.jpg)
ក្រុមគ្រួសារធ្វើបុណ្យសពបុរសស្លាប់ដោយអាថ៌កំបាំង។ សហការី
ភ្នំពេញៈ សមត្ថកិច្ចខណ្ឌពោធិ៍សែនជ័យ និងសង្គមស៊ីវិល អះអាងដូចគ្នាថា នឹងបើកការស៊ើបអង្កេតករណីបុរសមានសតិមិនល្អម្នាក់ បានស្លាប់ដោយអាថ៌កំបាំងនៅមជ្ឈមណ្ឌលសំចតសង្គមកិច្ចរាជធានីភ្នំពេញ ឬមជ្ឈមណ្ឌលព្រៃស្ពឺសូម្បីតែក្រុមគ្រួសារ ក៏មិនបានដឹងឮ ហើយត្រូវបានបញ្ជូនយកទៅបូជាភ្លាមៗ កាលពីថ្ងៃអង្គារ នៅវត្តឫស្សីសាញ់។
បុរសដែលបានស្លាប់ ត្រូវបានក្រុមគ្រួសារអះអាងថា មានឈ្មោះ នួន រដ្ឋា អាយុ ២៧ ឆ្នាំ មានលំនៅភូមិឫស្សី សង្កាត់ស្ទឹងមានជ័យ ខណ្ឌមានជ័យ រាជធានីភ្នំពេញ បន្ទាប់ពីរូបគេត្រូវបានក្រុមគ្រួសារសម្រេចនាំទៅមជ្ឈមណ្ឌលសំចតសង្គមកិច្ចរាជធានីភ្នំពេញ កាលពី ១ ឆ្នាំមុន ព្រោះមានសតិមិនល្អ ហើយគ្រួសារមិនអាចមើលថែរក្សាបាន។
ក្រុមគ្រួសារសពដែលសុំមិនបញ្ចេញឈ្មោះ បានឲ្យភ្នំពេញប៉ុស្តិ៍ដឹងថា ពួកខ្លួនមិនបានដឹងថាជនរងគ្រោះធ្លាក់ខ្លួនឈឺជាទម្ងន់តាំងពីពេលណានោះទេ ហើយក៏មិនដឹងថា ជនរងគ្រោះមានជំងឺអ្វីឡើយ តែនៅពេលទទួលបានដំណឹងថា ជនរងគ្រោះបានស្លាប់ ពួកខ្លួនក៏ប្រញាប់ប្រញាល់ទៅមើលជនរងគ្រោះ តែនៅពេលទៅដល់ ខាងមណ្ឌលបានបូជាសពជនរងគ្រោះបាត់ទៅហើយ ដោយគ្មានក្រុមគ្រួសារណាបានទៅទាន់នោះទេ។
លោកបញ្ជាក់ថា៖ «ខ្ញុំមិនទាន់ដឹងថា មូលហេតុអ្វី ពិតប្រាកដទេ ដូចខ្ញុំជម្រាបអ៊ីចឹង ដោយសារខ្ញុំមិនអស់ចិត្តទៅលើបញ្ហាហ្នឹង? ហើយម្យ៉ាងទៀត សូម្បីតែការស្នើសុំរបស់ក្រុមគ្រួសារឲ្យតម្កល់ទុកសពដើម្បីធ្វើបុណ្យ បូជាតាមប្រពៃណី ក៏មិនបាន។ ព្រោះក្រុមគ្រួសារនៅឆ្ងាយ ដល់ពេលយើងមកមិនទាន់ ហើយក៏បូជាអ៊ីចឹង យើងអត់យល់ ថាវាជាមូលហេតុអ្វី ហើយយើងមិនអស់ចិត្ត តែយើងមិនមានចេតនា ដាក់បន្ទុកអីទេ»។
បុរសរូបនោះអំពាវនាវឲ្យមានការស៊ើបអង្កេត និងបង្ហាញការពិតឲ្យបានច្បាស់ ដើម្បីក្រុមគ្រួសារបានអស់ចិត្ត ខណៈលោករំពឹងថា នៅពេលពិធីបុណ្យសពចប់ នោះនឹងមានការបកស្រាយច្បាស់លាស់ជុំវិញបញ្ហានេះ។
លោក យឹម សារ៉ាន់ អធិការនគរបាលខណ្ឌពោធិ៍សែនជ័យ បានឲ្យភ្នំពេញប៉ុស្តិ៍ដឹងពីថ្ងៃម្សិលមិញថា នៅពេលទទួលបានពាក្យបណ្តឹងពីគ្រួសារសព ឲ្យជួយធ្វើការស្រាវជ្រាវរកមូលហេតុ នៃការស្លាប់នេះ ខ្លួនក៏បានបញ្ជូនកម្លាំងនគរបាលប៉ុស្តិ៍ចោមចៅ ២ ចំនួន ៣ នាក់ ចុះទៅកាន់មណ្ឌលខាងលើ ដើម្បីសួរនាំព័ត៌មាន។
