.jpg)
ស្រ្តីរងគ្រោះដោយសារចោរឆក់កាបូប ខណៈប្ដីដួលបោកក្បាលស្លាប់។ រូបថត សហការី
ភ្នំពេញៈ ករណីឆក់ទ្រព្យសម្បត្តិពលរដ្ឋ និងភ្ញៀវទេសចរនៅតាមដងផ្លូវនៅក្នុងរាជធានីភ្នំពេញនៅបន្តកើតមានស្ទើររាល់ថ្ងៃដែលករណីខ្លះធ្វើឲ្យជនរងគ្រោះបាត់បង់ជីវិត បើទោះបីជាមានការបង្ក្រាបពីសមត្ថកិច្ចក៏ដោយ។ មន្ត្រីរដ្ឋាភិបាល និងសង្គមស៊ីវិលបានឲ្យដឹងថាការធ្វើឲ្យជនល្មើសរាងចាលមិនទាន់មានប្រសិទ្ធភាព។
ករណីបាត់បង់ជីវិតដោយការឆក់នេះកើតឡើងចុងក្រោយកាលពីព្រឹកថ្ងៃទី ៣ វិច្ឆិកានៅក្នុងសង្កាត់បឹងកេងកង ១ ដោយក្រុមចោរបានឆក់កាបូបពីប្តីប្រពន្ធដែលកំពុងជិះម៉ូតូ។ សាច់ញាតិជនរងគ្រោះដែលសុំមិនបញ្ចេញឈ្មោះបានឲ្យដឹងថាប្តីដែលស្លាប់មានឈ្មោះ ចយ អាំង អាយុ ៣៤ ឆ្នាំស្លាប់ដោយសារដួលបោកក្បាល រីឯភរិយា ឈ្មោះ សឿន ស៊ីម អាយុ ៣០ ឆ្នាំរួចពីការស្លាប់។
អ្នកទាំង ២ បានព្យាយាមដេញតាមក្រុមចោរដែលបានឆក់កាបូបពីចង្កេះនៅសង្កាត់បឹងកេងកង ១ ខណ្ឌចំការមន។ អ្នកស្រីរៀបរាប់ថាក្រុមចោរបានឆក់កាបូប ហើយជិះគេចខ្លួន ប៉ុន្តែប្ដីអ្នកស្រីបានដេញតាម។ នៅខណៈនោះមានជនសង្ស័យជិះម៉ូតូ ១ គ្រឿងមកសួរ ហើយថា ពួកគេជួយដេញចោរ ប៉ុន្តែរំពេចនោះជនសង្ស័យបានជ្រែម៉ូតូពីមុខម៉ូតូរបស់គាត់ធ្វើឲ្យប្ដីគាត់ដួលបោកក្បាលស្លាប់នៅនឹងកន្លែងតែម្ដង។
លោក គល់ សុផាត នាយប៉ុស្តិ៍នគរបាលសង្កាត់បឹងកេងកង ១ បានថ្លែងថា ករណីឆក់កើតឡើងនៅក្នុងសង្កាត់ទន្លេបាសាក់ ប៉ុន្តែជនសង្ស័យបានរត់គេចមកក្នុងដែនដីបឹងកេងកង ១។ សមត្ថកិច្ចកំពុងស្រាវជ្រាវ។
លោក ស ថេត ស្នងការនគរបាលរាជធានីភ្នំពេញបានថ្លែងថា សមត្ថកិច្ចកំពុងប្រឹងប្រែងបន្តទៀតលើការបង្ក្រាបអំពើឆក់ប្លន់តាមដងផ្លូវ។
លោក ថេត ថ្លែងថា៖ «យើងកំពុងមានវិធានការក្តៅហើយដើម្បីធ្វើឲ្យបទល្មើសនេះថយចុះ។ យើងមានវិធានការជាក់លាក់ហើយដើម្បីធ្វើការបង្ការ និងបង្ក្រាបបទល្មើសឆក់នេះ។ សមត្ថកិច្ចយើងមិនអាចដាក់គ្រប់កន្លែងកន្លុកកន្លៀតបានទេ ព្រោះយើងមានចំនួនកំណត់។ យើងត្រូវមានការចូលរួមទាំងអស់គ្នា បើពឹងតែលើសមត្ថកិច្ចហើយខ្លួនឯងមិនមានការប្រុងប្រយ័ត្ន ហើយធ្វេសប្រហែសពេលបាត់បង់ទៅហើយឆ្លើយតែលើសមត្ថកិច្ចមួយផ្នែកក៏វាមិនត្រឹមត្រូវដែរ»។
