.jpg)
និស្សិតដែលទទួលសញ្ញាបត្រពីលោក ហ៊ុន សែន កាលពីថ្ងៃម្សិលមិញនៅវិទ្យាស្ថានជាតិអប់រំ។ រូបថត SPM
ភ្នំពេញៈ លោកនាយករដ្ឋមន្ដ្រី ហ៊ុន សែន ប្រាប់និស្សិតដែលទើបបញ្ចប់ការសិក្សាថ្នាក់បរិញ្ញាបត្រ និងបរិញ្ញាបត្រជាន់ខ្ពស់ឱ្យខិតខំពង្រឹងសមត្ថភាពខ្លួនបន្ថែមទៀត ទោះបីរៀនចប់ហើយក៏ដោយ ដើម្បីតាមឱ្យទាន់ការវិវត្តនៃសភាពការណ៍ បច្ចេកវិទ្យា និងទីផ្សារការងារដោយលោកបញ្ជាក់ថា បើនៅទ្រឹង ១ កន្លែងប្រៀបដូចជាការដើរថយក្រោយ។
ថ្លែងក្នុងពិធីប្រគល់សញ្ញាបត្រដល់និស្សិតសាកលវិទ្យាល័យធនធានមនុស្សជិត ២ ពាន់នាក់ កាលពីម្សិលមិញនៅវិទ្យាស្ថានជាតិអប់រំលោក ហ៊ុន សែន ក្រៅពីជំរុញឱ្យនិស្សិតពង្រឹងថែមទៀតនូវសមត្ថភាពរបស់ខ្លួន លោកក៏បានថ្លែងអបអរសាទរ និងកោតសរសើរចំពោះជយលាភីសម្រាប់និស្សិតដែលបានបញ្ចប់ការសិក្សាចំនួន ១ ៩៥៨ នាក់។ លោកចាត់ទុកថាសមិទ្ធផលនេះជាជោគជ័យផ្ទាល់ខ្លួនសម្រាប់និស្សិតជយលាភីទាំងអស់ ព្រមទាំងក្រុមគ្រួសារ និងសង្គមជាតិផងដែរ។
លោកនាយករដ្ឋមន្ដ្រីថ្លែងថា៖ «ខ្ញុំព្រះករុណាខ្ញុំសង្ឃឹមថា និស្សិតរបស់យើងដែលទទួលសញ្ញាបត្រនៅថ្ងៃនេះនឹងបន្តការខិតខំ ដើម្បីពង្រឹងសមត្ថភាពបន្ថែម ព្រោះសភាពការណ៍ វាវិវត្តលឿនណាស់ បច្ចេកវិទ្យា គឺវិវត្តលឿនណាស់។ ដូច្នេះតម្រូវការរបស់យើងមិននៅទ្រឹងមួយកន្លែងទេ។ ការនៅទ្រឹងណាមួយប្រៀបបីដូចជាការដើរថយក្រោយ»។
លោក ហ៊ុន សែន បញ្ជាក់ថា៖ «កុំគិតថាយើងមានបរិញ្ញាបត្រជាន់ខ្ពស់ មានបរិញ្ញាបត្រ ឬឯកទេសនេះ ឯកទេសនោះដោយមិនគិតគូរទៅលើសមត្ថភាពក្នុងការពង្រឹងសមត្ថភាពគ្រប់ផ្នែករបស់យើង។ ការពង្រឹងសមត្ថភាពរបស់យើងវាជាការឆ្លើយតបទៅនឹងទីផ្សារការងារ»។
លោកក៏បានរំឭកឡើងថា គេជ្រើសរើសបុគ្គលិក គេមិនមែនជ្រើសរើសឃើញមានសញ្ញាបត្រទេ ប៉ុន្ដែគេត្រូវមានដំណាក់កាលនៃការសាកល្បងរបស់គេ ឬក៏ត្រូវមានលក្ខខណ្ឌការប្រឡងប្រជែងជាដើម ខណៈពេលខ្លះគេត្រូវការកម្លាំងពលកម្ម ១០ នាក់។ ប៉ុន្ដែគេតម្រូវឲ្យដាក់ពាក្យឲ្យប្រឡងដើម្បីជ្រើសរើសដោយផ្អែកលើសមត្ថភាព។ ដូច្នេះហើយបានត្រូវពង្រឹងសមត្ថភាព។
