.jpg)
បុរសចិនប្រើកាំបិតភ្ជង់ស្រ្តីដូរលុយនៅប៉ោយប៉ែត កាលពីថ្ងៃទី ២៨ មេសា។ អាវុធហត្ថ
បន្ទាយមានជ័យៈ សមត្ថកិច្ចកងរាជអាវុធហត្ថនៃទីបញ្ជាការដ្ឋានខេត្តបន្ទាយមានជ័យបានបញ្ជូនបុរសជនជាតិចិនម្នាក់ទៅសាលាដំបូងខេត្ត បន្ទាប់ពីជននេះយកកាំបិតភ្ជង់ប្លន់ស្ត្រីដូរលុយម្នាក់កាលពីថ្ងៃទី ២៩ មេសា នៅភូមិក្បាលស្ពាន ១ សង្កាត់-ក្រុងប៉ោយប៉ែត ខេត្តបន្ទាយមានជ័យ។
លោក ឡាក់ ភី មន្ត្រីទំនាក់ទំនងព័ត៌មាន នៃបញ្ជាការដ្ឋានកងរាជអាវុធហត្ថខេត្តបន្ទាយមានជ័យឲ្យដឹងថា បុរសជនជាតិចិនឈ្មោះ Li Shuai ហៅអាជេ អាយុ ៣២ ឆ្នាំស្នាក់នៅបណ្តោះអាសន្នបន្ទប់លេខ ០២៤ នៃសណ្ឋាគារមួយ ស្ថិតក្នុងភូមិអូរជ្រៅ សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ ត្រូវបានសមត្ថកិច្ចអាវុធហត្ថបញ្ជូនទៅសាលាដំបូងខេត្តបន្ទាយមានជ័យ កាលពីថ្ងៃទី ៣០ មេសា។
លោកនិយាយថា ជនសង្ស័យម្នាក់នេះបានយកកាំបិតចិតបន្លែទៅភ្ជង់ប្លន់ស្ត្រីម្នាក់ឈ្មោះរ៉ុម សុខឿនអាយុ ៣៤ ឆ្នាំ ដែលជាម្ចាស់តូបប្ដូរប្រាក់ ស្ថិតក្នុងភូមិក្បាលស្ពាន ១ សង្កាត់ប៉ោយប៉ែត ក្រុងប៉ោយប៉ែត។ ខណៈជនសង្ស័យកំពុងធ្វើសកម្មភាពក៏មានការឆោឡោឡើងពីប្រជាពលរដ្ឋធ្វើឲ្យជនសង្ស័យភ័យរត់គេចខ្លួនតែត្រូវសមត្ថកិច្ចចាប់បាន។
លោកថ្លែងថា៖ «បើតាមសកម្ម-ភាពគឺជាករណីប្លន់ព្រោះជននេះបានយកកាំបិតភ្ជង់ជនរងគ្រោះ។ ប៉ុន្តែក្នុងច្បាប់ជាករណីលួចមានស្ថានទម្ងន់ទោស»។
តាមកំណត់ហេតុរបស់សមត្ថកិច្ចបង្ហាញថា កាលពីរសៀលថ្ងៃទី ២៩ ខែ មេសា ឆ្នាំ ២០១៩ ជនសង្ស័យបានធ្វើសកម្មភាពចូលក្នុងតូបប្ដូរលុយ និងលក់ទំនិញមួយកន្លែងហើយដើរចូលតូបប្តូរលុយ បន្លំធ្វើជាអ្នកប្ដូរលុយ។
ពេលចូលទៅដល់ក្នុងតូបនោះជនសង្ស័យបានដកកាំបិតខ្លីភ្ជង់បំពង់ករបស់ស្ត្រីរងគ្រោះ និងបានប្លន់យកលុយស្ត្រីរងគ្រោះ។
ចំពោះវត្ថុតាងដែលសមត្ថកិច្ចដកហូតបានរួមមានកាបូបស្ពាយពណ៌ឈាមជ្រូកចំនួន ១ ក្នុងនោះមានប្រាក់ជាក់ស្តែងក្នុងកាបូបចំនួន ៥០០០០ បាត ជារបស់ជនរងគ្រោះ និងវត្ថុតាងកូនកាំបិតចុងស្រួចចំនួន ១ ជារបស់ជនសង្ស័យ៕
