ភ្នំពេញៈ លោកនាយករដ្ឋមន្ត្រី ហ៊ុន សែន បានធ្វើការណែនាំដល់ក្រសួង ស្ថាប័នពាក់ព័ន្ធ និងរដ្ឋបាលថ្នាក់ក្រោមជាតិ ត្រូវអនុវត្តវិធានការទប់ស្កាត់ និងកាត់បន្ថយការបំពុលខ្យល់សាធារណៈ ដើម្បីគ្រប់គ្រងទីតាំងប្រភពបំពុលខ្យល់ឱ្យបានកាន់តែប្រសើរសំដៅធានាសុវត្ថិភាព និងសុខុមាលភាពប្រជាពលរដ្ឋ និងកែលម្អសោភណភាពនៅតាមរាជធានី-ខេត្ត។
សារាចរស្តីពីវិធានការទប់ស្កាត់ និងកាត់បន្ថយការបំពុលខ្យល់សាធារណៈ ដែលចុះហត្ថលេខាដោយលោក ហ៊ុន សែន កាលពីថ្ងៃទី ២ ខែមករាឆ្នាំ ២០២០ បានបញ្ជាក់ថា ការអនុវត្តច្បាប់ពាក់ព័ន្ធនឹងការគ្រប់គ្រងទីតាំងប្រភពបំពុលខ្យល់នៅមានកម្រិតនៅឡើយ និងមិនទាន់បានឆ្លើយតបទៅនឹងការរីកចម្រើនយ៉ាងឆាប់រហ័សនៃសេដ្ឋកិច្ចជាតិ។
សារាចរបញ្ជាក់ថា កំហាប់ភាគល្អិតនិចលមានវិជ្ឈមាត្រតូចជាង ២,៥ មីក្រូម៉ែត្រ (PM២.៥) ដែលមានការកើនឡើងអាចបង្កហានិភ័យដល់សុខភាពសាធារណៈ និងគុណភាពបរិស្ថាន។ មូលហេតុដែលបង្កឱ្យកំហាប់ភាគល្អិតនិចល PM ២,៥ កើនឡើងនេះគឺបណ្តាលមកពីការបញ្ចេញផ្សែងពីរោងចក្រឧស្សហកម្ម យានយន្តប្រើប្រាស់ប្រេងម៉ាស៊ូត និងចំហេះឥន្ធនៈផ្សេងៗទៀត ភ្លើងឆេះព្រៃ ការដុតរានដីព្រៃ ការដុតវាលស្មៅ ការដុតគល់ជ្រាំង ការដុតសំរាម ការដុតសំណល់រឹងនៅតាមទីវាល និងទីលានចាក់សំណល់ ការដ្ឋានសំណង់។
សារាចរបញ្ជាក់ថា៖ «ការបំពុលខ្យល់នឹងមានសភាពកើនឡើងជាបន្តបន្ទាប់ ប្រសិនបើមិនមានវិធានការគ្រប់គ្រងឱ្យបានសមស្រប»។
បើតាមសារាចរនេះលោក ហ៊ុន សែន បានណែនាំឱ្យស្ថាប័នក្រោមឱវាទរបស់លោកត្រូវគ្រប់គ្រងនូវការដ្ឋានសំណង់ គុណភាពប្រេងឥន្ធនៈដែលផ្ទុកជាតិស្ពាន់ធ័រខ្ពស់ ការបញ្ចេញសារធាតុបំពុលខ្យល់ពីយានយន្ត ការបញ្ចេញសារធាតុបំពុលខ្យល់ពីទីតាំងផលិតកម្ម ការដុតសំណល់នៅទីចំហ ការបង្កើតប្រព័ន្ធតាមដាន និងព្យាករការបំពុល។
លោក នេត្រ ភក្ត្រា រដ្ឋលេខាធិការ និងជាអ្នកនាំពាក្យក្រសួងបរិស្ថានថ្លែងកាលពីថ្ងៃអាទិត្យថា លោកមិនអាចធ្វើអត្ថាធិប្បាយបានទេ ដោយសារកំពុងជាប់រវល់។ ប៉ុន្តែលោក ភក្ត្រា ត្រូវបានស្រង់សម្ដីដោយ Fresh News កាលពីថ្ងៃទី ២ ខែមករាថាប្រភពបំពុលសំខាន់ៗដែលនាំឱ្យកើនឡើងយ៉ាងខ្លាំងនូវកំហាប់ភាគល្អិតនិចលក្នុងខ្យល់ PM ២,៥ នៅដើមរដូវប្រាំងឆ្នាំនេះនៅរាជធានីភ្នំពេញបណ្តាលមកពីការបញ្ចេញពីយានយន្តប្រើប្រាស់ប្រេងឥន្ធនៈចំនួន ៧០% ដែលមានកំហាប់ស្ពាន់ធ័រខ្ពស់ប្រភពធូលីចេញពីការដ្ឋានសំណង់ និងរោងចក្រលាយបេតុងចំនួន ២០% និងប្រភពផ្សេងៗទៀត ១០% ដែលរួមមានការដុតសំរាមនៅតាមលំនៅឋាន ធូលីដីនៅតាមដងផ្លូវការបញ្ចេញពីរោងចក្រ និងសិប្បកម្មជាដើម។
