តាកែវៈ នគរបាលស្រុកកោះអណ្តែតបានបញ្ជូនជនសង្ស័យម្នាក់ទៅស្នងការដ្ឋាននគរបាលខេត្តតាកែវកាលពីម្សិលមិញ បន្ទាប់ពីចាប់ខ្លួនកាលពីថ្ងៃទី ១៩ ឧសភា ពាក់ព័ន្ធករណីអារកសម្លាប់ក្មេងប្រុសម្នាក់ នៅភូមិត្រពាំងក្រសាំង ឃុំ ពេជសា ស្រុកកោះអណ្តែត ដោយសារក្មេងរងគ្រោះឃើញជនសង្ស័យប៉ុនប៉ងចាប់រំលោភបងថ្លៃស្រីហើយខ្លាចបែកការ។
លោក អៀម ភាព អធិការរងស្រុកកោះអណ្តែតទទួលផែនសេនាធិការបានប្រាប់ភ្នំពេញប៉ុស្តិ៍ពីម្សិលមិញថា ជនសង្ស័យឈ្មោះ ហ៊ុន តុលា អាយុ ២៧ ឆ្នាំ។ រីឯក្មេងប្រុសរងគ្រោះឈ្មោះ ទ្រី កក្កដា អាយុ ១៣ ឆ្នាំ ជាសិស្សរៀននៅសាលាបឋមសិក្សាវត្តព្រៃបាយក្នុងភូមិ-ឃុំកើតហេតុខាងលើ។
លោកថា៖ «ដោយសារឃើញគ្រួសារក្មេងរងគ្រោះក្រីក្រពេក ខាងការិយាល័យអប់រំស្រុកកោះអណ្តែតក៏ចុះមកសាកសួរសមត្ថកិច្ចខ្ញុំដើម្បីរៃអង្គាសប្រាក់ជួយឧបត្ថម្ភខ្លះ»។
លោក អៀម ភាព ប្រាប់តាមសម្តីជនសង្ស័យថា មុនកើតហេតុជនសង្ស័យបានចូលទៅក្នុងផ្ទះបងប្រុសបង្កើតរបស់ខ្លួន ប៉ុន្តែឃើញតែស្រ្តីម្នាក់ត្រូវជាបងថ្លៃកំពុងនៅក្នុងផ្ទះ។ ពេលនោះជនសង្ស័យបានប៉ុនប៉ងចាប់ស្រ្តីជាបងថ្លៃរំលោភសេពសន្ថវៈ តែចៃដន្យដោយសារជញ្ជាំងផ្ទះធ្លុះធ្លាយក៏ត្រូវក្មេងរងគ្រោះ ឈ្មោះ ទ្រី កក្កដា មើលឃើញ។
លោកបន្តថា ដោយសារតែខ្លាចបែកការ ជនសង្ស័យបានប្រើល្បិចបញ្ឆោតក្មេងរងគ្រោះថាទៅចាប់ពស់នៅវាលស្រែហើយក្មេងរងគ្រោះក៏ព្រមទៅតាម។លុះនាំក្មេងរងគ្រោះដល់ចំណុចកើតហេតុជនសង្ស័យក៏ចាប់ក្មេងអារផ្តាច់បំពង់កដោយប្រើកាំបិតខ្វែវបណ្ដាលឲ្យស្លាប់នៅក្បែរត្រពាំងទឹកហើយបន្ទាប់មកជនសង្ស័យក៏ដើរត្រឡប់ទៅផ្ទះវិញធ្វើដូចមិនដឹងរឿងអីខណៈម្តាយក្មេងរងគ្រោះនិងអ្នកភូមិកំពុងឆោឡោនាំគ្នាដើររកក្មេងរងគ្រោះ។
លោកបានបន្តទៀតថា ពេលឃើញមានការផ្អើលឆោឡោនោះ សមត្ថកិច្ចនគរបាលស្រុកកោះអណ្តែតក៏បានហៅអ្នកភូមិមកសួរដើម្បីរកតម្រុយឈានទៅរកមុខជនដៃដល់។ពេលនោះមានអ្នកភូមិម្នាក់បានប្រាប់សមត្ថកិច្ចថា គេបានឃើញជនសង្ស័យបណ្តើរក្មេងប្រុសទៅវាលស្រែ។ ដោយមានការសង្ស័យសមត្ថកិច្ចក៏បានហៅជនសង្ស័យសួរនាំហើយបុរសរូបនេះក៏បានឆ្លើយសារភាពពីសកម្មភាពរបស់ខ្លួនតែម្ដង។
ពាក់ព័ន្ធនឹងស្រ្តីជាបងថ្លៃដែលត្រូវជនសង្ស័យប៉ុនប៉ងចាប់រំលោភនោះ ត្រូវបានលោក អៀម ភាព បញ្ជាក់ប្រាប់ថាស្រ្តីជាបងថ្លៃមិនបានប្ដឹងទេ។ តែទោះយ៉ាងណាលោកថា ជនសង្ស័យក្រោយពីបង្កហេតុ លោកបានពិនិត្យទឹកនោមរកមើលសារធាតុញៀនដែរ តែមិនឃើញមានផ្ទុកសារធាតុញៀនទេ។ ប៉ុន្តែលោកថា គ្រួសារជនសង្ស័យបានប្រាប់សមត្ថកិច្ចថាបុរសម្នាក់នេះធ្លាប់បានប្រើប្រាស់គ្រឿងញៀន៕