ភ្នំពេញៈ នគរបាលប្រឆាំងបទល្មើសគ្រឿងញៀនរាជធានីភ្នំពេញចាប់ជនសង្ស័យចំនួន ៣០ នាក់ កាលពីថ្ងៃទី ១២ ធ្នូ និងរឹបអូសបានគ្រឿងញៀនចំនួន ១៥ កញ្ចប់ នៅចំណុចផ្លូវរថភ្លើងក្នុងសង្កាត់ស្រះចក ខណ្ឌដូនពេញ រាជធានីភ្នំពេញ។
លោក អ៊ីវ ភារិទ្ធ ប្រធានការិយាល័យប្រឆាំងបទល្មើសគ្រឿងញៀនរាជធានីភ្នំពេញប្រាប់ពីម្សិលមិញថា កម្លាំងសមត្ថកិច្ចនៃការិយាល័យប្រឆាំងគ្រឿងញៀននៃស្នងការដ្ឋានរាជធានីភ្នំពេញបានចុះបង្ក្រាបបទល្មើសគ្រឿងញៀន និងឃាត់ខ្លួនមនុស្សប្រុសបានចំនួន ៣០ នាក់ ដែលពួកគេសុទ្ធជាអ្នកពាក់ព័ន្ធបទល្មើសគ្រឿងញៀនទាំងអស់។
លោកថ្លែងប្រាប់ថា៖ «ប៉ុន្តែខាងសមត្ថកិច្ចរបស់ខ្ញុំកំពុងបន្តនីតិវិធីសាកសួរពួកគេទៀតពាក់ព័ន្ធបទល្មើសនេះ»។
លោកឲ្យដឹងថា ការចុះបង្ក្រាបបទល្មើសគ្រឿងញៀននៅក្នុងភូមិសាស្ត្រនោះ គឺសមត្ថកិច្ចបានអនុវត្តទៅតាមជំនាញហើយចាប់ជនល្មើសបានក្នុងបទល្មើសជាក់ស្តែង។ ក្នុងចំណោមមនុស្ស ៣០ នាក់នោះ មាន ៣ នាក់ ជាអ្នកជួញដូរ ហើយអ្នកដែលសល់ពីនោះជាអ្នកប្រើប្រាស់។ សមត្ថកិច្ចកំពុងបន្តពិនិត្យទឹកនោមលើពួកគេម្នាក់ៗ។
ចំពោះវត្ថុតាងដែលរឹបអូសបានមានថ្នាំញៀនដែលច្រកក្នុងថង់ប្រភេទមេតំហ្វេតាមីនមានចំនួន ១៣ កញ្ចប់តូច និង ២ កញ្ចប់ធំ (ល្មម) ម៉ូតូចំនួន ១០ គ្រឿង, ម៉ូតូកង់ ៣ (pass app) ចំនួន ៣ គ្រឿង, ដាវសាមូរ៉ៃចំនួន ១ ដើម, រថយន្តកូរ៉េ ចំណុះ ១ តោន ចំនួន ១ គ្រឿង, ឧបករណ៍សម្រាប់ជក់គ្រឿងញៀនចំនួន ៣។ ជនសង្ស័យនឹងបញ្ជូនទៅតុលាការដើម្បីចាត់ការទៅតាមច្បាប់៕