.jpg)
ក្រុមជនសង្ស័យពីបទប្លន់-លួច ដែលត្រូវសមត្ថកិច្ចចាប់ឃាត់ខ្លួន។ នគរបាល
ភ្នំពេញ: ជនសង្ស័យចំនួន ២ ក្រុម មានគ្នាចំនួន ១០ នាក់ ត្រូវបានកម្លាំងនគរបាលព្រហ្មទណ្ឌកម្រិតស្រាលនៃស្នងការដ្ឋាននគរបាលរាជធានីភ្នំពេញ បង្ហាញមុខកាលពីម្សិលមិញ ពាក់ព័ន្ធនឹងការប្រព្រឹត្តបទល្មើសលួច និងប្លន់ទ្រព្យសម្បត្តិអ្នកដទៃចំនួន ១២ ករណី។
លោក ប៊ុន សត្យា នាយការិយាល័យនគរបាលព្រហ្មទណ្ឌកម្រិតស្រាលនៃស្នងការដ្ឋាននគរបាលរាជធានីភ្នំពេញ ត្រូវបានអគ្គស្នងការដ្ឋាននគរបាលជាតិ ដកស្រង់សម្តីកាលពីម្សិលមិញថា ក្រុមជនសង្ស័យត្រូវបានកម្លាំងជំនាញស្រាវជ្រាវឃាត់ខ្លួន ចាប់ពីថ្ងៃទី ១៧ ដល់ថ្ងៃទី១៩ ខែឧសភា ឆ្នាំ ២០១៩ ដោយក្រុមទី១- មានជនសង្ស័យចំនួន ៧ នាក់ដែល ពាក់ព័ន្ធប្រព្រឹត្តបទល្មើសចំនួន ៦ ករណី និងក្រុមទី២- មានជនសង្ស័យ៣នាក់ ពាក់ព័ន្ធប្រព្រឹត្តបទល្មើស ៦ ករណី។
ក្រុមទី១- ពាក់ព័ន្ធប្រព្រឹត្តបទល្មើស ៦ ករណីរួមមាន អំពើលួចមានស្ថានទម្ងន់ទោស ដោយសារការប្រើ អំពើហិង្សា (ប្រើដាវកែច្នៃ កាប់ប្លន់យកទ្រព្យសម្បត្តិ) ចំនួន ៥ ករណី និងករណីប្រើប្រាស់សារធាតុញៀន ១ ករណី។ លោក សត្យា បន្តថា ជន សង្ស័យចំនួន ៧ នាក់ ដែលសុទ្ធតែភេទប្រុសត្រូវបានឃាត់ខ្លួននោះ ទី១- ហួរ វណ្ណឌី អាយុ ២០ ឆ្នាំ ឃាត់ខ្លួននៅថ្ងៃទី ១៧ ឧសភា។ ទី២- ឡេង សុខណៃ អាយុ ២២ ឆ្នាំ ឃាត់ខ្លួននៅថ្ងៃទី ១៧ ខែឧសភា នៅសង្កាត់ចោមចៅ ១។ ទី៣- ឃីន សូណាល់ អាយុ ១៩ ឆ្នាំ ត្រូវឃាត់ខ្លួននៅថ្ងៃទី ១៧ ខែឧសភា នៅសង្កាត់ចោមចៅ ១ ទី៤- ទ្រី ករុណា អាយុ ១៩ ឆ្នាំ ត្រូវឃាត់ខ្លួននៅថ្ងៃទី ១៧ ខែឧសភា នៅសង្កាត់ចោមចៅ១ ។ ទី៥- ចំរើន សម្បត្តិ អាយុ ២៦ ឆ្នាំ ឃាត់ខ្លួននៅថ្ងៃទី ១៧ ខែឧសភា នៅសង្កាត់ស្ទឹងមានជ័យ ២។ ទី៦- ស៊ាង ម៉េងលាភ អាយុ ១៩ ឆ្នាំ ឃាត់ខ្លួននៅថ្ងៃទី ១៧ ខែឧសភា នៅសង្កាត់ចោមចៅ ១ និងទី៧- លី វ៉ាន់ណេត អាយុ ១៧ ឆ្នាំ ត្រូវឃាត់ខ្លួននៅថ្ងៃទី ១៧ ខែឧសភានៅសង្កាត់ចោមចៅ ១។
លោក ប៊ុន សត្យា បន្តថា វត្ថុតាង និងភ័ស្តុតាងចាប់បានរួមមានដាវដែកចុងស្រួច ចំនួន ២ ដើម ម៉ូតូម៉ាកហុង ២ គ្រឿង ដែលពួកគេបានលួចពីម្ចាស់ឈ្មោះ តេង រាត្រី និងឈ្មោះ នូវ ឫទ្ធី ដែលពួកគេបានលួចនៅទីតាំង និងពេលវេលាផ្សេងគ្នា។
