.jpg)
លោកនាយករដ្ឋមន្ត្រី ហ៊ុន សែន ទស្សនកិច្ចនៅសាធារណរដ្ឋប្រជាធិបតេយ្យប្រជាមានិតឡាវកាលពីថ្ងៃម្សិលមិញ។ រូបថត ហ្វេសប៊ុក SPM
ភ្នំពេញៈ លោក ហ៊ុន សែន នាយករដ្ឋមន្ដ្រីនៃព្រះរាជាណាចក្រកម្ពុជា និងលោក ថងលូន ស៊ីសូលីត នាយករដ្ឋមន្ត្រីនៃប្រទេសឡាវបានឯកភាពគ្នាស្នើទៅរដ្ឋាភិបាលបារាំងឲ្យជួយបញ្ជូនផែនទី និងឯកសារនានាដើម្បី ដោះស្រាយបញ្ចប់បញ្ហាព្រំដែនរវាងប្រទេសកម្ពុជា និងឡាវហើយបានធ្វើការប្ដេជ្ញាចិត្តខ្ពស់ក្នុងការដោះស្រាយបញ្ចប់បញ្ហាព្រំដែនឲ្យបានឆាប់។
នៅក្នុងសន្និសីទសារព័ត៌មានរួមគ្នាកាលពីថ្ងៃទី ៥ ខែធ្នូ ឆ្នាំ ២០១៨ ក្នុងអំឡុងពេលទៅបំពេញទស្សនកិច្ចជាផ្លូវការនៅប្រទេសឡាវ លោកនាយករដ្ឋមន្ត្រីនៃប្រទេសទាំង ២ បានឯកភាពគ្នាលើគោលការណ៍ ៣ ចំណុចចំពោះបញ្ហានៅអូរតាង៉ាវ និងអូរអាឡៃដោយមិនឲ្យមានវត្តមានកងកម្លាំងទ័ពនៃប្រទេសទាំង ២ ឈរជើងមិនឲ្យប្រជាជនទៅធ្វើអាជីវកម្ម ឬប្រកបរបរនៅចំណុចនោះ និងនៅពេលត្រួតពិនិត្យត្រូវតែធ្វើរួមគ្នាទាំងលើគោក ផ្លូវទឹក និងផ្លូវអាកាស។
លោក ហ៊ុន សែន ដឹកនាំគណៈប្រតិភូជាន់ខ្ពស់រាជរដ្ឋាភិបាលកម្ពុជាអញ្ជើញទៅបំពេញទស្សនកិច្ចជាផ្លូវការនៅប្រទេសឡាវរយៈពេល ២ ថ្ងៃចាប់ពីថ្ងៃទី ៥-៦ ខែធ្នូ ឆ្នាំ ២០១៨។ ក្នុងនោះលោកនាយករដ្ឋមន្ត្រីទាំង ២ បានស្នើដល់រដ្ឋាភិបាលបារាំងឲ្យជួយបញ្ចូនផែនទី និងឯកសារនានាដើម្បីដោះស្រាយបញ្ចប់បញ្ហាព្រំដែនប្រទេសទាំង ២។
លោកនាយករដ្ឋមន្ត្រី ហ៊ុន សែន បានបញ្ជាក់ថា៖ «ទាក់ទងនឹងបញ្ហាព្រំដែននេះដែរគឺដូចនាយករដ្ឋមន្ត្រី ថងលូន បានលើកឡើងអម្បាញ់មិញ។ តំបន់អូរតាង៉ាវ ចាត់ទុកជាតំបន់មិនទាន់ដោះស្រាយដែលភ្ជាប់ដោយលក្ខខណ្ឌ ៣ យ៉ាង ទី ១ គឺគ្មានកងទ័ព ទី ២ គ្មានប្រជាជនទៅធ្វើអាជីវកម្ម ឬប្រកបរបរ ហើយទី ៣ បើមានករណីល្បាតត្រូវតែល្បាតរួមគ្នា ហើយក្រៅពីនេះគឺនាយករដ្ឋមន្ត្រីទាំង ២ បានព្រមព្រៀងគ្នា ហើយបានប្រគល់ភារកិច្ចឲ្យរដ្ឋមន្ត្រីការបរទេសទាំង ២ ធ្វើកិច្ចការចាប់ពីពេលនេះដល់ថ្ងៃស្អែកទៅលើសេចក្តីព្រាងបែបបទ បច្ចេកទេសដើម្បីផ្ញើជូនទៅកាន់ភាគីបារាំង»។
