កណ្ដាលៈ ជនជាតិចិន ៣ នាក់ ត្រូវបានសមត្ថកិច្ចស្រុកអង្គស្នួល ខេត្តកណ្ដាលចាប់ខ្លួនបញ្ជូនទៅតុលាការកាលពីម្សិលមិញពាក់ព័ន្ធនឹងឃាតកម្មដោយមានការធ្វើទារុណកម្មអំពើឃោរឃៅ មានស្ថានទម្ងន់ទោសដែលធ្វើឲ្យជនរងគ្រោះចិនដូចគ្នាម្នាក់ស្លាប់កាលពីថ្ងៃអង្គារទី ២១ មករា។
សមត្ថកិច្ចបញ្ជាក់ថា ឃាតកម្មនេះផ្ដើមចេញពីការជំពាក់ប្រាក់ទិញសម្ភារអគ្គិសនី។ អធិការដ្ឋាននគរបាលស្រុកអង្គស្នួលបានរៀបរាប់នៅលើទំព័រហ្វេសប៊ុករបស់ខ្លួនថា សមត្ថកិច្ចបានឃាត់ខ្លួនជនសង្ស័យសញ្ជាតិចិន ៣ នាក់កាលពីថ្ងៃអង្គារដែលពាក់ព័ន្ធនឹងឃាតកម្មលើឈ្មោះ Liu Janping ជនជាតិចិន។
ជនសង្ស័យមានឈ្មោះ SONG WEIGUANG ភេទប្រុសអាយុ ៣៥ ឆ្នាំ ជនជាតិចិនដីគោក ឈ្មោះ BI CHUNNIAN ភេទប្រុសអាយុ ៥៨ ឆ្នាំ ជនជាតិចិនដីគោក មុខរបរប្រធានផ្នែកពិនិត្យគ្រឿងអេឡិចត្រូនិកស្នាក់នៅក្នុងរោងចក្រមួយក្នុងភូមិត្រពាំងឈើនាង ឃុំពើក ស្រុកអង្គស្នួល ខេត្តកណ្តាល។
ចំណែកជនសង្ស័យទី ៣ មានឈ្មោះ JIA HAI PING ភេទប្រុស អាយុ ៤៧ ឆ្នាំ ជនជាតិចិនដីគោក មុខរបរថៅកែរោងចក្រ HUA SHANG YI TONG នៅឃុំដំណាក់អំពិលស្រុកអង្គស្នួល ខេត្តកណ្តាល។ សមត្ថកិច្ចរកឃើញ និងដកហូត ខ្នោះដៃចំនួន ១ រថយន្តចំនួន ៥ គ្រឿង ជារបស់ជនសង្ស័យជិះធ្វើសកម្មភាព។
សមត្ថកិច្ចបានឲ្យដឹងផងដែរថា ចម្លើយសារភាពជនសង្ស័យបានឲ្យដឹងថា កាលពីថ្ងៃទី ២១ មករា វេលាម៉ោងប្រហែល ៩ ព្រឹក ពួកខ្លួនបានប្រទះឃើញជនរងគ្រោះនៅចំណុចក្នុងរោងចក្រអគ្គិសនី គីទ្បូម៉ែត្រលេខ ២៧ ស្ថិតនៅស្រុកអង្គស្នួល ខេត្តកណ្តាលពេលនោះពួកគេបានហៅជនរងគ្រោះឲ្យទៅដោះស្រាយគ្នារឿងជំពាក់ប្រាក់ចំនួន ១៦ ម៉ឺនដុល្លារ ថ្លៃទិញសម្ភារអគ្គិសនី។
ប៉ុន្តែជនរងគ្រោះមិនព្រមទៅជាមួយក៏ប្រើហិង្សាវាយទៅលើជនរងគ្រោះតែម្តង។ ពួកគេចាប់ជនរងគ្រោះចងដៃជើងដាក់បញ្ចូលក្នុងគូថរថយន្តដឹកឆ្ពោះមកក្រសួងមហាផ្ទៃ។ ពេលចេញដំណើរមកដល់ចំណុចម្តុំព្រលានយន្តហោះ អន្តរជាតិភ្នំពេញជនរងគ្រោះបានរបូតចំណងដៃ ពេលនោះជនសង្ស័យឈ្មោះ BI CHUNNIAN បានចាប់សង្កត់ខ្ទប់មាត់ និងទ្រូងទើបជនរងគ្រោះមានអាការ ថប់ដង្ហើមស្លាប់។
ជនរងគ្រោះមានស្លាកស្នាមដាច់រលាត់នៅលើថ្ងាសផ្នែកខាងស្តាំ ដាច់រលាត់លើចង្កាផ្នែកខាងឆ្វេង បាក់ធ្មេញក្រោមផ្នែកខាងមុខចំនួន ២ និងស្នាមជាំជាច្រើនកន្លែងនៅលើផ្នែកនានានៃអវយវៈ និងដងខ្លួន។
លោក ចៅ វុទ្ធី ប្រធានការិយាល័យព្រហ្មទណ្ឌកម្រិតធ្ងន់ខេត្តកណ្ដាលថ្លែងថា ជនសង្ស័យត្រូវបានបញ្ជូនទៅតុលាការខេត្តកាលពីថ្ងៃព្រហស្បតិ៍៕