.jpg)
អាវុធចាស់ៗដែលសមត្ថកិច្ចប្រមូលបាន ហើយត្រៀមកម្ទេចចោល។ រូបថត កោះសន្តិភាព
កំពតៈ ស្នងការដ្ឋាននគរបាលខេត្តកំពតគ្រោងដឹកអាវុធចាស់ៗ និងខូចគុណភាពចំនួន ១ ៣៩២ ដើម ដែលប្រមូលបានពីតាមបណ្ដាអង្គភាពនគរបាលប៉ុស្តិ៍ និងអធិការដ្ឋាននគរបាលនៅទូទាំងខេត្តនេះយកទៅរក្សាទុកជាបណ្ដោះអាសន្ននៅក្នុងឃ្លាំងសុវត្ថិភាពនៃនាយកដ្ឋានគ្រប់គ្រងអាវុធជាតិផ្ទុះក្រសួងមហាផ្ទៃ ដើម្បីរង់ចាំការកិនកម្ទេចចោលនៅពេលឆាប់ៗ។
លោក ណុប សារ៉េត ស្នងការរងទទួលបន្ទុកផ្នែកអាវុធជាតិផ្ទុះបានប្រាប់ភ្នំពេញប៉ុស្តិ៍កាលពីម្សិលមិញថា អាវុធចាស់ៗ និងខូចគុណភាពទាំងនោះភាគច្រើនជាប្រភេទ AK CKC និង M-16។ ពួកវាត្រូវបានប្រមូលពីបណ្ដាអង្គភាពនគរបាលប៉ុស្តិ៍ និង អធិការដ្ឋាននានានៅទូទាំងខេត្តកំពត។
លោកថ្លែងថា៖ «នៅពេលនេះអាវុធចាស់ៗ និងខូចគុណភាពទាំងនោះត្រូវបានរក្សាទុកនៅក្នុងឃ្លាំងរបស់ស្នងការដ្ឋាននគរបាលខេត្តកំពត ដើម្បីទុកប្រគល់ទៅឲ្យខាងមន្ត្រីនគរបាលជំនាញមកពីនាយកដ្ឋានគ្រប់គ្រងអាវុធជាតិផ្ទុះក្រសួងមហាផ្ទៃពិនិត្យ និងដឹកយកទៅរក្សាទុកក្នុងឃ្លាំងដើម្បីធ្វើការជួសជុល ឬកិនកម្ទេចចោលនៅពេលដ៏ខ្លីខាងមុខ»។
ដោយឡែកលោក ឯម រដ្ឋា ស្នងការរងទទួលបន្ទុកផ្នែកអាវុធជាតិផ្ទុះខេត្តកណ្ដាលក៏បានឲ្យដឹងដែរថា កន្លងមកក្រុមការងាររបស់លោកក៏បានប្រគល់នូវអាវុធចាស់ៗ និងខូចគុណភាពប្រមាណជាង ១០០០ ដើមទៅឲ្យនាយកដ្ឋានគ្រប់គ្រងអាវុធជាតិផ្ទុះក្រសួងមហាផ្ទៃដើម្បីរក្សាទុកធ្វើការជួសជុល និងកម្ទេចចោលផងដែរ។
លោកថា៖ «អាវុធចាស់ៗ និងខូចគុណភាពទាំងនោះភាគច្រើនជាអាវុធដែលនៅសេសសល់តាំងពីសម័យសង្គ្រាមនាទសវត្សរ៍ឆ្នាំ ១៩៧០ និង ១៩៨០»។
ចំណែកលោក ស៊ុន អេង អធិការស្រុកស្វាយលើ ខេត្តសៀមរាបថ្លែងថាអាវុធចាស់ៗមួយចំនួនត្រូវបានគេយកទៅជួសជុលកែច្នៃ និងប្រើប្រាស់នៅក្នុងបទល្មើសផ្សេងៗ ពិសេសបទល្មើសបរបាញ់សត្វព្រៃ។ ប៉ុន្តែដោយមានការផ្សព្វផ្សាយអប់រំជារឿយៗ អំពីគ្រោះថ្នាក់នៃការប្រើប្រាស់អាវុធជាតិផ្ទុះខុសច្បាប់ ប្រជាពលរដ្ឋនៅឃុំខ្នងភ្នំកាលពីថ្ងៃចន្ទបាននាំយកអាវុធកែច្នៃរបស់ពួកគេសរុប ១៧ ដើមប្រគល់ឲ្យសមត្ថកិច្ច ដើម្បីយកមករក្សាទុក និងកម្ទេចចោលនៅពេលក្រោយ។
យ៉ាងណាក្ដីគ្មានរបាយការណ៍ណាមួយបង្ហាញឲ្យដឹងអំពីតួលេខនៃអាវុធចាស់ៗ និង ខូចគុណភាពដែលត្រូវបានប្រមូលពីគ្រប់បណ្ដាខេត្តក្រុងក្នុងប្រទេសកម្ពុជានោះទេ។
ប៉ុន្តែកាលពីជាង ១០ ឆ្នាំមុន កម្ពុជាធ្លាប់បានរៀបចំពិធីកិនកម្ទេចចោលនូវកាំភ្លើងចាស់ៗរាប់ពាន់ដើមដែលជាសំណល់ពីសម័យសង្គ្រាម។
លោក ធាម ប៊ុនសេង ប្រធាននាយកដ្ឋានគ្រប់គ្រងអាវុធជាតិផ្ទុះនៃក្រសួងមហាផ្ទៃកាលពីម្សិលមិញបានបដិសេធធ្វើអធិប្បាយជុំវិញករណីអាវុធខូចគុណភាពនេះ៕