ជាមួយនឹងចម្ងល់លោក ហ៊ុន សែន បានលើកឡើងថា៖ «មានអ្នកខ្លះពេលខ្ញុំកំពុងនិយាយអ៊ីចឹង ចូលមកនិយាយថា អប់រំឡើង អប់រំឲ្យទៅធ្វើខ្ញុំគេ ខ្ញុំមិនយល់។ ពេលដែលខ្ញុំដើរជួបកម្មករ តាមរោងចក្រក៏មានគេលើកឡើងថា មើលវាប្រឹងធ្វើហ្នឹងធ្វើយ៉ាងម៉េចអប់រំមនុស្សឱ្យទៅធ្វើខាងស៊ីឈ្នួលគេវាទៅអ៊ីចេះវិញ»។
លោកនាយករដ្ឋមន្ត្រីបានបញ្ជាក់ថា៖ «រាជរដ្ឋាភិបាលដែលដឹកនាំដោយខ្ញុំ បានខិតខំប្រឹងប្រែងខ្លាំងណាស់ ដើម្បីចុះហត្ថលេខារកទីផ្សារការងារឲ្យប្រជាជនកម្ពុជារបស់យើង បែរជាត្រូវទទួលបណ្ដាសាពីក្រុមប្រឆាំង ថាយើងបានរុញមនុស្សឲ្យទៅធ្វើការនៅខាងក្រៅប្រទេស។ ទៅជាចំណាកស្រុក យើងប្រឹងណាស់ នៅប្រទេសថៃចូលទៅធ្វើការនៅប្រទេសគេខុសច្បាប់។ យើងប្រឹងទៅចរចាជាមួយគេ ដើម្បីសុំឲ្យពលករដែលខុសច្បាប់ឲ្យទៅជាស្របច្បាប់ ដើម្បីមានការងារធ្វើនៅទីនោះ»។
លោក អ៊ឹម សុធី នាយកប្រតិបត្ដិ ក្រុមប្រឹក្សាយុវជនកម្ពុជា (Youth Council of Cambodia) បានថ្លែងថា ការមានប្រសាសន៍របស់លោកនាយករដ្ឋមន្ដ្រីក្នុងការជំរុញឱ្យសិស្សដែលបានរៀនចប់ឲ្យបន្ដខិតខំពង្រឹងសមត្ថភាពបន្ថែមនេះ គឺលោក ហ៊ុន សែន ចង់ណែនាំឱ្យយុវជន និងនិស្សិតមានការត្រៀមខ្លួនក្នុងការរៀបចំបំណិនជីវិតរបស់ខ្លួន។ លោកចង់ឱ្យយុវជន និងនិស្សិតត្រូវមានវិជ្ជាជីវៈណាមួយច្បាស់លាស់។
លោក សុធី បានបញ្ជាក់ថា៖ «បើសិននិស្សិតប្រឹងប្រែងពង្រឹងសមត្ថភាពខ្លួនឯង ក៏អាចទទួលបានឱកាសការងារល្អដែរ។ សម្ដេចនាយករដ្ឋមន្ដ្រី (ហ៊ុន សែន) ក៏ចង់ឱ្យនិស្សិតដែលបញ្ចប់ការសិក្សានៅមហាវិទ្យាល័យឱ្យប្រឹងប្រែង ពង្រឹងសមត្ថភាពលើជំនាញ វិជ្ជាជីវៈឱ្យបានត្រឹមត្រូវ ដើម្បីចាប់យកឱកាសការងារឱ្យបានគ្រប់កន្លែងដែលកំពុងមានតម្រូវការទាំងក្នុងស្ថាប័នរដ្ឋ និងឯកជន»៕