លោក ស ថេត បានឲ្យដឹងថាករណីឆក់មានទាំងមុខសញ្ញាចាស់ដែលបង្ក្រាបមិនទាន់បាន និងមុខសញ្ញាដែលចេញពីពន្ធនាគារដែលមានចំនួនច្រើនក្នុងចំណោមអ្នកដែលបានអនុវត្តទោសរួចដែលមួយខែៗមានចង់ ១០០ នាក់ចេញពីពន្ធនាគារហើយមានមុខសញ្ញាឆក់ភាគច្រើនដែលសមត្ថកិច្ចចាប់ពីមុនមក ហើយឥឡូវវាអាចផុតទោស។ វាចេញមកបែបនេះមានច្រើនគួរសម។ ក្នុងរយៈពេលប្រមាណជា ២ ខែសមត្ថកិច្ចបង្ក្រាបបានករណីឆក់ ២ ឬ ៣ ករណីក្នុង ១ ថ្ងៃ ស្មើប្រហែល ៩០ ភាគរយនៃករណីឆក់។
លោក ផៃ ស៊ីផាន អ្នកនាំពាក្យរាជរដ្ឋាភិបាលថ្លែងថានៅប្រទេសផ្សេងក៏មានស្ថានភាពបែបនេះ តែការឆក់នេះដោយសារតែវិធានការទប់ស្កាត់មិនទាន់មានប្រសិទ្ធភាព។
លោកថ្លែងថា៖ «យើងគ្រាន់តែមានប្រសិទ្ធភាពក្នុងការចាប់ ប៉ុន្តែតើធ្វើឲ្យមនុស្សចាកចេញពីការឆក់អីហ្នឹងត្រូវធ្វើយ៉ាងម៉េច?។ ពលរដ្ឋត្រូវតែដឹងខ្លួនឯងថាមានចោរ ហើយត្រូវប្រុងប្រយ័ត្នកុំផ្ដល់ឱកាសឲ្យក្រុមចោរទាំងនោះ»។
លោកអះអាងថាច្បាប់មិនបានចែងគ្រប់ជ្រុងជ្រោយពាក់ព័ន្ធនឹងការផ្តន្ទាទោសអ្នកប្រព្រឹត្តឃើញថា ការប្រឹងប្រែងរបស់អាជ្ញាធរបានប្រឹងប្រែងចាប់បាន ប៉ុន្តែនៅពេលច្បាប់ចែងមិនបានគ្រប់ជ្រុងជ្រោយវាធ្វើឲ្យទម្ងន់នៃការដាក់ទោសវាហាក់ដូចជាស្រាលដែលមិនធ្វើឲ្យអ្នកប្រព្រឹត្តអំពើហ្នឹងខ្លាចរាងចាល។ ដូច្នេះច្បាប់ត្រូវតែពង្រឹងដែនសមត្ថកិច្ចរបស់ខ្លួនពង្រឹងការដាក់ទណ្ឌកម្មឲ្យមនុស្សហ្នឹងខ្លាចរអា។
លោក ស៊ឹង សែនករុណា មន្ត្រីអង្គការសមាគមអាដហុកថ្លែងថាករណីឆក់នេះ ដែលរួមមានការធ្លាក់ចុះសីលធម៌សង្គម ភាពអត់ការងារធ្វើ គ្រឿងញៀន គ្រឿងស្រវឹង និងក្នុងដំណាក់កាលអនុវត្តច្បាប់ជាដើមនៅមានភាពធូររលុង។ ហើយការអប់រំនៅពន្ធនាគារចំពោះអ្នកប្រព្រឹត្តអំពើឆក់នេះមិនទាន់មានប្រសិទ្ធភាពដែលធ្វើឲ្យមនុស្សកែប្រែខ្លួននៅឡើយ។
លោក ករុណា ថ្លែងថា៖ «អត់បានរៀនសូត្រ ហើយចេញមកអត់អាចធ្វើអ្វីបាន។ អ៊ីចឹងគាត់ចេញមកមុខរបរគាត់ដែលចេះតែប្លន់គេបានលួចគេបាន គាត់បន្តទៀតទៅ។ យើងឃើញមានការអនុវត្តច្បាប់មានភាពមិនស៊ីចង្វាក់គ្នារវាងសមត្ថកិច្ច និងតុលាការមានមួយចំនួននោះឃើញថាមានការប្រឹងប្រែងពីមន្ត្រីនគរបាលយុត្តិធម៌ ខំប្រឹងចាប់ ប៉ុន្តែខាងស្ថាប័នតុលាការ ខាងអយ្យការគាត់ពិនិត្យភ័ស្តុតាងចុះឡើងអ៊ីចឹងទៅក៏ដោះលែងឲ្យនៅក្រៅឃុំអ៊ីចឹងទៅ។ អ៊ីចឹងយើងឃើញមានភាពប្រដំប្រសងគ្នាក្នុងរឿងហ្នឹង»៕
