សៀមរាបៈ បុរសជនជាតិរុស្ស៊ីម្នាក់ឈ្មោះ Roman Bak Tigzih អាយុ ៣០ ឆ្នាំ ត្រូវបានឃុំខ្លួនជាបណ្ដោះអាសន្ននៅក្នុងពន្ធនាគារខេត្តសៀមរាបដោយជាប់ចោទពីបទទិញពេស្យាចារកុមារ។
ជនត្រូវចោទ Roman ត្រូវបានចាប់ខ្លួននៅរាជធានីភ្នំពេញក្រោយពីកម្លាំងនគរបាលការិយាល័យប្រឆាំងការជួញដូរមនុស្ស និងការពារអនីតិជន ខេត្តសៀមរាបបានធ្វើការស៊ើបអង្កេតអស់រយៈពេលប្រមាណជា ៣ ខែ។
លោកស្រី ដួង ថាវរី ស្នងការរងខេត្តសៀមរាបទទួលបន្ទុកប្រឆាំងការជួញដូរមនុស្ស និង ការពារអនីតិជនបានប្រាប់ភ្នំពេញប៉ុស្តិ៍នៅថ្ងៃអាទិត្យថា ក្រោយពីទទួលបានពាក្យបណ្ដឹងពីឪពុកម្ដាយជនរងគ្រោះ កម្លាំងសមត្ថកិច្ចបានចុះធ្វើការស្រាវជ្រាវ និងកសាងសំណុំរឿងបញ្ជូនទៅតុលាការ ដើម្បីចំណាត់ការបន្តតាមនីតិវិធីច្បាប់។ លុះក្រោយមកតុលាការបានចេញដីកាបង្គាប់ឲ្យជនសង្ស័យចូលខ្លួនមកឆ្លើយបំភ្លឺ ជុំវិញការចោទប្រកាន់ពីឪពុកម្ដាយជនរងគ្រោះ ប៉ុន្តែជនសង្ស័យបានគេចខ្លួន។
លោកស្រីបានឲ្យដឹងថា៖ «តាមរយៈការស្រាវជ្រាវរបស់សមត្ថកិច្ចជំនាញយើងជាង ៣ ខែកន្លងមកនេះបានកំណត់ទីតាំងច្បាស់លាស់របស់ជនសង្ស័យស្នាក់នៅ និងក្រោមកិច្ចសហការជាមួយកម្លាំងនគរបាលរាជធានីភ្នំពេញនៅរសៀលថ្ងៃសុក្រ ទី ១៨ ខែតុលា បានចាប់ឃាត់ខ្លួនជនសង្ស័យបញ្ជូនឲ្យតុលាការចាត់ការបន្តតាមនីតិវិធីច្បាប់»។
លោក ជា ហេង ប្រធានការិយាល័យប្រឆាំងការជួញដូរមនុស្ស និងការពារអនីតិជនខេត្តសៀមរាបបានប្រាប់ភ្នំពេញប៉ុស្តិ៍នៅថ្ងៃអាទិត្យថា ជនសង្ស័យឈ្មោះ Roman Bak Tigzih អាយុ ៣០ ឆ្នាំ ជាជនជាតិរុស្ស៊ីត្រូវបានចាប់ខ្លួនកាលពីរសៀលថ្ងៃសុក្រនៅចំណុចមុខអគារ The Bright ភាគខាងត្បូងស្ថានទូតអូស្ត្រាលីប្រចាំកម្ពុជាដែលមានទីតាំងស្ថិតនៅក្នុងសង្កាត់ទន្លេបាសាក់ ខណ្ឌចំការមន រាជធានីភ្នំពេញ។
លោកបានបញ្ជាក់ថា៖ «ការចាប់ខ្លួនបុរសជនជាតិរុស្ស៊ីខាងលើនេះគឺធ្វើឡើងតាមដីកាបង្គាប់ឲ្យចូលខ្លួនរបស់តុលាការខេត្តសៀមរាបដែលបានចោទប្រកាន់ពីបទទិញពេស្យាចារកុមារកាលពីអំឡុងខែឧសភា និង ខែ មិថុនា ឆ្នាំ ២០១៩»។
លោកបានប្រាប់ឲ្យដឹងផងដែរថា ជនសង្ស័យត្រូវបានតុលាការខេត្តសៀមរាប បង្គាប់ឲ្យនាំយកទៅឃុំខ្លួននៅពន្ធនាគារខេត្តសៀមរាបជាបណ្ដោះអាសន្ន ដើម្បីរង់ចាំការជំនុំជម្រះទោសនៅពេលក្រោយ។
យោងតាមរបាយការណ៍របស់សមត្ថកិច្ចនគរបាលការិយាល័យប្រឆាំងការជួញដូរមនុស្ស និងការពារអនីតិជន ខេត្តសៀមរាប បានគូសបញ្ជាក់ថា កាលពីអំឡុងខែឧសភា និង ខែ មិថុនា ឆ្នាំ ២០១៩ ជនសង្ស័យបានល្បួងយុវតី ៣ នាក់ ដែលមានវ័យជាអនីតិជននៅឡើយយកទៅរួមភេទនៅក្នុងបន្ទប់សណ្ឋាគារមួយក្នុងក្រុងសៀមរាប ខេត្តសៀមរាប ជាថ្នូរទៅនឹងការផ្ដល់ឲ្យនូវសម្លៀកបំពាក់ល្អៗ ចំណីអាហារឈ្ងុយឆ្ងាញ់ និងលុយកាក់មួយចំនួនទៀតដល់ពួកនាងដែលទង្វើនេះត្រូវបានគេចាត់ទុកថាជាអំពើទិញពេស្យាចារលើអនីតិជន។
កាលពីរសៀលថ្ងៃសុក្រមុនពេលចាប់ខ្លួន គេឃើញជនសង្ស័យជិះម៉ូតូកង់ ៣ ឥណ្ឌា និងមានរថយន្ត Land Cruiser ១ គ្រឿងតាមពីក្រោយ។ លុះមកដល់ចំណុចកើតហេតុខាងលើ គេឃើញរថយន្ត Land Cruiser នោះឈប់នៅពីមុខម៉ូតូកង់ ៣ របស់ជនសង្ស័យ បន្ទាប់មកមានមនុស្ស ១ ក្រុមដែលស្លៀកពាក់ឯកសណ្ឋានស៊ីវិលចុះពីរថយន្ត ហើយចាប់ឃាត់ជនសង្ស័យច្រានបញ្ចូលទៅក្នុងរថយន្ត ខណៈនោះជនសង្ស័យក៏បានស្រែកឲ្យអ្នកធ្វើដំណើរតាមដងផ្លូវជួយ ប៉ុន្តែក្រុមជនស៊ីវិលទាំងនោះបានប្រាប់ពលរដ្ឋថា ពួកគេជាសមត្ថកិច្ចនគរបាលប្រឆាំងការជួញដូរមនុស្ស ហើយថាជនសង្ស័យត្រូវបានតុលាការខេត្តសៀមរាបចេញដីកាឲ្យនាំខ្លួនជនជាតិបរទេសម្នាក់នេះដោយត្រូវបានចោទប្រកាន់ពាក់ព័ន្ធការទិញពេស្យាចារលើកុមារ៕