លោកបន្តថា ចំណែកក្រុមទី២ មានជនសង្ស័យចំនួន ៣ នាក់ ពាក់ព័ន្ធប្រព្រឹត្តបទល្មើសចំនួន ៦ ករណី រួមមាន អំពើលួចមានស្ថានទម្ងន់ទោស ដោយសារការប្រើអំពើហិង្សា (ឆក់ទ្រព្យសម្បត្តិ) ចំនួន ៤ ករណីអំពើលួច (កាច់កម៉ូតូ) ១ ករណី និងប្រើប្រាស់សារធាតុញៀនខុសច្បាប់ ១ ករណី។
ករណីទាំងនេះបានឃាត់ខ្លួនជនសង្ស័យចំនួន ៣ នាក់រួមមាន ទី១- បូ អៀង អាយុ ២០ ឆ្នាំ ត្រូវបានឃាត់នៅថ្ងៃទី ១៨ ខែ ឧសភា នៅសង្កាត់កាកាប ២។ ទី២- រី ហុង អាយុ ២៨ ឆ្នាំ ត្រូវបានឃាត់នៅថ្ងៃទី ១៨ ខែឧសភានៅសង្កាត់កាកាប ២ និងទី៣- ប៊ុន សុភ័ក្រ អាយុ ១៥ ឆ្នាំ ឃាត់នៅថ្ងៃទី ១៨ ខែឧសភា នៅសង្កាត់កាកាប ២។
លោកបញ្ជាក់ថា៖ «បច្ចុប្បន្នជនសង្ស័យ និងវត្ថុតាងខាងលើ ត្រូវបានកម្លាំងការិយាល័យនគរបាលព្រហ្មទណ្ឌកម្រិតស្រាល បានកសាងសំណុំរឿងបញ្ជូនទៅសាលាដំបូងរាជធានីភ្នំពេញចាត់ការតាមនីតិវិធី»។
លោក អ៊ី រិន្ទ អ្នកនាំពាក្យសាលាដំបូងរាជធានី កាលពីម្សិលមិញ បានបដិសេធការធ្វើអធិប្បាយជុំវិញករណីនេះ ដោយបង្វែរសំណួរទៅលោក លី សុផាណា អ្នកនាំពាក្យអយ្យការនៃសាលាដំបូងរាជធានី។ ប៉ុន្តែលោក លី សុផាណា មិនទទួលទូរស័ព្ទឡើយ។
លោក សន ជ័យ នាយកប្រតិបត្តិនៃអង្គការសម្ព័ន្ធគណនេយ្យភាពសង្គមកម្ពុជា (ANSA) ថ្លែងថា ករណីចោរប្លន់មានការថយចុះ ប៉ុន្ដែចោរលួច និងឆក់កាបូបតាមផ្លូវទីសាធារណៈហាក់នៅមិនទាន់ថមថយទេ ដោយលោកទាមទារឲ្យមានការចូលរួមទាំងការអនុវត្តច្បាប់ និងការប្រើបច្ចេកវិទ្យាដូចជា ការដាក់កាមេរ៉ាសុវត្ថិភាពតាមផ្ទះ និងតាមទីសាធារណៈនានាផងដែរ។
លោកបន្តថា បើមានកាមេរ៉ាសុវត្ថិភាពគ្រប់ទីកន្លែងបែបនេះវាបង្កភាពងាយស្រួលដល់សមត្ថកិច្ច ដើម្បីស៊ើបអង្កេត និងស្វែងរកមុខសញ្ញាទាំងអស់ ដែលបានប្រព្រឹត្តបទល្មើសនៅកន្លែងណាមួយ ប៉ុន្ដែលោកបារម្ភថា ក្រោយពីដឹងមុខសញ្ញាគ្រប់គ្រាន់ហើយ តែសមត្ថកិច្ចមិនសូវអើពើនឹងពាក្យបណ្ដឹងពលរដ្ឋ ក៏វាគ្មានប្រយោជន៍ដែរ។ «ការអនុវត្តច្បាប់ធូរលុង គឺវាចៀសមិនរួចពីរឿងកើតចោរច្រើនទេ មានន័យថា បើសមត្ថកិច្ចគាត់ខំចាប់ចោរមកបញ្ជូនទៅតុលាការ ប៉ុន្ដែបែរជាតុលាការដោះលែងមកវិញ ហើយចោរហ្នឹងដើរលួច ប្លន់វិញដដែល ដល់ពេលមានបញ្ហាម្ដងទៀត សមត្ថកិច្ចគាត់ខ្ជិលចាប់ ពេលគេសួរតុលាការ តុលាការឆ្លើយថា សមត្ថកិច្ចមិនព្រមចាប់ចោរ។ អ៊ីចឹង រឿងឆ្លើយដាក់គ្នាហ្នឹងគឺគេឃើញមានច្រើនរឿងមកហើយ»៕
