ភ្នំពេញៈ នៅចំពោះមុខមហាសន្និបាតអង្គការសហប្រជាជាតិលោកនាយករដ្ឋមន្ត្រី ហ៊ុន សែន បានការពារលទ្ធផលនៃការបោះឆ្នោតកាលពីខែកក្កដា និងចាត់ទុកការវាយតម្លៃអវិជ្ជមានពីមជ្ឈដ្ឋានខាងក្រៅថាជា «ការប្រមាថយ៉ាងធ្ងន់ធ្ងរ» ចំពោះឆន្ទៈពលរដ្ឋកម្ពុជា និងមហិច្ឆតាប៉ុនប៉ង «ជ្រៀតជ្រែក» ចូលកិច្ចការផ្ទៃក្នុងរបស់កម្ពុជា ខណៈអតីតមេបក្សប្រឆាំងលោក សម រង្ស៊ី នៅតែបន្តទាមទារកុំឲ្យសហគមន៍អន្តរជាតិទទួលស្គាល់រដ្ឋាភិបាលថ្មីនេះ។
ថ្លែងនៅក្នុងមហាសន្និបាតអង្គការសហប្រជាជាតិក្នុងបុរីញូវយ៉កកាលពីថ្ងៃសុក្រនៅសហរដ្ឋអាមេរិកត្រូវនឹងព្រឹកថ្ងៃសៅរ៍នៅប្រទេសកម្ពុជាលោក ហ៊ុន សែន បានប្រាប់បណ្ដាប្រទេសលើពិភពលោកថាកម្ពុជាគឺជាប្រជាជាតិ «កំពុងតែសប្បាយរីករាយទទួលផលពីសុខសន្តិភាព ស្ថិរភាព និងការអភិវឌ្ឍយ៉ាងឆាប់រហ័ស» ដែលពុំធ្លាប់មានក្នុងប្រវត្តិសាស្ត្រសម័យទំនើបរបស់ខ្លួន។
លោកបានការពារលទ្ធផលនៃការបោះឆ្នោតកាលពីថ្ងៃទី ២៩ ខែកក្កដាថា ត្រូវបានធ្វើឡើងដោយ «សេរី និងគ្មានការបង្ខិតបង្ខំ ឬការគំរាមកំហែង ឬអំពើហិង្សា» ណាមួយឡើយដោយលើកពីចំនួនអ្នកដែលបានទៅបោះឆ្នោតជិត ៧ លាននាក់ ឬស្មើនឹង ៨៣ ភាគរយជាដើម។ លោកក៏បានចាត់ទុកការវាយតម្លៃអវិជ្ជមានពីការបោះឆ្នោតកន្លងមកពីសំណាក់មជ្ឈដ្ឋានខាងក្រៅថាជា «ការប្រមាថយ៉ាងធ្ងន់ធ្ងរចំពោះឆន្ទៈប្រជាជនកម្ពុជា»។
លោកថ្លែងថា៖ «ជាការពិតជម្រើសដោយសេរីរបស់ប្រជាជនកម្ពុជា និងលទ្ធផលប្រកបដោយធម្មានុរូបភាពនៃការបោះឆ្នោតនេះមិនមែនជាប្រធានបទដែលត្រូវចោទសួរ ឬពិភាក្សាដេញដោលនោះទេ»។
លោកបន្ថែមថា៖ «ក៏ប៉ុន្តែមជ្ឈដ្ឋានខាងក្រៅមួយចំនួនដែលចិញ្ចឹមជាប់នូវមហិច្ឆតាប៉ុនប៉ុងជ្រៀតជ្រែកចូលកិច្ចការផ្ទៃក្នុងរបស់កម្ពុជានៅតែធ្វើជាមើលមិនឃើញនូវគុណភាព និងសុចរិតភាពនៃដំណើរការបោះឆ្នោតរបស់យើងតាមរយៈការចេញសេចក្ដីថ្លែងការណ៍នានាប្រឆាំងនឹងឬវាយប្រហារលើលទ្ធផលនៃការបោះឆ្នោតនេះ ដែលទង្វើបែបនេះគឺជាការប្រមាថយ៉ាងធ្ងន់ធ្ងរចំពោះឆន្ទៈរបស់ប្រជាជនកម្ពុជា»។
លោកបានទាញការចាប់អារម្មណ៍សមាជិកអង្គការសហប្រជាជាតិទាំងអស់អំពី «សារៈសំខាន់នៃធម្មនុញ្ញអង្គការសហប្រជាជាតិ»។
លោកថា ដើម្បីផ្តល់ការគោរពដ៏ត្រឹមត្រូវ រដ្ឋនានាត្រូវ «ចៀសវាងការជ្រៀតជ្រែក ការធ្វើឲ្យអន្តរាយ ឬការរំខានដល់កិច្ចការអធិបតេយ្យរបស់រដ្ឋឯករាជ្យ»។
លោកបន្តថា៖ «យើងមានការសោកស្ដាយជាពន់ពេកក្នុងការរំលេចនូវតថភាពដែលថា សិទ្ធិមនុស្សនាពេលបច្ចុប្បន្ននេះបានក្លាយទៅជា “បេសកកម្មដើម្បីបំពានអរិយធម៌” សម្រាប់ប្រទេសមានអំណាចមួយចំនួន ឬក៏អាចនិយាយបានថាជានិយាមប្រតិបត្តិថ្មីរបស់ពួកគេដែលជាលេសសម្រាប់រាល់ការជ្រៀតជ្រែក ក្រោមស្លាកការពារសិទ្ធិនយោបាយ»។
