.jpg)
ជនជាតិចិនកាន់កាំបិតនៅដៃចាប់ក្រៀកស្ត្រីម្នាក់កាលពីថ្ងៃទី ១ នៅផ្លូវ ៤៣២ សង្កាត់បឹងត្របែក។ រូបថត Local news
ភ្នំពេញៈ បុរសជនជាតិចិនម្នាក់ត្រូវបានកម្លាំងនគរបាលព្រហ្មទណ្ឌខណ្ឌចំការមនចាប់បញ្ជូនខ្លួនទៅកាន់សាលាដំបូងរាជធានីភ្នំពេញពីម្សិលមិញ ដើម្បីចាត់ការបន្តតាមនីតិវិធី បន្ទាប់ពីជននេះបានបង្កហិង្សាដោយកាប់ទៅលើសមត្ថកិច្ច និងស្ត្រីខ្មែរម្នាក់ឲ្យរងរបួសកាលពីថ្ងៃទី ១ ខែធ្នូ។
លោក ហ៊ាង ថារ៉េត អធិការរងខណ្ឌចំការមនបានប្រាប់ភ្នំពេញប៉ុស្តិ៍ពីម្សិលមិញថា ជនសង្ស័យឈ្មោះ JIN CHUN អាយុ ៣៧ ឆ្នាំជាជនជាតិចិន ត្រូវបានចាប់ខ្លួនកាលពីរសៀលថ្ងៃទី ១ ខែធ្នូ បន្ទាប់ពីបានប្រើកាំបិតបុ័ងតោកាប់ទៅលើមន្ត្រីនគរបាលអន្តរាគមន៍ម្នាក់ឈ្មោះ ម៉ៅ សំណាង និង ស្ត្រីលក់អំពៅសាងឈ្មោះ មាស សាលី អាយុ ៧០ ឆ្នាំបណ្ដាលឲ្យរងរបួស។
លោក ថារ៉េត បានបញ្ជាក់ថា៖ «ជនសង្ស័យត្រូវបានបញ្ជូនខ្លួនទៅកាន់តុលាការរាជធានីភ្នំពេញដោយចោទប្រកាន់ពីបទហិង្សាដោយចេតនា ។ នៅពេលនេះតំណាងអយ្យការអមសាលាដំបូងកំពុងធ្វើការសាកសួរបន្ត»។
យោងតាមរបាយការណ៍របស់សមត្ថកិច្ចនគរបាលមូលដ្ឋានដែលភ្នំពេញប៉ុស្តិ៍ទទួលបានពីម្សិលមិញឲ្យដឹងថា នៅមុនពេលកើតហេតុគេឃើញបុរសជនជាតិចិនខាងលើនេះកាន់កាំបិតបុ័ងតោ ១ នៅក្នុងដៃ ដើរស្រែកឡូឡានៅតាមបណ្ដោយផ្លូវលេខ ៤៣២ ស្ថិតក្នុងសង្កាត់បឹងត្របែក ខណ្ឌចំការមន រាជធានីភ្នំពេញ និងបានយកកាំបិតកាប់ក្បាលខ្លួនឯងម្ដងហើយម្ដងទៀត បណ្ដាលឲ្យហូរឈាមជោកខ្លួន។
ឃើញដូច្នោះលោក ម៉ៅ សំណាង ដែលជាមន្ត្រីនគរបាលផ្នែកអន្តរាគមន៍នៅខណ្ឌចំការមនបានព្យាយាមចូលទៅចាប់ដកកាំបិតពីដៃបុរសជនជាតិចិនខាងលើនេះ ប៉ុន្តែត្រូវបុរសជនជាតិចិនដែលទំនងជាបែកថ្នាំដល់កម្រិតនោះកាប់ប្រហារបណ្ដាលឲ្យរងរបួសប្រអប់ដៃខាងស្ដាំ។
