.jpg)
ប្រជាពលរដ្ឋតវ៉ាដុតកង់ឡានម្សិលមិញនៅស្រុកទ្រាំង ខេត្តតាកែវ ទាមទារឲ្យអាជ្ញាធរដោះស្រាយរឿងផ្លូវដីហុយ។ រូបថត សហការី
តាកែវៈប្រជាពលរដ្ឋរស់នៅតាមបណ្តោយផ្លូវលេខ ១២៩ ហៅប្រឡាយ ០១ នៅស្រុកទ្រាំង ខេត្តតាកែវ ប្រមាណជាង ៣០០ នាក់ ពីម្សិលមិញបានប្រមូលផ្តុំគ្នាធ្វើបាតុកម្មបិទផ្លូវ ដោយដុតកង់ឡានលើផ្លូវក្នុងភូមិមួយកន្លែង ដើម្បីជំរុញឲ្យអាជ្ញាធរជួយកសាងផ្លូវនេះ ដោយសារមានលក្ខណៈ ខូចខាតលំបាកខ្លាំង ហើយមានជង្ហុក និងបង្កឲ្យមានធូលីហុយខ្លាំងនៅពេលមានរថយន្តបើកបរម្តងៗ។
លោក តឿ នន ប្រជាពលរដ្ឋរស់នៅភូមិត្រពាំងព្រៃ ឃុំអង្គខ្នុរ បានលើកឡើងថា ប្រជាពលរដ្ឋបង្ខំចិត្តលើកគ្នាមកតវ៉ានេះ ដោយសារផ្លូវមួយខ្សែប្រវែងជិត ២០ គីឡូម៉ែត្រ ឆ្លងកាត់ឃុំចំនួនពីរគឺ ឃុំដូងខ្ពស់ ស្រុកបុរីជលសារ និងឃុំអង្គខ្នុរ ស្ថិតនៅក្នុងស្រុកទ្រាំងខេត្តតាកែវ រងការខូចខាតស្ទើតែទាំងស្រុង ដោយមានជង្ហុកធំៗ ពេលរដូវស្សាមានទឹកដក់លើផ្លូវ ពេលរដូវប្រាំងមានធូលីដីហុយស្ទើរតែដកដង្ហើមមិនចេញ។
លោកបន្តថា ផ្លូវមួយខ្សែនេះ បើគិតចាប់តាំងពីឆ្នាំ ១៩៧៩ រហូតមកដល់ឆ្នាំ ២០១៨នេះ អាជ្ញាធរគ្រាន់តែយកដីបន្ដិចបន្ដូចមកប៉ះ និងចាក់ចូលកន្លែងជង្ហុកធំៗតែប៉ុណ្ណោះ ប៉ុន្ដែមិនបានចាក់ដីឲ្យបានគ្រប់គ្រាន់នោះទេ។ ពេលរថយន្តបើកបរម្ដងៗ ហុយធូលីមកលើផ្ទះប្រជាពល-រដ្ឋដែលនៅក្បែរៗនោះជារៀងរាល់ថ្ងៃ។
លោកបញ្ជាក់ថា៖«ផ្លូវហ្នឹងតាំងតែពីជំនាន់ដូនតាខ្ញុំឯណោះ ប្រជាពលរដ្ឋនៅទីនោះវេទនាជិត ៣០ឆ្នាំហើយ ប៉ុន្ដែអាជ្ញាធរបានសន្យាធ្វើវាតែនៅពេលជិតបោះឆ្នោត។ ពេលជិតបោះឆ្នោតចឹង គេយកដីមួយឡានមកចាក់នេះបន្ដិច ចាក់នោះបន្ដិចហើយដល់ពេលឡានធំៗបើកមកមានជង្ហុកដដែល ភ្លៀងមកទឹកលិច បើកថ្ងៃ មកដីហុយ ហើយក្មេងៗមាន
ជំងឺផ្លូវដង្ហើមស្ទើរតែគ្រប់គ្នា»។
