.jpg)
ទិដ្ឋភាពស្ពានបាក់ដោយសារទឹកជំនន់នៅបាត់ដំបង។ រូប Cambopost
បាត់ដំបងៈ អ្នកភូមិ ២ នាក់ បានបាត់ខ្លួន និងម្នាក់ទៀតបានរងរបួសធ្ងន់ ខណៈស្ពានចំនួន ៤ ខ្សែ និងផ្ទះប្រជាពលរដ្ឋចំនួន ៤ ខ្នង ព្រមទាំងចម្ការដំណាំរួមផ្សំជាង ១០ ហិកតាទៀត បានរងការខូចខាតទាំងស្រុងក្រោយពីមានគ្រោះជំនន់ទឹកភ្លៀង និង ការហូរច្រោះបាក់ដីពីលើភ្នំកាលពីព្រឹកថ្ងៃចន្ទ។
លោក សៅ សាម៉េត អភិបាលស្រុកសំឡូតបានប្រាប់ភ្នំពេញប៉ុស្តិ៍កាលពីម្សិលមិញថា នៅព្រឹកថ្ងៃអង្គារនេះទឹកបានហូរស្រកផុតពីលំនៅឋានរបស់អ្នកភូមិហើយ ប៉ុន្តែអ្នកភូមិ ២ នាក់ រួមមានឈ្មោះ ឆាង កុល អាយុ ២៥ ឆ្នាំ រស់នៅភូមិអូរត្រែង ឃុំតាតោក ស្រុកសំឡូត និងអ្នកជិតខាងរបស់គាត់ម្នាក់ឈ្មោះ ថាន់ វី អាយុ ២០ ឆ្នាំ ដែលបានបាត់ខ្លួនកាលពីព្រឹកថ្ងៃចន្ទនៅក្នុងហេតុការណ៍នេះនៅមិនទាន់រកឃើញនៅឡើយទេ។
លោកបញ្ជាក់ថា៖ «នៅពេលនេះក្រុមកម្លាំងសមត្ថកិច្ចយើង កំពុងបន្តប្រតិបត្តិការស្វែងរកជនរងគ្រោះទាំង ២ នៅតាមដងស្ទឹង និងដងអូរនានានៃតំបន់ជួរភ្នំសំកុះ»។
លោក ម៉ែន រីមថាវុធ អធិការរងស្រុកសំឡូតថ្លែងថា ជំនន់ទឹកភ្លៀង និងការហូរច្រោះបាក់ដីពីលើភ្នំដ៏គំហុកកាលពីព្រឹកថ្ងៃចន្ទនោះ កើតឡើងបន្ទាប់ពីមានភ្លៀងធ្លាក់ខ្លាំងតាំងពីយប់ថ្ងៃអាទិត្យ រហូតដល់ម៉ោង ១០ ព្រឹកថ្ងៃចន្ទ។
ភូមិឋានរបស់អ្នកភូមិក្នុងឃុំចំនួន ៥ រួមមានឃុំ តាតោក សំឡូត តាសាញ់ ស៊ុង និងឃុំកំពង់ល្ពៅ ដែលស្ថិតនៅជាប់ដងស្ទឹងគ្រញូង និងដងអូរនានាតាមជើងភ្នំសំកុះសរុបចំនួន ១២៩ ខ្នងបានរងការជន់លិចក្នុងនោះផ្ទះប្រជាពលរដ្ឋចំនួន ៤ ខ្នងត្រូវបានទឹកហូរកួចនាំយកទៅបាត់ ខណៈស្ពានយោលចំនួន ២ ខ្សែដែលក្នុង ១ ខ្សែប្រវែង ៩៥ ម៉ែត្រ និង ស្ពានឈើទំហំ ៣៥ ម៉ែត្រគុណ ៤,៣ ម៉ែត្រចំនួន ២ ក្នុងឃុំតាតោក ត្រូវបានទឹកហូរបោកបាក់រលំខូចខាតទាំងស្រុង។