លោក ហ៊ុន សែន ថាការដាក់ទណ្ឌកម្មជាឯកតោភាគីបានក្លាយជា «អាវុធដ៏ពេញនិយម» នៃប្រទេសមហាអំណាចដែលលោកទំនងសំដៅដល់សហរដ្ឋអាមេរិកដោយលោកស្នើថា មិនគួរដាក់បន្តុបប្រព័ន្ធគ្រប់គ្រងរដ្ឋរបស់ពួកគេលើរដ្ឋឯករាជ្យផ្សេងទៀត។
លោកបន្ថែមថា៖ «ប្រទេសធំៗមិនគួរដាក់បន្តុបប្រព័ន្ធគ្រប់គ្រងរដ្ឋរបស់ពួកគេមកលើប្រទេសនានាដែលតូចជាងខ្លួននោះឡើយព្រោះប្រទេសតូចៗទាំងនេះក៏មានអធិបតេយ្យភាព និងមានសេចក្ដីប្រាថ្នាស្របច្បាប់ក្នុងការរក្សានូវអត្តសញ្ញាណរបស់ខ្លួនដែរ»។
លោកសង្កត់ធ្ងន់ថា៖ «យើងមានការបារម្ភយ៉ាងខ្លាំង ចំពោះភាពតានតឹងដែលបង្កឡើងដោយមហាអំណាចពិភពលោកលំដាប់ទី ១ នៅក្នុងរង្វង់ទំនាក់ទំនងការទូត និងជម្លោះផ្ទៃក្នុងជាច្រើនដែលកំពុងកើតឡើង ដោយសារការជ្រៀតជ្រែកពីសំណាក់មហាអំណាចនេះ»។
ប៉ុន្តែលោក សម រង្ស៊ី ដែលខកខានក្នុងការដឹកនាំបាតុករធ្វើបាតុកម្មទៅតាមការគ្រោងទុកនោះបានបង្ហោះវីដេអូបន្តផ្ទាល់ទៅកាន់អ្នកគាំទ្ររបស់លោកដែលកំពុងកាន់បដាធ្វើបាតុកម្មនៅក្បែរស្នាក់ការអង្គការសហប្រជាជាតិដើម្បីប្រឆាំងនឹងដំណើរទស្សនកិច្ចរបស់លោក ហ៊ុន សែន បានបន្តអំពាវនាវឲ្យសហគមន៍អន្តរជាតិកុំទទួលស្គាល់រដ្ឋាភិបាលថ្មីដែលដឹកនាំដោយលោក ហ៊ុន សែន។
លោក សម រង្ស៊ី ដែលកំពុងចូលរួមកិច្ចប្រជុំរបស់គណបក្សប្រជាសេរីនិយម នៅទូទាំងពិភពលោកដែលធ្វើឡើងក្នុងប្រទេសអាហ្វ្រិកខាងត្បូងថ្លែងថា៖ «យើងជាខ្មែរជាអ្នកស្រឡាញ់ជាតិជាអ្នកស្រឡាញ់លទ្ធិប្រជាធិបតេយ្យ។ យើងមិនទទួលស្គាល់ទេការបោះឆ្នោតក្លែងក្លាយ រៀបចំរដ្ឋាភិបាលខុសច្បាប់រដ្ឋាភិបាលបំផ្លាញជាតិ រដ្ឋាភិបាលក្បត់ជាតិដែល ហ៊ុន សែន ដឹកនាំសព្វថ្ងៃនេះ»។
ដោយលើកឡើងពីកិច្ចប្រជុំរបស់ក្រុមប្រឹក្សាសិទ្ធិមនុស្ស អ.ស.ប ក្នុងប្រទេសស្វ៊ីសកាលពីថ្ងៃពុធសប្ដាហ៍មុនដែលអ្នករាយការណ៍ពិសេស លោកស្រី រ៉ូណា ស្ម៊ីត បានចោទសួរអំពីភាពត្រឹមត្រូវនៃការបោះឆ្នោត ហើយថាកម្ពុជាជារដ្ឋឯកបក្សក្នុងរយៈពេល ៥ ឆ្នាំខាងមុខក្រោយពេលគណបក្សកាន់អំណាចបានឈ្នះអាសនៈទាំងអស់។
លោក សម រង្ស៊ី បន្ថែមថា៖ «សូមគាំទ្រជំហរអង្គការសហប្រជាជាតិដែលបានបញ្ជាក់តាំងពីមុនថ្ងៃបោះឆ្នោត លោកស្រី រ៉ូណា ស្ម៊ីត ដែលជាអ្នករាយការណ៍ពិសេសរបស់អង្គការសហប្រជាជាតិដើម្បីតាមដានឃ្លាំមើលស្ថានការណ៍សិទ្ធិមនុស្សនៅប្រទេសកម្ពុជា។
លោកស្រី រ៉ូណា ស្ម៊ីត បានបញ្ជាក់ហើយថា ការបោះឆ្នោតណាដែលមិនមានការចូលរួមពីគណបក្សប្រឆាំងដែលអាចជឿទុកចិត្តបានតែមួយគត់គឺការបោះឆ្នោតនោះមិនយកជាបានការនោះទេ ដូច្នេះសូមឲ្យអង្គការសហប្រជាជាតិរក្សាជំហរដដែលនេះ ការបោះឆ្នោតកន្លងទៅនេះដែលមិនមានការចូលរួមពីគណបក្សសង្គ្រោះជាតិមិនអាចយកជាការបានទេ»៕NS