លោក ង៉ែត សៀវ ពលរដ្ឋម្នាក់ទៀតបានឲ្យដឹងផងដែរថា រាល់ពេលដែលរថយន្តធន់ធំបើកមកម្ដងៗអ្នកដំណើរផ្សេងទៀតស្ទើរតែរកផ្លូវមិនឃើញ ព្រោះផ្លូវហុយងងឹតមេឃដោយសារធូលីដី។ លោកថា៖«មិនត្រឹមតែក្មេងៗមានជំងឺទេ តែចាស់ៗក៏មានជំងឺដោយសារផ្លូវនេះដែរ ពួកខ្ញុំសូមឲ្យសម្ដេច និងអាជ្ញាធរពាក់ព័ន្ធជួយកសាងផ្លូវមួយខ្សែរនេះផង ព្រោះអាជ្ញាធរនៅមូលដ្ឋានបានតែសន្យាមុនពេលបោះឆ្នោតតែប៉ុណ្ណោះ ហើយនៅពេលជាប់ឆ្នោត លែងរវល់នឹងពាក្យសន្យានេះហើយ»។
លោក ថាន ផល អធិការនគរបាលស្រុកទ្រាំងបានថ្លែងថា លោកបានចុះទៅសម្របសម្រួល និងដោះស្រាយជូនប្រជាពលរដ្ឋរួចហើយកាលពិម្សិលមិញ ដោយសារផ្លូវនៅក្នុងភូមិរបស់ពួកគាត់នោះ មានធូលីហុយខ្លាំងពេកនៅពេលដែលមានរថយន្តបើកបរម្ដង។ ផ្លូវមួយខ្សែនេះ មានភាពមមារញឹកខ្លាំង ព្រោះប្រជាពលរដ្ឋតែងតែដឹកកសិផលរបស់ខ្លួនយកទៅលក់នៅប្រទេសវៀតណាម ហើយបើកបរទាំងយប់ទាំងថ្ងៃ។
លោកថា៖«ខ្ញុំក៏ទទួលស្គាល់ដែរថា ផ្លូវហ្នឹងវាហុយ ប៉ុន្ដែខ្ញុំប្រាប់ពួកគាត់ហើយ គេកំពុងសិក្សាគម្រោងក្រាលកៅស៊ូ ហើយត្រូវចាក់ដីបន្ថែម ចឹងសុំឲ្យពួកគាត់ទ្រាំបន្ដិចទៀត។ ពួកគាត់មិនចង់បានអ្វីច្រើនទេ គឺសុំឲ្យផ្លូវហ្នឹងកុំឲ្យហុយខ្លាំងពេក ហើយខ្ញុំក៏សន្យាជាមួយពួកគាត់ដែរថា នឹងជួយបាញ់ទឹកលើផ្លូវនេះ មួយថ្ងៃពីរដង និងធ្វើយ៉ាណាមិនឲ្យហុយ
លើពលរដ្ឋយើងទៀតទេ»។
លោក ឈួន ផាន់នី អភិបាលស្រុកទ្រាំង និងលោក ណុប នី ប្រធានមន្ទីរសាធារណៈការ និងដឹកជញ្ជូនខេត្តតាកែវ កាលពីម្សិលមិញមិនទាន់អាចទាក់ទងបានទេ ប៉ុន្ដែភ្លាមៗនោះ លោកទាំងពីរបានចុះទៅអប់រំណែនាំ និងធ្វើការសម្របសម្រួលជាមួយនឹងប្រជាពលរដ្ឋ ភ្លាមៗផងដែរ ប៉ុន្តែអ្វីដែលអាជ្ញាធរចុះមកដោះស្រាយនៅពេលនេះ គឺគ្រាន់តែឲ្យរថយន្តពន្លត់អគ្គីភ័យរបស់ស្នងការនគរបាលខេត្ត តាកែវបាញ់ទឹកតាមបណ្តោយផ្លូវប្រឡាយ ០១ នេះ កុំឲ្យហុយបានតែមួយគ្រាប៉ុណ្ណោះ ខណៈដែលការចង់បានរបស់ប្រជាពលរដ្ឋនៅទី នោះចង់បានផ្លូវមួយនេះ ជាផ្លូវចាក់ក្រាលកៅស៊ូ៕
