ភ្នំពេញៈ លោកនាយករដ្ឋមន្ដ្រី ហ៊ុន សែន ក្នុងទិវាជាតិទីក្រុងស្អាត ដែលនឹងត្រូវប្រារព្ធនៅថ្ងៃទី ២៧ ខែកុម្ភៈ ឆ្នាំនេះក្រោមប្រធានបទ «ទីក្រុងស្អាត៖ ទីក្រុងដែលមានវិថីម្ហូបអាហារស្អាត» បានប្រាប់ឲ្យស្ថាប័នពាក់ព័ន្ធ និងរដ្ឋបាលថ្នាក់ក្រោមជាតិបន្តខិតខំលើកកម្ពស់ប្រពៃណី វប្បធម៌ និងបេតិកភណ្ឌម្ហូបអាហារខ្មែរសំដៅជំរុញឲ្យមានភាពសម្បូរបែបនៃម្ហូបអាហារ ដើម្បីបម្រើវិស័យទេសចរណ៍។
សារលិខិតរបស់លោកនាយករដ្ឋមន្ដ្រីថ្លែងសម្រាប់ទិវានេះបានបញ្ជាក់ថា ក្នុងស្មារតីឆ្លើយតបទៅនឹងការវិវត្ត និងនិន្នាការអភិវឌ្ឍន៍ថ្មីៗនេះ កម្ពុជាត្រូវបន្តយកចិត្ដទុកដាក់លើការដាក់ចេញ និងអនុវត្ដនូវគោលនយោបាយ និងយុទ្ធសាស្ដ្រអភិវឌ្ឍន៍ជាតិនានា ដោយឈរលើមូលដ្ឋានសំខាន់ ២ ដែលត្រូវគិតគូរស្របពេលគ្នា គឺការបង្កើតឧត្ដមភាពប្រកួតប្រជែង និងការធានានិរន្តរភាពនៃការអភិវឌ្ឍ។ ឈរលើមូលដ្ឋាននេះកម្ពុជាក៏បានដាក់ចេញនូវយុទ្ធនាការ «ទីក្រុងស្អាត រមណីយដ្ឋានស្អាត សេវាល្អ បដិសណ្ឋារកិច្ចល្អ» ដែលជាយុទ្ធសាស្ដ្រដ៏សមស្របក្នុងការចូលរួមអភិវឌ្ឍវិស័យទេសចរណ៍ជាមាសបៃតង និងនាំកម្ពុជាឆ្ពោះទៅរកភាពស្អាត បៃតង និងប្រកបដោយសុវត្ថិភាព។
លោកនាយករដ្ឋមន្ដ្រីថ្លែងថា៖ «ឆ្លៀតក្នុងឱកាសនេះក្នុងនាមរាជរដ្ឋាភិបាល ខ្ញុំសូមឲ្យស្ថាប័នពាក់ព័ន្ធ រដ្ឋបាលថ្នាក់ក្រោមជាតិបន្តខិតខំរួមចំណែកលើកកម្ពស់ប្រពៃណី វប្បធម៌ និងបេតិកភណ្ឌម្ហូបអាហាររបស់ខ្លួនសំដៅចូលរួមជំរុញឲ្យមានភាពសម្បូរបែបនៃម្ហូបអាហារ និងត្រូវ «ក្រុង/ខណ្ឌមួយត្រូវមានវិថីម្ហូបអាហារមួយយ៉ាងតិច»។ ស្រុកមួយត្រូវមានវិថីម្ហូបអាហារមួយយ៉ាងតិច» ដើម្បីបម្រើដល់វិស័យទេសចរណ៍ដែលមកទស្សនាក្នុងទីក្រុងប្រកបដោយភាពពេញចិត្ដ និងបទពិសោធល្អប្លែកៗស្របតាមយុទ្ធនាការការផ្សព្វផ្សាយ «កម្ពុជាព្រះរាជាណាចក្រអច្ឆរិយផ្ដល់ភាពកក់ក្ដៅ»។
លោក ហ៊ុន សែន បានបន្តថា៖ «ខ្ញុំក៏សូមប្រកាសដាក់ឲ្យអនុវត្ដស្ដង់ដា «វិថីម្ហូប លក់ម្ហូបអាហារកម្ពុជា-Food Street» និងស្ដង់ដា «តូបលក់ម្ហូបអាហារតាមដងផ្លូវកម្ពុជា-Street Food» ជាផ្លូវការ»។
លោកសង្ឃឹម និងជឿជាក់យ៉ាងមុតមាំថា គ្រប់ភាគីពាក់ព័ន្ធទាំងអស់នឹងបន្តសហការចូលរួមគាំទ្រឧបត្ថម្ភ និងអនុវត្ដរាល់យុទ្ធនាការនានាដែលត្រូវបានដាក់ចេញដោយរាជរដ្ឋាភិបាល ដើម្បីគាំទ្រដល់ចលនាប្រឡងប្រណាំង «ទីក្រុងស្អាត រមណីយដ្ឋានស្អាត សេវាល្អ បដិសណ្ឋារកិច្ចល្អ» ដើម្បីកម្ពុជាជាគោលដៅទេសចរណ៍ «ស្អាត និងបៃតង»។
