.jpg)
លោកនាយករដ្ឋមន្ត្រីបញ្ជាគ្រឿងចក្រជានិមិត្តរូបនៃការសាងសង់ផ្លូវថ្មីៗនេះ។ រូបថត SPM
ព្រះសីហនុៈ លោកនាយករដ្ឋមន្ដ្រី ហ៊ុន សែន អះអាងក្នុងពេលលោកធ្វើជាអធិបតីនៃពិធីបើកការដ្ឋានសាងសង់ផ្លូវចំនួន ៣៤ ខ្សែនៅខេត្តព្រះសីហនុកាលពីថ្ងៃសៅរ៍សប្ដាហ៍មុនថា ការបញ្ចេញថវិកាសន្សំ ១០០ លានដុល្លារ ក្នុងការស្ថាបនាផ្លូវទាំងនេះគឺតិចតួចបំផុត បើប្រៀបធៀបទៅនឹងថវិកាសន្សំរបស់រដ្ឋាភិបាលដែលមាន ខណៈការចំណាយលើផ្លូវទាំងនេះត្រូវប្រើថវិកាជិត ៣០០ លានដុល្លារ។
លោកបានថ្លែងថា ផ្លូវទាំងនេះមានប្រវែងតែ ៨៤ គីឡូម៉ែត្រប៉ុណ្ណោះ ប៉ុន្ដែត្រូវចំណាយទុនរហូតទៅដល់ ២៩៤ លានដុល្លារ ដែលនាំឲ្យមានចោទចេញជាសំណួរថា ហេតុអ្វីបានជាផ្លូវនេះថ្លៃម្ល៉េះ ហើយក៏មានខ្លះថាធ្វើផ្លូវធំៗតើបានលុយមកពីណា?
លោកបានបន្តថា៖ «ខ្ញុំសូមបញ្ជាក់បន្តិច យើងធ្វើជារាជរដ្ឋាភិបាល មិនមែនបានន័យថា យើងវ៉ៃអស់សន្លឹកបៀចេញពីដៃទេ។ ប្រាក់សន្សំរបស់រាជរដ្ឋាភិបាលដែលបញ្ចេញឲ្យខេត្ដព្រះសីហនុ ១០០ លានដុល្លារនេះ វាតិចតួចណាស់បើប្រៀបធៀបជាមួយនឹងប្រាក់សន្សំដែលរាជរដ្ឋាភិបាលមានជាសាច់ប្រាក់តែម្តង»។
លោកបានអះអាងថា ប្រសិនបើខេត្ដព្រះសីហនុមិនអាចមាននូវរបស់ដែលអាចទាក់ទាញយកនូវប្រភពទុនបាន រាជរដ្ឋាភិបាលក៏ហ៊ានបញ្ចេញថវិកាទាំង ៣០០ លានដុល្លារមកកាន់ខេត្ដព្រះសីហនុតែម្ដង។ លោកបានបន្ថែមថា មិនមែនរាជរដ្ឋាភិបាលអួតអាងទេ ក៏ប៉ុន្ដែអ្នកខ្លះគេគិតថា ហ៊ុន សែន ជិតដាច់ខ្យល់ហើយដោយសារសម្ពាធបរទេស។
លោកបញ្ជាក់ថា៖ «សូមទោសខ្ញុំគ្រាន់តែប្រាប់អ្នកឯងថា គ្រាន់តែចំណូលពន្ធគយ ១ គឺចិញ្ចឹមប្រាក់ខែគ្រប់គ្រាន់លើសពីសេចក្ដីត្រូវការគ្រាន់តែចំណូលពន្ធគយដែលក្នុង ១ ខែៗ គិតជាមធ្យម ២៥០ លានដុល្លារអាមេរិក»។
លោកនាយករដ្ឋមន្ដ្រីបង្ហាញថា កម្ពុជាមានប្រាក់ចំណូលក្នុង ១ ខែគឺប្រមាណ ៥០០ លានដុល្លារ ហើយចំណាយត្រឡប់ទៅវិញក្នុងរង្វង់ ៣០០-៤០០ លានដុល្លារ ក្នុង ១ ខែ ក៏កម្ពុជាអាចសន្សំប្រាក់ពី ១០០-២០០ លានដុល្លារ ក្នុង ១ ខែដែរ។