លោកនិយាយថា អ្នកភូមិម្នាក់ឈ្មោះ ទ្រីម កុសល អាយុ ២៣ ឆ្នាំបានរងរបួសក្បាល និងដៃធ្ងន់ធ្ងរ ក្រោយពីគាត់ត្រូវទឹក និងល្បាប់ភក់ដែលបាក់ធ្លាក់ពីលើភ្នំហូរបុកធ្លាក់ចូលទៅក្នុងទឹកស្ទឹងដែលកំពុងជន់ឡើង និងហូរធ្លាក់យ៉ាងគំហុក។ ជនរងគ្រោះត្រូវបានក្រុមសមត្ថកិច្ចអន្តរាគមន៍បញ្ជូនទៅកាន់មន្ទីរពេទ្យបង្អែកខេត្តបាត់ដំបងដើម្បីពិនិត្យព្យាបាល។ ដោយឡែកអ្នកភូមិ ២ នាក់ទៀតបានបាត់ខ្លួននៅមិនទាន់រកឃើញនៅឡើយទេ។ លោកបញ្ជាក់ថា៖ «យើងមិនធ្លាប់ជួបហេតុការណ៍បែបនេះទេកាលពីមុន»។
ទាក់ទងនឹងជំនន់ទឹកភ្លៀងនេះផងដែរ ក្រសួងធនធានទឹក និងឧតុនិយមនៅថ្ងៃម្សិលមិញបានប្រកាសជូនដំណឹងដល់ប្រជាពលរដ្ឋដែលរស់នៅតាមដងស្ទឹងពោធិ៍សាត់ឲ្យបង្កើនការប្រុងប្រយ័ត្នខ្ពស់អំពីគ្រោះទឹកជំនន់ ខណៈភ្លៀងកំពុងបន្តធ្លាក់នៅផ្នែកខាងលើនៃតំបន់ជួរភ្នំក្រវាញ។
សេចក្ដីជូនដំណឹងគូសបញ្ជាក់ថា៖ «ដោយមានភ្លៀងធ្លាក់ស្ទើររាល់ថ្ងៃនៅផ្ទៃរងទឹកភ្លៀងភាគខាងលើក្នុងកម្រិតពីបង្គួរទៅខ្លាំង ធ្វើឲ្យទំនប់ទឹកទី ៥ បានហូរហៀរបណ្តាលឲ្យមានការលិចបន្ទប់បញ្ជាផ្នែកមេកានិក...ភ្ជាប់នឹងបញ្ហានេះក្រសួងសូមអំពាវនាវដល់អាជ្ញាធរដែនដីសាធារណជន និងបងប្អូនប្រជាពលរដ្ឋដែលរស់នៅតាមដងស្ទឹងពោធិ៍សាត់ និងតំបន់ទំនាបសូមបង្កើនការប្រុងប្រយ័ត្នខ្ពស់»។
ដោយឡែកនៅខេត្តកំពង់ធំ ជំនន់ទឹកភ្លៀង និងទឹកស្ទឹងសែនបានជន់លិច និងបង្កផលប៉ះពាល់លំនៅឋានប្រជាពលរដ្ឋ ១០៣៦ គ្រួសារ និងប៉ះពាល់ដំណាំស្រូវ ១៤៧៣ ហិកតាព្រមទាំងបានធ្វើឲ្យពលរដ្ឋយ៉ាងតិច ២ នាក់ស្លាប់។ នេះបើយោងតាមលោក កែវ វី អ្នកនាំពាក្យគណៈកម្មាធិការជាតិគ្រប់គ្រងគ្រោះមហន្តរាយកាលពីថ្ងៃម្សិលមិញ។
លោកបានថ្លែងថានៅពេលនេះជំនន់ទឹកទន្លេមេគង្គបានស្រកចុះទៅវិញជាបន្តបន្ទាប់ ប៉ុន្តែជំនន់ទឹកភ្លៀង និងទឹកដែលហូរចាក់ពីលើភ្នំ និងប្រព័ន្ធដៃបឹងទន្លេសាបកំពុងបង្កឲ្យមានការជន់លិចខេត្តមួយចំនួនក្នុងតំបន់ទំនាបកណ្ដាលនៃបឹងទន្លេសាប។
លោកបញ្ជាក់ថា៖ «គ្រោះទឹកជំនន់គិតត្រឹមថ្ងៃ ១៧ ខែកញ្ញា [ម្សិលមិញ] នេះបានបណ្ដាលឲ្យមនុស្សចំនួន ១៣ នាក់ស្លាប់ និងបង្កការខូចខាតដំណាំស្រូវសរុបជាង ១៣ ០០០ ហិកតា ក្នុងចំណោមដំណាំស្រូវជាង ៣៥ ០០០ ហិកតា ដែលបានជន់លិចតាំងពីដើមខែកញ្ញានេះ»។
លោក កែវ វី បានថ្លែងថាទោះជាបែបណា តួលេខនេះនៅមិនទាន់រាប់បញ្ចូលអំពីផលប៉ះពាល់ដោយទឹកជំនន់នៅក្នុងស្រុកសំឡូត ខេត្តបាត់ដំបងនោះទេ៕
