.jpg)
បុរសចិន ២ នាក់ដែលត្រូវបានឃាត់ខ្លួន ក្រោយស្ត្រីចិនធ្លាក់ពីខុនដូនៅកោះពេជ្រម្សិលមិញ។ រូប សហការី
ភ្នំពេញៈ សមត្ថកិច្ចខណ្ឌចំការមនបន្តឃាត់ខ្លួនបុរសជនជាតិចិន ២ នាក់ ដើម្បីធ្វើការសាកសួរ បន្ទាប់ពីមាននារីជនជាតិចិនម្នាក់បានធ្លាក់ពីលើអគារខុនដូកម្ពស់ ១២ ជាន់ កាលពីម៉ោងជិត ២ រំលងអធ្រាត្រឈានចូលថ្ងៃព្រហស្បតិ៍ម្សិលមិញ ខណៈការសន្និដ្ឋានជំហានដំបូងថាអាចជាករណីធ្វើអត្តឃាត។
យោងតាមសមត្ថកិច្ចបានឲ្យដឹងថា នារីរងគ្រោះមានឈ្មោះ ម៉ី ម៉ី អាយុ ៤១ ឆ្នាំ ចំណែកជនជាតិចិន ២ នាក់ ដែលត្រូវបានឃាត់ខ្លួនទី ១ ឈ្មោះ ហ្វុង ឡុង ភេទប្រុសអាយុ ២៨ ឆ្នាំ ស្នាក់នៅជាន់ទី ១២ បន្ទប់លេខ ៥៦ និងទី ២ ឈ្មោះ ចូវ ជាម៉ិញ ភេទប្រុស អាយុ ២៩ ឆ្នាំ ស្នាក់ជាន់ទី ២៤។ ទីតាំងអគារដែលនារីរងគ្រោះបានធ្លាក់នោះស្ថិតនៅលើផ្លូវច្រកចូលស្ពានហង្សកោះពេជ្រក្នុងសង្កាត់ទន្លេបាសាក់ ខណ្ឌចំការមន រាជធានីភ្នំពេញ។
លោក ឈួន មៀចស៊ីម៉ូលីន អធិការរងនគរបាលខណ្ឌចំការមនទទួលផែនព្រហ្មទណ្ឌបានប្រាប់ភ្នំពេញប៉ុស្តិ៍ពីម្សិលមិញថា ក្រោយពីមានហេតុការណ៍នារីរងគ្រោះធ្លាក់ពីលើអគារនោះ សមត្ថកិច្ចបានធ្វើការឃាត់ខ្លួន បុរសជាជនជាតិចិន ២ នាក់ខាងលើដែលម្នាក់ឈ្មោះ ហ្វុង ឡុង ត្រូវជាមិត្តប្រុសរបស់ជនរងគ្រោះ។
លោកបន្តថា ក្រោយការឃាត់ខ្លួនបុរសចិនដែលជាសង្សារជនរងគ្រោះ បានប្រាប់ថា ពួកគេទាំង ២ នាក់ មានទំនាក់ទំនងស្នេហាជាមួយគ្នា។ ប៉ុន្តែក្នុងថ្ងៃកើតហេតុខ្លួនបានសុំបែកគ្នាពីនារីរងគ្រោះ ហើយបណ្តាលឲ្យនាងគិតខ្លីធ្វើអត្តឃាតខ្លួនឯងតែម្តង។
លោកបន្តថា៖ «នេះគ្រាន់តែជាសម្តីរបស់សង្សារគាត់អ៊ីចឹង ហើយយើងមិនទាន់ជឿទាំងស្រុងទេ។ ឥឡូវយើងកំពុងធ្វើការស្រាវជ្រាវពិនិត្យមើលកន្លែងកើតហេតុ និងការធ្វើកោសល្យវិច័យទៅលើសាកសពសិន។ យើងបន្តឃាត់ខ្លួនសង្សារ (ជនរងគ្រោះ) ម្នាក់ និងមិត្តភក្តិគាត់ម្នាក់»។
បើទោះជាមានការអះអាងដូច្នេះ ក៏លោក មៀចស៊ីម៉ូលីន បានបញ្ជាក់ថា សមត្ថកិច្ចនៅតែបន្តសាកសួរ និងឃាត់ខ្លួនជនជាតិចិនទាំង ២ នាក់នេះ បណ្តោះអាសន្នសិន។ បើក្នុងករណីរកឃើញថា មិនជាប់ពាក់ព័ន្ធនឹងករណីឃាតកម្មទេនឹងដោះលែងវិញ។