លោក ភក្ត្រា ថា៖ «ដើម្បីរក្សាបាននូវគុណភាពខ្យល់សាធារណៈនៅល្អប្រសើរដដែលចាំបាច់ត្រូវមានវិធានការគ្រប់គ្រងឱ្យបានល្អជាមុន ហេតុដូច្នេះបានជារាជរដ្ឋាភិបាលកម្ពុជាដាក់ឱ្យអនុវត្តនូវសារាចរស្តីពីវិធានការទប់ស្កាត់ និងកាត់បន្ថយការបំពុលខ្យល់សាធារណៈ»។
លោក ស ម៉ូរី អនុប្រធានបណ្តាញយុវជនកម្ពុជាដែលតែងតែចូលរួមចុះល្បាតព្រៃ ដើម្បីទប់ស្កាត់ការកាប់បំផ្លាញព្រៃឈើបានប្រាប់ភ្នំពេញប៉ុស្ដិ៍ពីថ្ងៃអាទិត្យថា សារាចររបស់លោក ហ៊ុន សែន ថ្មីនេះគឺជាវិធានការមួយល្អ ដែលគិតគូរអំពីសុខភាពសាធារណៈដែលអាចប៉ះពាល់ពីការបំពុលខ្យល់។ បច្ចុប្បន្ននៅរាជធានីភ្នំពេញមានរោងចក្រឧស្សាហកម្មដែលបានសាងសង់អស់រយៈពេលជាច្រើនឆ្នាំមកហើយ ហើយកំណើនប្រជាពលរដ្ឋក៏មានការកើនឡើងផងដែរ។ រោងចក្រឧស្សាហកម្មទាំងនោះមិនទាន់ត្រូវបានផ្លាស់ប្តូរទៅកាន់ទីតាំងឆ្ងាយពីរាជធានីនោះទេ។
លោក ស ម៉ូរី ថ្លែងថា៖ «ប្រសិនជារោងចក្រឧស្សាហកម្មនេះនៅតែបន្តនៅក្នុងរាជធានីភ្នំពេញបន្តទៅមុខទៀត ខ្ញុំគិតថា បញ្ហាបំពុលខ្យល់ហ្នឹងនឹងបង្កបញ្ហាខ្លាំងជាងមុនពី ១ ឆ្នាំទៅ ១ ឆ្នាំហើយស្របគ្នាដែលបច្ចុប្បន្នរាជធានីភ្នំពេញស្ថិតក្នុងដំណាក់កាលនៃការសាងសង់។ យើងមើលឃើញបញ្ហាដី បញ្ហាធូលីនៅក្នុងរាជធានីភ្នំពេញរួមផ្សំនឹងក្លិនសំរាមហ្នឹងក៏ជះឥទ្ធិពលទៅដល់ការបំពុលខ្យល់នៅក្នុងរាជធានីភ្នំពេញដែរ។ អ៊ីចឹងចំណុចទាំងអស់រដ្ឋាភិបាលគួរតែយកចិត្តទុកដាក់បន្ថែម»។
លោកបន្តថា បញ្ហាប្រឈមមួយទៀតគឺរដ្ឋាភិបាលមិនសូវបង្ហាញឱ្យសាធារណជនបានដឹងទេអំពីការសាងសង់ថាមពលដើរដោយធ្យូងថ្មដែលថ្មីៗនេះរាជរដ្ឋាភិបាលចាប់ផ្តើមសាងសង់រោងចក្រដើរដោយធ្យូងថ្មនៅក្រុងព្រះសីហនុបន្ថែមមួយទៀត ហើយក៏ឃើញផ្តល់អាជ្ញាប័ណ្ណដល់ក្រុមហ៊ុន Royal Group និងក្រុមហ៊ុនចិនដែលសាងសង់ថាមពលអគ្គិសនីដើរដោយធ្យូងថ្មនៅខេត្តកោះកុងក៏ដូចជាមានផែនការគ្រោងនឹងសាងសង់នៅខេត្តឧត្តរមានជ័យដូចគ្នាដែរ។
លោក ស ម៉ូរី បញ្ជាក់ថា៖ «យើងមើលឃើញថាថាមពលខ្យល់នេះប្រទេសអភិវឌ្ឍន៍មួយចំនួននៅលើពិភពលោក គេចាប់ផ្តើមឈប់ប្រើថាមពលប្រើដោយធ្យូងថ្មហើយ ព្រោះយើងដឹងថាថាមពលដើរដោយធ្យូងថ្មវាបានចូលរួមចំណែកដល់ការបំពុលខ្យល់ និងបំពុលបរិយាកាសខ្លាំងមែនទែន។ ប៉ុន្តែរាជរដ្ឋាភិបាលប្រទេសកម្ពុជាហាក់ដូចជាកំពុងតែប្រឹងប្រែងសាងសង់ថាមពលដើរដោយធ្យូងថ្មបន្ថែមទៅវិញ»៕