សារលិខិតរបស់លោក ហ៊ុន សែន ដដែលបានបញ្ជាក់ថា ឆ្នាំនេះជាឆ្នាំទី ៨ ហើយដែលកម្ពុជាប្រារព្ធទិវាជាតិទីក្រុងស្អាតនេះ។ តាមរយៈប្រធានបទឆ្នាំនេះ គឺឆ្លុះបញ្ចាំងយ៉ាងច្បាស់ថា វិថីម្ហូបអាហារគឺជាផលិតផលទេសចរណ៍ដ៏ទាក់ទាញមួយសម្រាប់ភ្ញៀវទេសចរជាតិ និងអន្តរជាតិដែលអាចផ្ដល់នូវបទពិសោធ និងការចងចាំសម្រាប់ភ្ញៀវទេសចរ។
សារលិខិតលោក ហ៊ុន សែន បានលើកឡើងទៀតថា ជាទូទៅភ្ញៀវទេសចរជាតិតែងតែប្រាថ្នាចង់ដើរកម្សាន្ត និងទទួលទានម្ហូបអាហារដែលប្រកបដោយអនាម័យ និងជឿទុកចិត្ដ ខណៈវិថីម្ហូបអាហារក៏ជាផ្នែកមួយនៃទេសចរណ៍ម្ហូបអាហារដែលផ្សារភ្ជាប់ការអភិវឌ្ឍសេដ្ឋកិច្ចមូលដ្ឋានទៅនឹងជីវភាពប្រជាជន វប្បធម៌ ទំនៀមទម្លាប់ ព្រមទាំងជួយជំរុញអាជីវកម្មខ្នាតតូចបែបគ្រួសារឲ្យរីកលូតលាស់បានយ៉ាងមានប្រសិទ្ធភាព។
លោកនាយករដ្ឋមន្ដ្រីបានបញ្ជាក់ថា៖ «ជាការពិតវិស័យទេសចរណ៍ និងម្ហូបអាហារមានទំនាក់ទំនងជាសារវន្ត ២ គឺម្ហូបអាហារជាផលិតផលទេសចរណ៍ ឬសេវាកម្មទេសចរណ៍ (Gastronomy Tourism Product) និងម្ហូបអាហារជាចំណែកទីផ្សារទេសចរណ៍ (Market Segment) ដ៏ទាក់ទាញ។ ម្ហូបអាហារគឺជាទូតនាំសារអំពីវប្បធម៌ អត្តសញ្ញាណ ការរស់នៅក្នុងតំបន់ទៅភ្ញៀវទេសចរជាតិ និងអន្តរជាតិ និងបានបង្កើតភាពចងចាំដល់ទេសចរអំពីគោលដៅដែលបានទស្សនា»។
លោក តុប សុភ័ក អនុរដ្ឋលេខាធិការ និងជាអ្នកនាំពាក្យក្រសួងទេសចរណ៍ មិនអាចទាក់ទងសុំអត្ថាធិប្បាយបានទេពីម្សិលមិញ ដោយទូរស័ព្ទគ្មានអ្នកទទួល។ ប៉ុន្ដែលោក ថោង ខុន រដ្ឋមន្ត្រីក្រសួងទេសចរណ៍បានថ្លែងកាលពីថ្ងៃទី ១ ខែកុម្ភៈនេះថា កាលពីឆ្នាំ ២០១៩ កម្ពុជាបានស្វាគមន៍ភ្ញៀវទេសចរ អន្តរជាតិជាង ៦ លាននាក់កើនឡើង ៦,៦ ភាគរយ បើធៀបនឹងឆ្នាំ ២០១៨។
តាមការដែលលោកបង្ហាញទិន្នន័យគឺនៅឆ្នាំ ២០១៩ ភ្ញៀវទេសចរអន្តរជាតិសរុបដែលធ្វើដំណើរមកកម្ពុជាមានចំនួន ៦,៦១ លាននាក់ កើនឡើង ៦,៦ ភាគរយ បើធៀបនឹងឆ្នាំ ២០១៨ ដែលមានចំនួន ៦,២០ លាននាក់។ ទិន្នន័យបង្ហាញថា ភ្ញៀវចិននៅតែបន្តនាំមុខក្នុងចំណោមទេសចរបរទេសដែលមានចំនួន ២,៣៦ លាននាក់ កើនឡើង ១៦,៧ ភាគរយ ភ្ញៀវជនជាតិវៀតណាមមាន ៩០៨ ៨០៣ នាក់ កើន ១៣,៦ ភាគរយ ទេសចរថៃ ៤៦៦ ៤៩៣ នាក់ កើនឡើង ២២ ភាគរយ ឡាវ ៣៦៣ ៩៥១ នាក់ ថយចុះ ១៤,៦ ភាគរយ និងទេសចរកូរ៉េខាងត្បូងមានចំនួន ២៥៤ ៨៧៤ នាក់ថយចុះ ១៥,៥ ភាគរយ។ ដោយឡែកភ្ញៀវទេសចរផ្សេងទៀតរួមមាន អាមេរិក ២៤៨ ៨៦៣ នាក់ ថយចុះ ០,៨ ភាគរយ ជប៉ុន ២០៧ ៦៣៦ នាក់ ថយចុះ ១,៣ ភាគរយ និងម៉ាឡេស៊ីមានចំនួន ២០៣ ០០៨ នាក់កើនឡើង ០,៩ ភាគរយ៕