លោក ហ៊ុន សែន បានថ្លែងថានាយករដ្ឋមន្ត្រីទាំង ២ ធ្លាប់បានធ្វើលិខិតរួមគ្នាទៅសុំប្រធានាធិបតី ប្រទេសបារាំង ដើម្បីស្នើឲ្យផ្ទេរផែនទីពីផែនទីខ្នាត 1/100.000 មកផែនទី UTM ខ្នាត 1/50.000 វិញ។ នៅក្នុងលិខិតនោះដែរ ក៏មានស្នើសុំឯកសារ ដើម្បីដោះស្រាយបញ្ហារវាងកម្ពុជា និងឡាវ ហើយនាយករដ្ឋមន្ត្រីនៃប្រទេសទាំង ២ បានប្រគល់ភារកិច្ចឲ្យរដ្ឋមន្ដ្រីក្រសួងការបរទេសទាំង ២ ធ្វើកិច្ចការងារនេះបន្តទាក់ទងនឹងការផ្ទេរផែនទី ហើយត្រូវរៀបចំបែបបទបច្ចេកទេសយ៉ាងណាឲ្យភាគីបារាំងផ្ទេរផែនទីខ្នាត 1/100.000 មកផែនទី UTM ខ្នាត 1/50.000 ហើយចំណុចទី ២ បន្ដស្នើសុំទៅបារាំងឲ្យផ្ដល់ ឯកសារនានាដែលទាក់ទងជាមួយបញ្ហាព្រំដែននៃប្រទេសទាំង ២ កម្ពុជា-ឡាវ ជាពិសេសគឺចំណុចដែលនៅសេសសល់ចំនួន ១៦ ភាគរយ។
លោកបញ្ជាក់បន្ថែមថា៖ «យើងអំពាវនាវដល់ប្រធានាធិបតីបារាំងក៏ដូចជា រដ្ឋាភិបាលបារាំងជួយបញ្ចូនឯកសារណាដែលផ្ដល់នូវផលប្រយោជន៍លើការដោះស្រាយក្នុងទំនាក់ទំនងរវាងប្រទេសទាំង ២ លើបញ្ហាព្រំដែននេះ។ ខ្ញុំជាមួយឯកឧត្តម ថងលូន បានឯកភាពគ្នាអម្បាញ់មិញថា គួរបញ្ចប់បញ្ហាព្រំដែននៅក្នុងដំណាក់កាលរបស់យើងនេះឲ្យបានឆាប់ ហើយយើងប្រគល់កិច្ចការងារនេះទៅឲ្យផ្នែកពាក់ព័ន្ធនានា ជាពិសេសគណៈកម្មាធិការព្រំដែននៃប្រទេសទាំង ២»។
លើសពីនោះទៀតរាជរដ្ឋាភិបាលកម្ពុជា និងរដ្ឋាភិបាលនៃប្រទេសឡាវបានចុះកិច្ចព្រមព្រៀងស្តីពីវិស័យអប់រំ សម្រាប់រយៈពេល ៥ ឆ្នាំពីឆ្នាំ ២០១៩ ដល់ឆ្នាំ ២០២៤ អនុស្សរណៈនៃការយោគយល់គ្នាស្តីពីកិច្ចសហប្រតិបត្តិការលើវិស័យវប្បធម៌ និងសិល្បៈសម្រាប់ឆ្នាំ ២០១៩-២០២១ អនុស្សរណៈនៃការយោគយល់គ្នាស្តីពីការខ្ចីសត្វដំរីសម្រាប់ការបង្ហាញសិល្បៈ និងការផ្លាស់ប្តូរវប្បធម៌នៅសួនសត្វសាហ្វារី រាជធានីភ្នំពេញ និងអនុស្សរណៈនៃការយោគយល់គ្នាស្តីពីកិច្ចព្រមព្រៀងទិញ-លក់ ថាមពលអគ្គិសនីតាមតង់ស្យុងខ្ពស់ ២៣០ និង ៥០០ គីឡូវ៉ុលពីស្ថានីយបានហាត ប្រទេសឡាវមកស្ថានីយស្ទឹងត្រែងរបស់ប្រទេសកម្ពុជា។
