនៅរសៀលថ្ងៃទី ២៤ ខែ សីហា ឆ្នាំ ២០១៩ នៅផ្ទះសំណាក់មួយកន្លែងស្ថិតក្នុងភូមិ ១ សង្កាត់លេខ ៤។ ចំពោះជនជាតិចិនដែលត្រូវជនល្មើសបាញ់ស្លាប់នេះសមត្ថកិច្ចនៅមិនទាន់ស្គាល់អត្តសញ្ញាណនៅឡើយទេ។
ដោយឡែកកាលពីថ្ងៃទី ២៣ ខែ សីហា ឆ្នាំ ២០១៩ ក៏កើតមានអំពើហិង្សាដែលមានក្រុមជនជាតិចិន ១ ក្រុមបានព្រួតគ្នាវាយទៅលើបុរសរងគ្រោះជាជនជាតិខ្មែរ ហើយក៏នាំគ្នារត់គេចខ្លួនបាត់អស់។ សមត្ថកិច្ចក៏មិនទាន់ដឹងពីមូលហេតុពិតប្រាកដដែលនាំឲ្យមានការវាយគ្នានេះដែរ ហើយកំពុងធ្វើការស្រាវជ្រាវរកអត្តសញ្ញាណទាំងជនរងគ្រោះ និងក្រុមជនបង្កព្រោះក្នុងហេតុការណ៍នោះក្រុមជនល្មើសបានដឹកជនរងគ្រោះតាមរថយន្តគេចខ្លួន។
កាលពីថ្ងៃទី ៦ ខែ ឧសភា ឆ្នាំ ២០១៩ បុរសជនជាតិចិនម្នាក់ត្រូវជនជាតិចិនដូចគ្នាបាញ់សម្លាប់ទម្លាក់ពីលើរថយន្ត។ ប៉ុន្តែក្រោយប៉ុន្មានម៉ោងត្រូវសមត្ថកិច្ចនគរបាលចាប់ខ្លួនបាន ២ នាក់ហើយកាលពីខែ កក្កដា ឆ្នាំ ២០១៩ ស្ត្រីជនជាតិចិនម្នាក់ឈ្មោះ Zhang Dan អាយុ ២៥ ឆ្នាំជាបុគ្គលិកបម្រើការនៅកាស៊ីណូ អេស វី (S.V) ក្នុងខេត្តព្រះសីហនុក៏ត្រូវបានគេបាញ់សម្លាប់ផងដែរ ខណៈនាងដើរចេញពីកាស៊ីណូ៕