លោកបញ្ជាក់ថា៖ «យើងមិនទាន់ហ៊ានសន្និដ្ឋានទាំងស្រុងទេ ប៉ុន្តែតាមមើលករណីនេះមិនមែនជារឿងឃាតកម្មទេ អាចជាគាត់ (ជនរងគ្រោះ) លោតមកខ្លួនឯង។ យ៉ាងណា យើងមិនទាន់ច្បាស់ទេ យើងកំពុងធ្វើកិច្ចការនេះសិន ព្រោះយើងបន្តឃាត់ខ្លួនគាត់ទុកសិន។ យើងបន្តសួរនាំឲ្យបានដឹងច្បាស់សិន ហើយបើករណីមិនមែនជាករណីឃាតកម្ម យើងនឹងអនុញ្ញាតឲ្យគាត់ត្រឡប់ទៅវិញ ហើយបើករណីឃាតកម្ម យើងនឹងកសាងសំណុំរឿងទៅតុលាការ»។
បើតាមលោក ឈួន មៀចស៊ីម៉ូលីន គឺនារីរងគ្រោះបានធ្លាក់ចេញពីបន្ទប់លេខ ៥៦ នៅជាន់ទី ១២ ដែលជាបន្ទប់របស់សង្សារខ្លួន ខណៈជនរងគ្រោះបានស្នាក់នៅក្នុងបន្ទប់ខុនដូជាន់ទី ១៧ ក្នុងអគារនោះដែរ។ ក្រោយសមត្ថកិច្ចធ្វើកោសល្យវិច័យនៅកន្លែងកើតហេតុ សាកសពនារីរងគ្រោះត្រូវបានដឹកយកទៅតម្កល់ទុកនៅវត្តស្ទឹងមានជ័យដើម្បីរង់ចាំសាច់ញាតិមកទទួលយកទៅធ្វើបុណ្យតាមប្រពៃណី។
លោក នង សុវណ្ណរ័ត្ន វេជ្ជបណ្ឌិតផ្នែកកោសល្យវិច័យនៃគណៈកម្មាធិការកោសល្យវិច័យវិទ្យាសាស្ត្រថ្នាក់រាជធានីភ្នំពេញប្រាប់ភ្នំពេញប៉ុស្តិ៍ ក្រោយបញ្ចប់ការត្រួតពិនិត្យសាកសពជនរងគ្រោះពីម្សិលមិញថា ជនរងគ្រោះបានស្លាប់ ដោយសារការធ្លាក់ពីលើទីខ្ពស់ ហើយប៉ះត្រូវចំក្បាល និងខ្លួនប្រាណ ដែលបណ្តាលឲ្យបាក់ដៃ ជើង និងបែកក្បាល។ បន្ថែមពីនេះទៀតសោត ការពិនិត្យសាកសព គឺមិនបានរកឃើញស្លាកស្នាមនៃការប្រទូសរ៉ាយណាមួយនោះទេ។
ប៉ុន្តែលោក សុវណ្ណរ័ត្ន បានបន្ថែមថាចំពោះការសន្និដ្ឋានបែបណានោះ គឺអាស្រ័យទៅលើសមត្ថកិច្ច ព្រោះលោកមានភារកិច្ចក្នុងការពិនិត្យសាកសព និងរកពីមូលហេតុនៃការស្លាប់របស់ជនរងគ្រោះតែប៉ុណ្ណោះ។
លោកបញ្ជាក់ថា៖ «កាតព្វកិច្ចរបស់ខ្ញុំគឺត្រួតពិនិត្យរកមូលហេតុស្លាប់ ហើយករណី និងមូលហេតុអ្វីផ្សេងទៀត គឺជាសមត្ថកិច្ចរបស់ប៉ូលិសដែលខាងជំនាញស៊ើបអង្កេត និងបើកការស៊ើបអង្កេតតាមរយៈការបំភ្លឺអ្នកនៅជុំវិញអីហ្នឹង។ យើងមិនឃើញមានស្នាមប្រទូសរ៉ាយអីទេ ហើយការស្លាប់នេះគឺប៉ះទង្គិចក្បាល និងខ្លួនប្រាណធ្ងន់ធ្ងរ»៕