លោកនាយករដ្ឋមន្ត្រី ហ៊ុន សែន បានថ្លែងថា៖ «ប្រជាពលរដ្ឋនៅតាមព្រំដែន គួរតែត្រូវបានសប្បាយរីករាយ។ អម្បាញ់មិញមានការចុះហត្ថលេខា ទិញអគ្គិសនីពីឡាវទៅផ្គត់ផ្គង់នៅកម្ពុជាអាចជាផ្នែកមួយយ៉ាងសំខាន់នៃកិច្ចសហប្រតិបត្តិការនៅក្នុងវិស័យពាណិជ្ជកម្មអគ្គិសនីដែលទិញពីឡាវទៅផ្គត់ផ្គង់នៅកម្ពុជា។ ក្រៅពីការតភ្ជាប់អគ្គិសនី យើងបានឯកភាពគ្នាលើការតភ្ជាប់ស្ពានឆ្លងកាត់ទន្លេភ្ជាប់ពីខេត្តព្រះវិហារ និងខេត្តចំប៉ាសាក់ ដែលផ្តល់ឱកាសឲ្យប្រជាជនទាំងសងខាងងាយស្រួលក្នុងការធ្វើទំនាក់ទំនងគ្នា»។
បញ្ហាព្រំដែនកម្ពុជា-ឡាវបានឡើងកម្ដៅកាលពីខែសីហាឆ្នាំ ២០១៧ ដោយសារកងទ័ពឡាវបានចូលមកឈរជើងនៅតំបន់អូរអាឡៃ និងអូរតាង៉ាវ ស្ថិតក្នុងស្រុកសៀមប៉ាង ខេត្តស្ទឹងត្រែង ហើយបើតាមមន្ដ្រីព្រំដែនគឺកម្ពុជា និងឡាវមានព្រំដែនជាប់គ្នាប្រវែង ៥៤០ គីឡូម៉ែត្រដោយត្រូវបោះបង្គោលព្រំដែនប្រមាណ ១៤៥ បង្គោល ប៉ុន្តែមកទល់ពេលនេះភាគីទាំង ២ បានបោះរួចចំនួន ១២១ បង្គោលនៅសល់ប្រមាណ ២៤ បង្គោលទៀតក្នុងខេត្តព្រះវិហារ និងខេត្តស្ទឹងត្រែង។
ទន្ទឹមនឹងនេះដែរបើយោងតាមការឲ្យដឹងរបស់លោកស្រី ថាមរុង្គ រដ្ឋមន្ត្រីប្រតិភូអមនាយករដ្ឋមន្ត្រីកាលពីព្រឹកថ្ងៃពុធបានឲ្យដឹងថា ប្រទេសកម្ពុជា និងវៀតណាមនឹងចុះហត្ថលេខាលើឯកសារចំនួន ៦ ដោយផ្តោតទៅលើកិច្ចសហប្រតិបត្តិការលើវិស័យដឹកជញ្ជូនផ្លូវគោក ផ្លូវទឹក ផ្លូវអាកាស វិស័យអប់រំ ការបោះបង្គោលព្រំដែន និងការសម្រួលពាណិជ្ជកម្មនៃប្រទេសទាំង ២។
ក្រោយពីបញ្ចប់ទស្សនកិច្ចផ្លូវការនៅក្នុងប្រទេសឡាវ លោក ហ៊ុន សែន នាយករដ្ឋមន្ត្រីនឹងបន្តដឹកនាំគណៈប្រតិភូជាន់ខ្ពស់រាជរដ្ឋាភិបាលកម្ពុជាទៅបំពេញទស្សនកិច្ចផ្លូវការនៅប្រទេសវៀតណាមដែលនឹងចាប់ផ្ដើមពីថ្ងៃទី ៧ ដល់ ៨ ខែធ្នូ ឆ្នាំ ២០១៨៕