លោកបានរំឭកថា មូលហេតុដែលនាំឲ្យរាជរដ្ឋាភិបាលគិតគូរចំពោះការសាងសង់ផ្លូវនៅខេត្ដព្រះសីហនុឡើងវិញនេះ គឺក្រោយពេលលោកបានទៅដល់ខេត្ដព្រះសីហនុ អំឡុងពេលជួយសង្គ្រោះពលរដ្ឋពីករណីបាក់រលំអគារកម្ពស់ ៧ ជាន់ កាលពីខែមិថុនាកន្លងទៅ និងបានសង្កេតឃើញហេដ្ឋារចនាសម្ព័ន្ធផ្លូវថ្នល់ខូចខាតទាំងស្រុង ខណៈអគារខ្ពស់រាប់រយកំពុងរីកលូត។
លោកបានបញ្ជាក់ថា៖ «អ្វីដែលសំខាន់នៅពេលនោះខ្ញុំសង្កេតឃើញថា ហេដ្ឋារចនាសម្ព័ន្ធនៅក្នុងខេត្ដព្រះសីហនុប្រើប្រាស់លែងកើតហើយចាំបាច់ត្រូវកសាងឡើងវិញទាំងអស់ ព្រោះយើងក្រឡេកមើលខាងលើឃើញមានអគារស្អាតណាស់ ប៉ុន្ដែងាកមើលមកខាងក្រោមគឺនៅក្នុងភក់។...ល្អតែនៅខាងលើអគារទាំងឡាយតុបតែងភ្លើងល្អទាំងអស់ ក៏ប៉ុន្ដែងាកមកខាងក្រោមដើរជិះម៉ូតូ និងជិះឡានក្នុងភក់»។
តាមរបាយការណ៍ដែលអានដោយលោក គួច ចំរើន អភិបាលខេត្តព្រះសីហនុក្នុងពេលសម្ពោធការដ្ឋាននេះបានឲ្យដឹងថាផ្លូវទាំង ៣៤ ខ្សែនេះ មានប្រវែងសរុបជាង ៨៤ គីឡូម៉ែត្រ មានរង្វង់មូលចំនួន ៣ និងស្ពានចំនួន ៦ ប្រវែង ២៥២ ម៉ែត្រ។ ចក្ខុវិស័យផ្លូវមិនត្រឹមតែសម្រាប់ធ្វើដំណើរប្រកបដោយប្រសិទ្ធភាពប៉ុណ្ណោះទេ ប៉ុន្ដែថែមទាំងជាលម្ហសាធារណៈប្រកបដោយមេត្រីភាព សុវត្ថិភាព និងសមធម៌ ដើម្បីកំណើនសេដ្ឋកិច្ច និងអភិវឌ្ឍន៍ធុរកិច្ច ក៏ដូចជា លើកកម្ពស់គុណភាពនគរូបនីយកម្ម ភាពធន់នឹងអាកាសធាតុ និងបរិស្ថានប្រកបដោយចីរភាពក្នុងគោលដៅប្រែក្លាយក្រុងព្រះសីហនុទៅជាទីក្រុងឆ្លាតវៃ និងជាតំបន់សេដ្ឋកិច្ចពិសេសគំរូពហុបំណង។
បើតាមលោកអភិបាលខេត្ដផ្លូវនេះត្រូវស្ថាបនាជា ៣ ប្រភេទ រួមមាន ប្រភេទ មហាវិថីមាន ៣ ខ្សែ ប្រភេទវិថីមាន ១៦ ខ្សែ និងប្រភេទអនុវិថី ១៥ ខ្សែ។
លោក សុខ សុខុម ប្រធានអង្គការស្រាវជ្រាវជាតិកម្ពុជា (CNRO) ចង់ឲ្យការស្ថាបនាផ្លូវទាំងនេះ មានប្រសិទ្ធភាព និងមានគុណភាពខ្ពស់ចៀសវាងអំពើពុករលួយ ខណៈផ្លូវនៅក្នុងក្រុងព្រះសីហនុបានខូចខាតស្ទើរតែទាំងស្រុងទៅហើយនោះ។
លោកថា៖ «យើងដឹងហើយថា ការអភិវឌ្ឍផ្លូវឡើងវិញទាំង ៣៤ ខ្សែនេះ គឺជាថវិការបស់រាជរដ្ឋាភិបាលដែលបានឧបត្ថម្ភមក។ ដូច្នេះការប្រើប្រាស់ថវិកាសាងសង់ផ្លូវនេះ ត្រូវមានតម្លាភាព និងមានគុណភាពបំផុតដែលអាចទទួលយកបាន...»៕