លោកបន្តថា នៅពេលចុះទៅដល់ មិនទទួលបានការសហការពីប្រធានមណ្ឌលនោះទេ ខណៈដែលលោកអះអាងថា រាល់ការស្លាប់របស់ពលរដ្ឋណាម្នាក់ គឺត្រូវតែឆ្លងកាត់ការពិនិត្យកោសល្យវិច័យជាមុនសិន មុនមានការអនុញ្ញាតឲ្យបូជាសព ដែលលោកអះអាងថា សមត្ថកិច្ច នឹងបន្តស៊ើបអង្កេតពីករណីនេះ។
លោកបញ្ជាក់ថា៖ «រឿងហ្នឹង យើងអត់ទាន់ធ្វើការស្រួលបួលទេ ដោយសារក្រុមគ្រួសារសព សុំឲ្យបានធ្វើបុណ្យ ៧ ថ្ងៃ ស្រួលបួលសិន ណាមួយនៅពេលសមត្ថកិច្ចយើងទៅដល់មណ្ឌលនោះភ្លាមៗ មានប្រតិកម្មមកវិញ ហើយនិយាយឲ្យចំ ប៉ូលិសយើងក៏អត់បានចូល (មណ្ឌល) នោះដែរ គឺឈរនៅតែខាងក្រៅរបង មិនបានទាក់ទង និយាយគ្នាទាំងអស់។ តែយើងនឹងធ្វើការស៊ើបអង្កេតតាមជំនាញរបស់យើង ដូចដែលច្បាប់បានកំណត់ឲ្យយើង»។
លោកស្រី មុំ ចាន់ដានី ប្រធានមន្ទីរសង្គមកិច្ចអតីតយុទ្ធជន និងយុវនីតិសម្បទាក្រុងភ្នំពេញ និងជាប្រធានមណ្ឌលព្រៃស្ពឺ បានបដិសេធព័ត៌មានទាំងនេះ ដោយអះអាងថា ករណីស្លាប់របស់ជនរងគ្រោះម្នាក់នេះ មិនបានកើតឡើងនៅក្នុងមណ្ឌលនោះទេ ហើយក៏មិនមែនជាជំងឺឈឺរាុំរ៉ៃដែរ ដោយការស្លាប់នេះ ក្រុមគ្រូពេទ្យបានអះអាងថា ជនរងគ្រោះគាំងបេះដូង។
លោកស្រីបានបញ្ជាក់ថា៖ «អាការហ្នឹងធម្មតាទេ មនុស្សយើងអ្នកណាទៅដឹងមុន ខ្យល់ចាប់ វិលមុខ អីអ៊ីចឹង ហើយក្រុមគ្រួពេទ្យ បានបញ្ជាក់ថា គាត់គាំងបេះដូង តាមជំនាញខាងពេទ្យ ចេញលិខិត»។
ចំណែកការអះអាងថា មណ្ឌលមិនបានសហការ និងបានបូជាសព យ៉ាងប្រញាប់ប្រញាល់នោះ លោកស្រី ក៏បានបដិសេធដែរថា៖ «យើងអត់មានប្រញាប់បូជាទេ ដោយយើងគិតបំផុត បញ្ជូនអ្នកជំងឺទៅព្យាបាល និងជួយសង្គ្រោះគាត់មុនគេ។ ក្រោយពីគាត់បានផុតទៅ (ស្លាប់) យើងបានរៀបឯកសារបញ្ជូនទៅ តម្កល់នៅវត្ត ដើម្បីរង់ចាំគ្រួសារទេ ប៉ុន្តែខាងតាអាចារ្យ គាត់មានប្រសាសន៍ថា គាត់ប្រញាប់យកឡហ្នឹង។ អត់ទេៗ អត់មានហេតុផលដែលមន្ត្រីយើងអ្នកប្រញាប់ឲ្យបូជាសពហ្នឹងទេ»។
លោក អំ សំអាត មន្ត្រីការពារសិទ្ធិមនុស្សរបស់អង្គការលីកាដូ ថ្លែងថានឹងធ្វើការស៊ើបអង្កេតករណីនេះ ដើម្បីស្វែងរកការពិតជូនជនរងគ្រោះ។
លោកបញ្ជាក់ថា៖ «កន្លងមកមានរឿងចម្រូងចម្រាសជាច្រើន បញ្ហាស្លាប់ហ្នឹង ហើយអង្គការសង្គមស៊ីវិល ធ្លាប់អំពាវនាវហើយ ថាបើមានការកែប្រែមិនល្អ សូមឲ្យបិទមណ្ឌលនេះតែម្តងទៅ ព្រោះវាមានបញ្ហាច្រើនកើតឡើងដដែល។ ដូចករណីថ្មីនេះ យើងមើលមនុស្សស្លាប់មួយទាំងមូល ហើយមានសាច់ញាតិទៀត»៕