ក្រោយមកជនសង្ស័យបានស្ទុះទៅចាប់ស្ត្រីវ័យចំណាស់ម្នាក់ដែលលក់អំពៅសាងនៅក្បែរនោះមកធ្វើជាចំណាប់ខ្មាំង ដោយកាប់ក្បាលស្ត្រីរងគ្រោះ ១ កាំបិត គំរាមដល់សមត្ថកិច្ច ប៉ុន្តែសំណាងល្អស្ត្រីរងគ្រោះនៅមានស្មារតីរឹងមាំបានរើបម្រះខ្លួនរួចពីកណ្ដាប់ដៃជនសង្ស័យ។
របាយការណ៍បន្តថាភ្លាមៗនោះជនរងគ្រោះទាំង ២ ត្រូវបានកម្លាំងសមត្ថកិច្ចដឹកយកទៅកាន់មន្ទីរពេទ្យរុស្ស៊ី ដើម្បីពិនិត្យព្យាបាលរបួស។ បន្ទាប់មកប្រជាពលរដ្ឋ និងសមត្ថកិច្ចបាននាំគ្នាចូលទៅបង្ក្រាបចាប់បុរសជនជាតិចិននោះដាក់ខ្នោះនាំយកទៅព្យាបាលរបួសនៅមន្ទីរពេទ្យរុស្ស៊ីផងដែរ មុនពេលធ្វើការសាកសួរ និងកសាងសំណុំរឿងបញ្ជូនខ្លួនទៅកាន់តុលាការ ដើម្បីចាត់ការបន្តតាមផ្លូវច្បាប់។
លោក យិន សាន អធិការនគរបាលខណ្ឌចំការមនប្រាប់ភ្នំពេញប៉ុស្តិ៍ថា៖ «យោងតាមការធ្វើកោសល្យវិច័យទៅលើទឹកនោម ជនសង្ស័យមានផ្ទុកសារធាតុញៀន»។ លោកបានបន្តថា៖ «លោក ម៉ៅ សំណាង បានរងរបួសខ្នងប្រអប់ដៃស្ដាំដោយមុតរយះដល់ឆ្អឹង ខណៈអ្នកស្រី មាស សាលី របួសស្បែកក្បាលប្រវែង ៦ ថ្នេរ ហើយនៅពេលនេះអ្នកទាំង ២ កំពុងបន្តសម្រាកព្យាបាលនៅមន្ទីរពេទ្យរុស្ស៊ីនៅឡើយ»។
លោក លី សុផាន់ណា អ្នកនាំពាក្យអយ្យការអមសាលាដំបូងរាជធានីភ្នំពេញ ប្រាប់ភ្នំពេញប៉ុស្តិ៍ពីម្សិលមិញថា សំណុំរឿងនេះត្រូវបានបញ្ជូនមកដល់ដៃស្ថាប័នអយ្យការហើយ និងកំពុងបន្តធ្វើការសាកសួរទៅតាមនីតិវិធី។
គួរបញ្ជាក់ថាក្នុងចំណោមជនបរទេសដែលកំពុងមានវត្តមានរស់នៅ និងបម្រើការងារនៅកម្ពុជា ជនជាតិចិនត្រូវបានគេកត់សម្គាល់ឃើញថាមានការប្រព្រឹត្តបទល្មើសច្រើនជាងគេនាប៉ុន្មានឆ្នាំចុងក្រោយនេះ។
ជាក់ស្ដែងកាលពីចុងខែវិច្ឆិកាកន្លងទៅថ្មីៗនេះ បុរស-ស្ត្រី ជនជាតិចិន ២៣៥ នាក់ត្រូវបានកម្លាំងសមត្ថកិច្ចនគរបាលក្រសួងមហាផ្ទៃសហការជាមួយកម្លាំងសមត្ថកិច្ចនគរបាលខេត្តតាកែវចាប់ឃាត់ខ្លួនពាក់ព័ន្ធករណីចាប់ជំរិតតាមប្រព័ន្ធអ៊ីនធឺណិត៕
